Jemqorlyqtyń aldyn alý mańyzdy

Bul bastamany Ekonomıkalyq yntymaqtastyq jáne damý uıymy men Azııa damý banki 2001 jyly sybaılas jemqorlyqpen kúres salasynda tájirıbe almasý úshin usynǵan bolatyn. Qazaqstan oǵan 2002 jyly qosyldy.

Jıynǵa Memlekettik qyzmet jáne sybaılas jemqorlyqqa qarsy is-qımyl agenttiginiń tóraǵasy A.Shpek­baev, Qarjy mınıstri Á.Smaıy­lov, Azııa damý bankiniń Sybaı­las jemqorlyqqa qarsy is-áreket jáne parasattylyq jónindegi ofısi­niń keńesshisi L.Vong, Azııa jáne Ty­nyq muhıt aımaǵynyń 20-dan astam eliniń memlekettik satyp alý­lar salasyndaǵy korrýpsııaǵa qarsy qyz­metteri men memlekettik organdary­nyń ókilderi, sondaı-aq Ekonomıkalyq yntymaqtastyq jáne damý uıymynyń, Azııa damý bankiniń jáne BUU Damý baǵdarlamasynyń halyqaralyq sarapshylary qatysty.

Memlekettik hatshy quttyqtaý sózinde Qazaqstan Prezıdenti Nursultan Nazarbaevtyń «Sybaılas jemqorlyqpen kúres júrgizý isinde aldyn alý sharalaryn júıeli túrde qabyldaý basty mindet bolýǵa tıis» degen sózine toqtaldy.

G.Ábdiqalyqova Ult jospary, Sybaılas jemqorlyqqa qarsy 2015-2025 jyldarǵa arnalǵan strategııa aıasynda Qazaqstan sybaılas jem­qorlyqqa qarsy turýdyń zamanaýı modelin qalyptastyryp jat­qa­nyn aıtty. Elde sybaılas jemqor­lyq­tan ada qoǵam qurýǵa baǵyttalǵan kor­rýp­sııaǵa qarsy saıasat iske asyrylýda. Maqsaty – onyń saldarymen kúresý emes, alǵysharttaryn joıý.

Sheneýniktermen tikeleı baılanysty boldyrmaý úshin memlekettik qyzmetterdiń 78 paıyzy elektrondy túrde kórsetiledi. Bul osy saladaǵy tur­mys­tyq sıpattaǵy jemqorlyq deńgeıin úshten ekige tómendetýge múmkindik berdi. «Memlekettik satyp alýlar portaly» ashylyp, onyń aıasynda barlyq memle­ket­tik satyp alýlar men onyń rásimderi 100 pa­ıyz elektrondyq formatqa kóshirildi.

Qazaqstanda sıfrly úkimet pen elektrondy memlekettik qyz­met­terdi damytý salasy boıynsha qa­byl­danyp jatqan sharalar sybaılas jemqorlyqty meılinshe azaıtýǵa baǵyttalǵan.

Sońynda Memlekettik hatshy Gúlshara Ábdiqalyqova otyrysqa qatysýshylarǵa memlekettik satyp alý salasyndaǵy sybaılas jem­qorlyqtyń aldyn alý jolynda tıimdi dıalog ornatýǵa tilektestik bildirdi, dep habarlady Prezıdenttiń baspasóz qyzmeti.