Eń aldymen «Aqsaıgazservıs» aksıonerlik qoǵamy kásiporyndaǵy jalaqysy tómen qyzmetkerleriniń eńbekaqysyn 20%-ǵa kóterý týraly sheshim qabyldady.
Qarashyǵanaq kenishinde, sondaı-aq Qashaǵan, Shynar (Chınarev) jáne Teńiz ken oryndarynda munaı men gazdy óndirý, óńdeý jáne tasymaldaý nysandaryn jaılastyryp, joǵary tehnologııalyq servıstik qyzmet kórsetetin «Aqsaıgazservıs» kompanııasynda 1800 adam qyzmet etedi. Bul – Batys Qazaqstan oblysyndaǵy eń iri jergilikti 100% qazaqstandyq kompanııa.
- Aksıonerlik qoǵam basshylyǵy men aksıonerleri Memleket basshysynyń bastamasyn tolyǵymen qoldaıdy. Kásiporynda salystyrmaly túrde tómen jalaqy alatyn 327 qyzmetkerdiń jalaqysyn bıyl qarasha aıynan bastap-aq kóterýge sheshim qabyldandy. Bul úshin kásiporyn bıýdjetinen qosymsha aıyna 3,5 mln teńgeden astam qarajat bólindi. Sóıtip «Aqsaıgazservıs» AQ jylyna 41 mln teńgeden astam qarajatty jalaqy ósirýge jumsaǵaly otyr, – deıdi kásiporynnyń kásipodaq uıymynyń tóraǵasy О́tepbergen Qabıev.
О́ńirdegi «Gıdroprıbor» AQ, «Stroıkombınat», «Oral mehanıka zaýyty», «Jaıykagro-LTD» JShS, «Ýralskagroremmash», «Nurjanar» aksıonerlik qoǵamdary, «Steklo Servıs», «Kazarmaprom», «TMK-Kaztrýbprom», «Aıaz», «Kvant» jaýapkershiligi shekteýli seriktestikteri de óz qyzmetkerleriniń jalaqysyn ósirip, tabys pen turmys saparyn arttyrýǵa den qoıǵan. Bul atalǵan kásiporyndarda 2019 jyldyń 1 qańtarynan bastap jalaqy kóterilip, eń tómengi jalaqy mólsheri 60 myń teńgeden joǵary bolmaq.
– Jańa jyldan bastap «Kvant» JShS-daǵy eń tómengi jalaqy mólsheri 61 myń teńge bolady. Biz memlekettik qoldaý arqyly korpýsty jıhaz jasaıtyn jańa fabrıka ashyp otyrmyz. Sehtarymyz eń zamanaýı jabdyq sanalatyn germandyq «Homag», ıtalııalyq «Griggio» quraldarymen jaraqtanǵan, – deıdi kásiporyn basshysy Dmıtrıı Pshenıchnyı.
Oralda jún óńdep, pıma, kıiz sekildi túrli buıym shyǵaratyn «Aıaz» kompanııasy eń kóne óndiris oryndarynyń qatarynda. Qys jaqyndap, kún sýytqanda «Aıazdyń» ónimine suranys ta artady. Aıta keteıik, «Aıaz» kásiporny búginde metall «súıekti» kıiz úı, joryq lashyqtary, saýda qatarlary, munaı-gaz, agrosektor, tótenshelikter, t.b. sala qyzmetkerleri úshin arnaıy kıimder shyǵaryp, kópshilik kóńilinen shyǵyp júr.
– Biz halyqtyń ál-aýqatyn arttyrý týraly Elbasy bastamasyn tolyǵymen qoldaımyz. О́z tarapymyzdan búginde 38 myń teńge jalaqy alyp júrgen 26 qyzmetkerimizdiń aılyq tabysyn 60 myń teńgege kóterýge sheshim qabyldap otyrmyz. Kórip otyrǵandaı, jalaqy eki esege jýyq kóterilmek, – deıdi kompanııa dırektory Amangeldi Ermekqalıev.
Qazbek QUTTYMURATULY,
«Egemen Qazaqstan»
