Sessııada sekretarıat meńgerýshisi – Qazaqstan halqy oblystyq assambleıasy tóraǵasynyń orynbasary Bıbigúl Aqqojına jyl boıy atqarylǵan jumystarǵa sholý jasady. Ol aldymen Elbasy Nursultan Nazarbaevtyń jaqynda ǵana jarııalaǵan «Uly dalanyń jeti qyry» maqalasyna toqtalyp ótti.
«Uly dalanyń jeti qyry» atty maqalasynda Nursultan Nazarbaev ár qazaqstandyq úshin baǵdar, temirqazyq etip ustanar tulǵalardy atap aıtty. Ol – Altyn adam,Jibek joly, Kúltegin, er júrek Beıbarys, dana Táýke han, uly Abaı. Jupar ıisti alma men qyrdy japqan qyzǵaldyqtyń ómirmen tonnyń ishki baýyndaı úılesýi uly dala halqy óı-órisiniń irgetasyn qalady» dedi Bıbigúl Búrkitqyzy. Qazaqstan halqy oblystyq assambleıasy óńirdegi yntymaqtyń, birliktiń otaýy sekildi. Ol jyl táýliginde 142 iri sharalar ótkizdi. Onyń ishinde osy óńirde turyp jatqan túrli ulystardyń ulttyq dástúrleri men halyqtyq merekelerine arnalǵan sharalar barlyq qostanaılyqtardy úıirip, yntymaqty arttyra tústi.
Oblystyq assambleıanyń ǵylymı zııaly qaýym ókilderinen turatyn ǵylymı-saraptama tobynyń ókilderi óńir turǵyndarymen jıi kezdesýler jasap, Elbasynyń syndarly saıasatyn, baǵdarlamalaryn túsindiredi. Halqymyzdyń jáne óńirdi meken etken ulystar dástúr-salttaryn, salaýatty ómir saltyn nasıhattaıtyn túrli festıvalder ótti. Analar keńesi oblys óńirinde otbasylyq qundylyqtardy saqtaý baǵytynda kóptegen ıgi sharalar ótkizip otyrady.
Qostanaı oblysynda 250 qoǵamdyq kelisim keńesi jumys isteıdi. Bıyl ǵana 2001 shara ótkizdi. Keńes tóraıymy Aleksandra Sýslova bul qoǵamdyq uıym áleýmettik baǵdarlamalardy, olardy júzege asyrýda qoǵamdyq belsendilik pen bastamalardy barynsha qoldap otyratynyn tilge tıek etti. Qoǵamdyq kelisim keńesiniń músheleri qoǵamdaǵy máseleniń eshqaısysyna usaq-túıek dep qaramaıdy.
Oblys ákimi Arhımed Muhambetov sessııany qorytyndylap, Qazqstan halqy oblystyq assambleıasynyń barlyq jumysy qoǵamdaǵy yntymaqqa jáne Elbasy bastamalary men baǵdarlamalarynyń tıimdi júzege asýyna qyzmet etetinin aıtty.
Názıra JÁRIMBET,
«Egemen Qazaqstan»
Qostanaı
