2019 jyldyń 8 naýryzynda týǵanyna 100 jyl tolatyn áıgili aktrısanyń mereıtoıyn toılaý men ǵıbratqa toly ǵumyryn eske alý sharalaryn IýNESKO kóleminde atap ótý týraly sheshim qabyldandy. Osyǵan oraı jańa jyldyń basynan-aq Mádenıet jáne sport mınıstrliginiń qoldaýymen el tarıhynda tuńǵysh ret teatr jáne kıno salasy ártisin eske alýǵa baǵyttalǵan mádenı is-sharalardyń IýNESKO kóleminde uıymdastyrylýy josparlanýda.
О́z dáýirinde sahnanyń sańlaǵy, ekrannyń erkesi atanǵan Ámına Erqojaqyzy óner jolyn Shymkent teatry sahnasynan bastap, 1949 jyldan ómiriniń sońyna deıingi jarty ǵasyrdan astam ǵumyryn Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń órkendeýine arnady. Kóptegen kınofılmder men teatr qoıylymdaryndaǵy talǵampaz beıneleri arqyly halyq júreginen óshpes oryn aldy.
Qalyń kórermen esinde sahna men ekranda keskindegen qaıtalanbas analar obrazy galereıasyn jasaǵan jarqyn beınesi arqyly saqtalǵan óner ıesiniń shyǵarmashylyǵy shynaıylyǵymen qundy. 70 jylǵa jýyq sahnalyq ǵumyrynda bir-birine uqsamaıtyn oıly da mazmundy 150-den asa róldiń avtory atanyp, beınelilik bıiginen kóringen aktrısanyń óner áleminde órnektegen ónegeli joly qaı kezde de kórýshisin beı-jaı qaldyryp kórgen emes. Ańyz aktrısanyń ǵasyr toıynyń IýNESKO kóleminde toılanýy jónindegi ıgi bastama – ulttyq ónerimizdiń jaryq juldyzy qurmetine jasalǵan máńgilik eskertkish dep bilemiz.
Nazerke JUMABAI,
«Egemen Qazaqstan»
