Basqosýda halyqty jumyspen qamtý salasyndaǵy zańdylyqty saqtaýǵa, sondaı-aq ınfraqurylymdyq damýdyń «Nurly jol» memlekettik baǵdarlamasyn júzege asyrýǵa bólingen qarajatty paıdalaný tıimdiligine qatysty qabyldanyp jatqan sharalar talqylandy.
Otyrysta Bas prokýratýra, Memlekettik qyzmet isteri jáne sybaılas jemqorlyqqa qarsy is-qımyl agenttigi, Investısııa jáne damý, Eńbek jáne halyqty áleýmettik qorǵaý mınıstrlikteri basshylarynyń baıandamalary tyńdaldy.
Jıyndy ashqan Gúlshara Ábdiqalyqova Memleket basshysy Nursultan Nazarbaevtyń bıylǵy 7 qarashada ótken Qaýipsizdik keńesiniń otyrysynda sybaılas jemqorlyqpen belsendi kúres jalǵasa beretinin, halyq qarajattyń qaıda jáne qandaı maqsatqa jumsalǵanyn bilýge tıis ekenin aıtqanyn eske saldy.
Halyqty jumyspen qamtamasyz etý máselesi – memlekettiń áleýmettik saıasatynyń negizi. Jumyspen qamtý isine qoldaý kórsetý maqsatymen qabyldanǵan keshendi baǵdarlamalar eńbek naryǵynda turaqtylyqty saqtaýǵa jáne daǵdarys kezeńderiniń keleńsiz saldaryn jumsartýǵa septigin tıgizdi.
Baǵdarlamalardy qarjylandyrýǵa aıtarlyqtaı memleket qarajaty bólinýde. Sonymen birge, 2016 jyldan beri antıkorrýpsııalyq qyzmet 194 qylmysty tirkep, 32 adam sottaldy. Zań buzý jaıttary negizinen jumysqa turý faktileriniń jalǵandyǵymen, bıýdjet qarajaty men berilgen shaǵyn nesıelerdiń maqsatyna saı jumsalmaýymen baılanysty bolyp otyr.
G.Ábdiqalyqova sybaılas jemqorlyq qaterlerin azaıtatyn tıimdi tetikterdi engizý qajettigin aıtty.
Sondaı-aq, quqyq qorǵaý jáne baqylaý organdarynyń ókilderi Komıssııa múshelerine qarjylandyrý kólemi 3 trıllıon teńgeden asqan «Nurly jol» ınfraqurylymdyq damý memlekettik baǵdarlamasyn iske asyrýǵa baılanysty kóptegen zań buzýshylyqtar anyqtalǵany jóninde málimdedi. Baǵdarlama júzege asyryla bastaǵaly sotqa deıingi 120 tergeý amaly júrgizilip, 48 adam sottalǵan. Memlekettik aýdıt organdary jalpy quny 48 mıllıard teńge bolatyn zań buzý jaıttaryn anyqtaǵan.
Memlekettik hatshy sybaılas jemqorlyqty azaıtý úshin jergilikti jerlerde árbir ınvestısııalyq jobanyń júzege asyrylýyn qamtamasyz etip, elektrondyq resýrstar múmkindikterin keńinen qoldaný mańyzdy ekenin atap ótti.
Talqylaý qorytyndysy boıynsha Komıssııa ókiletti memlekettik organdarǵa anyqtalǵan zań buzý jaıttaryn joıý úshin naqty sharalar qabyldaý jóninde tapsyrma berdi.
