«Mitsubishi Asian Children’s Enikki Festa» festıvali 1990 jyldan bergi aralyqta «Mitsubishi» korporasııasynyń qoǵamdyq baılanys jónindegi komıtetiniń qoldaýymen Japonııa Ulttyq IýNESKO Assosıasııalarynyń Federasııasymen jáne Azııa-Tynyq muhıty aımaǵy IýNESKO Klýbtary jáne Assosııalarynyń Federasııasymen birlese ótkizilip keledi. Qazaqstandyq Ulttyq IýNESKO Klýbtarynyń Federasııasy QR IýNESKO jáne ISESKO isteri jónindegi Ulttyq Komıssııasy jáne Almaty qalasyndaǵy IýNESKO Klasterlik Bıýrosy qoldaýymen 10 jyl boıyna atalmysh jobanyń elimizdegi uıymdastyrýshysy bolyp keledi.
Al festıvaldiń maqsaty «Bul – meniń ómirim» taqyrybyndaǵy sýretti kúndelikterdi jasaý arqyly balalar arasynda mádenıetaralyq túsinistikti qalyptastyrý ári saqtaý bolyp tabylady. Jobanyń alǵashqy kúninen bastap 6 –12 jas aralyǵyndaǵy 700 000-nan astam Azııa elderiniń jas sýretshileri qatysty.
Bıylǵy jylǵy 13 sıkldiń ótýine T.Júrgenov atyndaǵy Qazaq ulttyq óner akademııasy seriktes retinde óz úlesin qosty. Azııa-Tynyq muhıty aımaǵynyń 24 elinen kelgen qatysýshylar ózge elderdiń tarıhy, mádenıeti jáne salt-dástúrimen tereńirek tanysýǵa múmkindik aldy.
Júırikterdiń ishinde ozyq shyqqan 12 jasar Sáýle Ýbaıdýlla halyqaralyq ádil-qazylar alqasynyń sheshimimen Gran-prı ıegeri atandy. Ol Shymkent qalasy Balalar kórkemsýret mektebi – IýNESKO Klýbynyń oqýshysy, osy jyldyń shilde aıynda Japonııada ótken halyqaralyq marapattaý rásimine qatysty. Kórme qonaqtary Bangladesh, Býtan, Brýneı-Darýssalam, Vetnam, Úndistan, Indonezııa, Kambodja, Qytaı, Koreıa, Laos, Malaızııa, Maldıvy, Monǵolııa, Mıanma, Nepal, Pákistan, Sıngapýr, Qytaılyq Taıbeı, Taıland, Tımor-Leste, Fılıppın, Shrı-Lanka jáne Japonııa elderinen joba jeńimpazdarynyń jumystaryn tamashalady.
T. Júrgenov atyndaǵy Qazaq ulttyq óner akademııasynda 12–23 qarasha kúnderi kelýshiler kórme ekspozısııalaryn tamashalaı alady.
Elvıra Serikqyzy,
«Egemen Qazaqstan»
ALMATY
