«Qazaqstan táýelsizdik alǵaly beri búkil salalarda kóp jetistikterge qol jetkizdi. Solardyń ishindegi mańyzy óte zor úsh strategııalyq bastama týraly aıtyp bereıin. Táýelsizdik jyldarynda qabyldanǵan strategııalyq mańyzy zor bastamalardyń biri – Elbasynyń tikeleı tapsyrmasymen qurylǵan «Bolashaq» baǵdarlamasy», dedi M.Áshimbaev NurOtan Talks alańy barysynda.
Partııa Tóraǵasynyń birinshi orynbasarynyń aıtýynsha, «Bolashaq» stıpendııasy – Prezıdent N.Nazarbaevtyń el keleshegine salǵan ınvestısııasy.
«25 jyldyń ishinde 13 myńnan astam Qazaqstan azamaty sheteldiń eń myqty ýnıversıtetterinde bilim alyp, elge oralyp, qyzmet etip júr. Bul bastamany ınvestısııa retinde qaraımyz. О́ıtkeni onyń jaqsylyǵy men nátıjesi uzaq merzim ishinde ǵana kórinedi», dedi «Nur Otan» partııasy Tóraǵasynyń birinshi orynbasary.
M.Áshimbaevtyń sózine qaraǵanda, «Bolashaq» baǵdarlamasy 25 jyldan keıin ǵana óz jemisin bere bastady. Sonyń nátıjesinde stıpendııa túlekteriniń aldy búginde mınıstr, ákim laýazymyn atqaryp, elge qyzmet atqaryp keledi. Sondaı-aq ol «Bolashaq» stıpendııasynyń túlekteri sany keleshekte kóbeıetinine senim bildirdi.
«Qazirgi tańda álem tórtinshi revolıýsııalyq dáýirde ómir súrip jatyr. Bul kezeńniń ereksheligi – memleketterdiń negizgi baılyǵy shıkizaty men mıneraldy resýrstary emes, sol eldiń azamattary. Sondyqtan «Bolashaq» baǵdarlamasy eldiń keleshegine jumys isteıtin Elbasynyń eń úlken baǵdarlamarynyń biri dep aıtýǵa tolyq negiz bar», dedi M.Áshimbaev.
Aıta ketý kerek, Astanada «Nur Otan» partııasynyń uıymdastyrýymen NurOtan Talks alańy ótip jatyr. Jıynǵa partııa Tóraǵasynyń birinshi orynbasary Máýlen Áshimbaev, Halyqaralyq Túrki akademııasynyń Tóraǵasy Darhan Qydyráli, «Meıirim» qaıyrymdylyq qorynyń dırektory Arýjan Saın, «Ulttyq ǵylymı kardıohırýrgııa ortalyǵy» AQ Basqarma Tóraǵasy Iýrıı Pıa qatysýda.
Abaı ASANKELDIULY,
«Egemen Qazaqstan»
