Qaısar Álim 55 jyl boıy qazaq jýrnalıstıkasynyń qazanynda qaınady, sonyń ishinde «Egemen Qazaqstanda» da qyzmet etti, ádebı shyǵarmalary da oqyrmanyn tapty. Qaısardyń qazaq ádebıetindegi qarymdy qalamger Ázilhan Nurshaıyqovpen 34 jyl boıy jazysqan hattary epıstolıarlyq janrdaǵy eleýli shyǵarma bolyp tabylady. Sonymen qatar ol – jýrnalıstıka kózmaıyn taýysyp oqýdy, mańdaıterin súrtip júrip jazýdy qajet etetin mamandyq ekenin zamandastaryna dáleldegen, eńbekqorlyǵy keıingige úlgi bolatyn qalamger.
Keshte aldymen Qaısar Álim týraly arnaıy jasalǵan derekti fılm kórsetildi. Qostanaı oblysy Mádenıet basqarmasynyń basshysy Erlan Qalmaqov qalamgerdi quttyqtap, ıyǵyna shapan japty. Arqalyq qalasy, Amangeldi, Jankeldın aýdandary ákimshilikteriniń ókilderi de qalamgerge týǵan jerdiń sálemin jetkizdi.
Osy keshke arnaıy kelgen belgili ekonomıst ǵalym, professor Saılaý Baızaqov inisine rııasyz tilegin aıtsa, aqyn Qorǵanbek Amanjol Qaısar Álimniń shyǵarmalaryna arnaıy toqtaldy.
– Mirjaqyptyń súıegin alyp kelýi, Keıki batyrdyń bas súıegin ákelýge qatysýy sııaqty qoǵamdyq-azamattyq isterdi atqara júrip, ony móldirete jazyp, oqyrmanǵa jetkizýin, basqa pýblısıstıkalyq, ádebı shyǵarmalaryn bylaı qoıǵanda, Ázilhan Nurshaıyqovpen 34 jyl udaıy hat jazysýy – úlken eńbek, qazaq ádebıetinde epıstolıarlyq janrdy Qaısekeń shegeledi deýge negiz salady, – dedi Qorǵanbek Amanjol.
Munan keıin sóz alǵan Qaısar Álimniń qostanaılyq áriptesteri, aqyn Jolbarys Baıazıd, jazýshy Ǵumar Ahmetchın jáne taǵy basqalar onyń pýblısıstıkasy men mańyzy joǵalmaıtyn, ýaqyt shejiresi bolyp qalatyn shyǵarmalarǵa joǵary baǵa berdi.
Kesh sońynda Qaısar Álim ózin qalamger retinde qanattandyrǵan Qostanaıǵa kelip, jerlesterimen qaýyshqanyna, mereıtoıyna oraı oqyrmandarymen kezdeskenine rızashylyǵyn bildirdi. Qazaqqa iri aqyndar men ǵalymdardy bergen qutty jer – Qyzbeli týraly tebirene sóıledi. Júreginde týǵan jerge degen mahabbatty alaqanynda aıalaǵan shyraqtaı sóndirmeı ustaý adam rýhynyń joǵarylyǵy men tazalyǵyn bildirse kerek. Al 1965 jyly jas Qaısar kúndeliginiń birinde: «Bir túsinetinim – saǵynysh degen jan derti eken, sol dertti shaqyratyn ańsarly aýylyń eken. Ie, Jaratylysy bólek aýylym meniń!» dep jazypty.
– Týǵan jer degende aldymen Qyzbeldi aıtamyn. Qostanaıda qansha aýyl bar, sonyń birindeı ǵana kishkene meniń Qyzbelimnen Alashtyń qanshama arystary túlep ushqan. Mirjaqyp Dýlatov, Seıdázim Qadyrbaev, Álmaǵambet Qasymov, Asqar Zakarın, álemge belgili akademıkter Fazylhan Báıimbetov, Saılaý, Sábıt Baızaqovtar – meniń aýylymnyń máńgi maqtanyshtary! Men Qostanaı óńirinde bolyp jatqan jańarý, rýhanı jańǵyrýlarǵa, oblys ákimi Arhımed Muhambetovtyń basshylyǵymen sońǵy jyldary júzege asyp jatqan ekonomıkalyq tabystarǵa qýanamyn. Sizdermen qaýyshý qalamger úshin baqyt, sony men de sezinip turmyn», dedi qalamger jerlesterine.
Keshti oblystyq fılarmonııanyń ánshileri Manapbek Qadirov pen Talǵat Moldaǵalıev ánmen órnektep otyrdy. I.Omarov atyndaǵy qazaq drama teatrynyń ártisteri Qaısar Álim shyǵarmalarynan úzindiler oryndady.
Názıra JÁRIMBET,
«Egemen Qazaqstan»
QOSTANAI
