О́ńir basshysy О́zbekstanmen ózara qarym-qatynasty jolǵa qoıý eldiń syrtqy saıasatynyń strategııalyq baǵyty bolyp tabylatynyn atap ótti.
«Osy jyldyń toǵyz aıy ishinde Aqtóbe oblysynyń О́zbekstanmen aradaǵy ishki taýar aınalymy 11,4 mln. AQSh dollaryn qurady, sonyń ishinde eksport – 9,8 mln. AQSh dollary, ımport 11,4 mln. AQSh dollary. Kókónis, bıdaı, arpa, un, kúnbaǵys maıy, hrom oksıdi, qara metaldardan jasalǵan ónimder eksporttalýda. Qarqyndy damyp kele jatqan Naýaı oblysy bizdiń óńir úshin úlken qyzyǵýshylyq týdyrady,-dep atap ótti Berdibek Saparbaev.
«Biz Aqtóbege tatý kórshilik qarym-qatynasymyzdy jalǵastyrý úshin keldik. Iskerlik baılanys ornatyp, ekonomıkanyń túrli salalaryndaǵy yntymaqtastyqty jolǵa qoıamyz, sonymen qatar, ózimizdiń atqarǵan jumystarymyzben jáne tájirıbemizben bólisemiz dep senemiz»,- dedi Fahrıddın Solıev óz kezeginde.
Berdibek Saparbaev delegasııaǵa oblystyń ınvestısııalyq múmkindikterin tanystyryp, munda bıznesti damytý úshin, sonyń ishinde sheteldik kompanııalarmen de barlyq jaǵdaı jasalǵanyn atap ótti. Taraptar ózara qarym-qatynas múmkindikterin talqylady.
О́ńirlerdiń hımııalyq ónerkásipti damytýda, О́zbekstannyń aýyl sharýashylyǵy tehnıkasyn Aqtóbe oblysynda satýda jáne servıstik qyzmet kórsetýde dıstrıbıýtorlyq ortalyqtar ashýda áleýeti zor, О́zbekstannyń farmosevtıkalyq sektoryn damytýdaǵy tájirıbesi, sonymen qatar jeńil ónerkásip salalary qyzyqty.
Osyǵan baılanysty aqtóbelik tarap dárilik zattar men bıologııalyq belsendi qospalardy shyǵarýda О́zbekstannyń farmasevtıkalyq kompanııalarymen áriptestikti jolǵa qoıýdy, sonymen qatar, tigin jáne trıkotaj buıymdaryn shyǵaratyn birlesken kásiporyndardy qurýdy josparlap otyr.
Naýaı oblysynyń delegasııasy eki kún boıy iri kásiporyndardyń jumystarymen, óńirdiń memlekettik-jeke seriktestikti damytýdaǵy tájirıbesimen tanysyp, áleýmettik nysandardy aralaıdy.
Temir QUSAIYN,
«Egemen Qazaqstan»
