Vedomstvo basshylarynyń kezdesýindegi quttyqtaý sózinde Qor basshysy Nurtaı Ábiqaev túrik tarapqa sharanyń joǵary deńgeıde uıymdastyrylýyna alǵys aıtyp, atalmysh kezdesý budan bylaıǵy tabysty yntymaqtastyqtyń bastaýy bolatynyna senim bildirdi. Qor Prezıdenti baýyrlas elder arasynda Túrkııa Respýblıkasy mańyzdy, erekshe orynǵa ıe ekendigin alǵa tartty. Oǵan sebep – Túrkııanyń qazaq halqyna tanytqan qonaqjaılyǵy, baýyrlas halqynyń kórshiles eldegi tynysh ómiri men ári qaraıǵy damýyna jasaǵan mol múmkindigi. Sonymen qatar, Nurtaı Ábiqaev Qazaqstan halqynyń Táýelsizdigin eń birinshi bolyp moıyndaǵan da osy Túrkııa Respýblıkasy bolǵandyǵyn erekshe atap ótti.
Kezdesý qorytyndysy boıynsha taraptar dıaspora isterine jaýapty Túrki keńesiniń tórtinshi kezdesýin Qazaqstanda – Túrkistan qalasynda ótkizýdi biraýyzdan maquldady.
Issapar aıasynda qazaqstandyq delegasııanyń Túrkııa Vıse-mınıstri Fýat Oktaımen, Túrkııa Respýblıkasynyń Sheteldegi túrikter men olarǵa baılanysty qaýymdastyqtar jónindegi Tóralqa basshysy Abdýllah Erenmen, Iýnýs Emre Instıtýtynyń dırektory Sheref Ateshpen, Stambul qalasy meriniń birinshi orynbasary Ahmet Selametpen jáne Túrki keńesiniń bas hatshysy Baǵdat Ámireevpen kezdesýleri ótti. Taraptar túrkitildi dıasporalardyń strategııalyq, ekonomıkalyq, mádenı damýyndaǵy ekijaqty jáne kópjaqty seriktestiktiń negizgi máselelerin talqylady. Kelissózderdiń qorytyndysy boıynsha «Otandastar» Qory túrik tarappen seriktestik týraly birqatar kelisimderge qol qoıdy. Atap aıtqanda, Iýnýs Emre ınstıtýtymen qazaq tilin álemniń 60 memleketinde ornalasqan oqý ortalyqtarynda oqytýǵa múmkindik berý týraly bitim jasaldy.
9 qarashada Stambul qalasynda Darhan Káletaev pen Nurtaı Ábiqaev Túrkııa jáne Eýropadaǵy sheteldik qazaq uıymdarynyń Mansur Táıji, Iаkýp Jan, Fazyl Toplý, Ábdýaqap Qara sııaqty beldi ári belsendi basshylarymen kezdesý ótkizdi. Qazaq dıasporalarynyń ókilderi jyraqta júrse de tarıhı otanymen ajyramas baılanysta ekendigin, Qazaqstanda bolyp jatqan barlyq mańyzdy jaıttardan habardar ekendigin jáne óskeleń urpaq týǵan tilin, mádenıetin jáne salt-dástúrin meńgerýde úlken qoldaýǵa ıe ekendigin jetkizdi.
Nurtaı Ábiqaev Túrkııadaǵy qandastarǵa ózi basshylyq etip otyrǵan Elbasy tapsyrmasymen qurylǵan «Otandastar» Qorynyń maqsat-mindetterin tanystyrdy. Qor basshysynyń aıtýynsha, birlestiktiń qyzmeti syrttaǵy baýyrlar men shetelden tarıhı Otanyna oralǵan qazaqtarǵa jan-jaqty qoldaý kórsetýge baǵyttalǵan. Qordyń basty mindeti – Qazaqstanǵa kelgen etnıkalyq qazaqtardyń beıimdelýi men kirigýine járdemdesip, olarǵa aqparattyq, uıymdastyrýshylyq, konsýltasııalyq kómek kórsetý, sonymen birge, alys-jaqyn shetelderdegi qazaq dısaporalarymen mádenı, iskerlik baılanysty saqtaý jáne damytý, dedi Nurtaı Ábiqaev.
Qordyń alǵashqy resmı sharasy – 7 qarashada Astana qalasynda shetelde turatyn otandastarymyzdyń qatysýymen ótken «Qasıetti qazaq eli» halyqaralyq óner festıvali. Sharaǵa Fransııa, Germanııa, Qytaı, Reseı, Mońǵolııa, Túrkııa, Iran, О́zbekstan, Qyrǵyzstan jáne Aýǵanstan qatarly alys-jaqyn shetelderden 50-den astam ónerpaz qatysty. Jaqyn arada Qor shetelderde turatyn aǵaıyndardyń Qazaqstannyń qasıetti jerlerine tanymdyq ekskýrsııasy men Reseı Federasııasynda Dúnıejúzi qazaqtarynyń kishi quryltaıyn ótkizýdi josparlap otyr.
