Aıagóz qalasyndaǵy kezdesýge aqsaqaldar, mektep dırektorlary, ustazdar men sportshylar, dárigerler qatysty. Kezdesýdi Aıagóz aýdany ákiminiń orynbasary Bolat Súleımenov ashyp, aýdan turǵyndary gazet-jýrnaldarǵa jazylýda belsendi ekendigin atap ótti. «Qazaq basylymdaryn bólip-jarmaı múmkindiginshe bárine jazylýǵa tyrysamyz. О́ıtkeni, gazet ózimiz úshin kerek. Aýdanymyzda el gazeti - «Egemen Qazaqstannyń» oqyrmandary kóp. El qyzyǵa oqıdy. Gazet kóktemgi sý tasqyny kezinde jurtty der kezinde aqparattandyryp otyrdy. Ol úshin árıne alǵysymyzdy bildiremiz», - dedi ol.
Muǵalimdi qınamaı-aq mártebesin kóterýge bolmaı ma?
Kezdesýde sóz alǵan Muqan Balabekov aqsaqal 48 jyl mektepte jumys istegenin, bilim salasyna qatysty jańalyqtarǵa árdaıym eleńdep otyratynyn, gazette kelesi jyly qabyldanatyn «Pedagog mártebesi týraly» Zańǵa baılanysty maqalalardy oqyp júretinin aıtyp, basylym betinde muǵalimder jaıynda únemi, dúrkin-dúrkin jazsańyzdar degen tilegin jetkizdi. Burynǵy pedagog sonymen qatar 6 qarashada «Egemende» jaryq kórgen «Shahıd keshti Shoqanyń» atty maqaladaǵy dańqty tulǵanyń ólimine qatysty derekter ózin bir jaǵy qyzyqtyrǵanyn, ekinshi jaǵynan ártúrli oıǵa qaldyrǵanyna toqtalyp, «aldaǵy ýaqytta osy taqyrypta jýrnalıstik zertteýler bola ma?» dep ózimizge suraq qoıdy. Sóz arasynda Aıagózde qysqy sporttyń kesheýildep jatqanyn da tilge tıek etti. Aýdan ákiminiń orynbasary aqsaqalǵa sol jerde birden jaýap berip, qazir aýdanda qysqy sportty damytý qolǵa alynyp jatqanyn, mektepterge shańǵylar satyp alynǵanyn, qalada Hokkeı modýlin salý úshin jobalyq-smetalyq qujat ázirlengenin, Elbasy Joldaýy aıasynda úsh myńǵa jýyq halqy bar Aqtoǵaıǵa da Sport modýlin salý jóninde mınıstrlikke usynys jiberilgenin aıtty.
Qazaq basylymdaryn jibermeı oqıtyn Kókenaı aqsaqal: «Gazette dúnıeden ótken tulǵalar jaıynda kóbirek jazylsa. Bıyl Tarbaǵataı atty memlekettik saıabaq quryldy. Buǵan Aıagóz aýdanynyń da keıbir jerleri kiredi. Mektepte balalarǵa óńirimizde ósetin ósimdikter, mekendeıtin janýarlar men ańdar týraly oqytsaq, bolmasa, sony gerbarıı arqyly kórsetsek» dep óz usynysyn bildirdi.
Aıagóz qalasyndaǵy №9 mekteptiń dırektory Qarlyǵash О́zbekova sózin kóp muǵalimderdiń oıynda júrgen bilim salasyndaǵy keleńsizdikterden bastady.
«Keıde osyndaǵy áriptesterimizben bas qosyp, oqýlyqtarda ketip jatqan qatelerdi talqylaımyz. Sosyn otyryp, tıisti usynystarymyzdy jazamyz. Sol usynystarymyzdy birer márte Bilim jáne Ǵylym mınıstrligine jiberdik. Biraq usynystarymyz eskerilmedi. «Pedagog mártebesi týraly» zańǵa baılanysty da usynys-pikirlerimiz bar. Zańnyń jobasyn kórdik. Qoldaıtyn dúnıeler óte kóp eken. Sonyń biri - sanattardy alyp tastaý jónindegi usynys. Shynymen de, bul – ózekti másele. Qazir birneshe jyldan beri jumys istep kele jatqan muǵalimderdi jastar orap alyp ketip jatyr. О́ıtkeni, olar jańa tehnologııalardy meńgergen. Búginde mektepterdegi myqty-myqty degen matematıkterdiń testterden óte almaı jatqanyn estip jatyrmyz. Bul júıkege salmaq túsiredi. Muǵalimderge osyndaı testterdiń qajeti qansha? Muǵalimdi qınamaı-aq mártebesin kóterýge bolmaı ma? О́zim de mektep dırektorymyn ǵoı. Alatynymyz – 93 myń teńge.
Moınymyzda jaýapkershilik kóp, zil batpan. Endi dırektorlar da test tapsyrady dep jatyr. Sanatqa qatysty aıtarym, muǵalimder bes jyl saıyn sanatyn kótermeı-aq daıyndap shyǵarǵan oqýshylarynyń deńgeıine qaraı olardyń jalaqylaryna nege ústemaqy qosyp otyrmasqa?! Máselen, oqýshysy aýdandyq jarysta top jarsa jalaqysyna 1 jyl boıy aı saıyn 10, al eger oblysqa shyǵarsa 30 myń teńgeden qosylyp otyrsa, muǵalim yntalanar edi. Jumysqa qulshynysy artar edi», dep sózin usynyspen aıaqtaǵan ustaz qazir «Egemen Qazaqstan» gazetinde latyn qarpinde jarııalanyp jatqan maqalalardyń jańa álipbıdi úırenem deýshilerge sep bolyp júrgenin aıtty. «Oqýshylar, qarapaıym turǵyndar latyn qarpin qalaı úırenedi degen ishteı qaýpim bolýshy edi. Qazir biz de úırenip jatyrmyz. Sizderdiń bastaǵan jumystaryńyz qýantarlyq jaǵdaı», - dedi mektep dırektory.
Aıagózde jaryq kóretin «Móldir Sana» gazetiniń bas redaktory, belgili jýrnalıst Baqytómir Shalǵynbaı óz sózinde jaqynda «Egemen Qazaqstanda» jarııalanǵan Elbasynyń «Uly dalanyń jeti qyry» maqalasyn tushyna oqyp shyqqanyn aıtty. «Halyqtyń sanasyn kótermeı eshteńe bolmaıdy. О́ıtpeseń, altynnyń ústinde otyrsań da ash bolasyń. Másele – qazaqtyń rýhyn kóterýde. «Egemende» shyǵatyn maqalalardy únemi oqyp júremiz. Úlgi alǵanbyz, áli de úlgi ala beretinimiz anyq. Muǵalimderdiń máselesin kóterip jatyrsyzdar. Áli de kótere berseńizder degen tilegimiz bar. Ásirese aýyldaǵy, shaǵyn qalalardaǵy muǵalimder týraly kóbirek jazsańyzdar, maqalasyn bassańyzdar jaqsy bolar edi», - dedi. Aýdandyq «Aıagóz jańalyqtary» gazetiniń bas redaktory, aqyn Ermek Daıyrbaev «Egemende» elimizge, oblysqa qatysty jaǵymdy jańalyqtarmen qatar úlken problemalyq maqalalarǵa da oryn beriletinin atap ótip: «Gazetke jazylý ózimiz úshin kerek, qazaq gazeti qazaqqa ǵana kerek. Rýhanııatymyzdy kóterý úshin qajet» dep jurtshylyqty qazaq basylymdaryna jazylýǵa shaqyrdy.
Úrjarǵa úlken sport kesheni kerek
«Egemen Qazaqstan» gazetine eń kóp jazylatyn aýdan – Úrjarda ótken kezdesýge muǵalimder men aqsaqaldar, jastar, sportshylar qatysty. Oqyrmandarmen júzdesý sharasyn ashqan Úrjar aýdany ákiminiń orynbasary Serik Sádýaqasov aýdan qazaq gazetteriniń bárine jazylatynyna toqtalyp, Memleket basshysynyń «Uly dalanyń jeti qyry» maqalasynyń mán-mańyzyn tilge tıek etti. «Elbasynyń maqalasy bizdiń aýdanǵa da qatysty dep oılaımyz. Birneshe jyl buryn aýdan aýmaǵynan «Úrjar hanshaıymy» tabyldy. Almanyń atasy – Sıvers almasy da bizdiń Tarbaǵataı taýynda ósedi. Ulttyq ónerimiz – búrkitshilikti nasıhattap, oblysymyzda qyran ustap otyrǵan jalǵyz aýdan – Úrjar. At qulaǵynda oınaǵan jigitterimiz de jeterlik», - dedi aýdan ákiminiń orynbasary.
Kezdesýde sóz alǵan Abylaı han atyndaǵy mekteptiń dene shynyqtyrý pániniń muǵalimi Serik Jeksenbaev Úrjar aýdanynyń sportshylarynyń jetistikterin sóz etse, osyndaǵy sport mektebiniń muǵalimi Arman Jumabekov aýdanda sport zaldary jetispeıtinin jetkizdi. Jattyqtyrýshynyń bul sózin aýdandyq sport bóliminiń basshysy Sársenhan Qabdoldanov ta quptaıdy. «Sport zaldary jetpegennen keıin jattyqtyrýshylar amalsyzdan ózderi jattyqtyratyn balalardy mektepterge aparýǵa májbúr. Sondyqtan Shalqar Jolamanov, Almat Kebisbaev, Erlan Serikjanov syndy balýandardy túletken, Oksana Iаskaıa, Erdos Ahmadıev, Dıas Keneshov sekildi shańǵy sheberlerin shyǵarǵan aýdanǵa úlken sport kesheni salynsa degen tilegimiz bar. Muny Sport jáne Mádenıet mınıstrligine aıtsaq: bir Olımpıada júldegeri shyǵý kerek deıdi. Olımpıada júldegerin qashanǵy kútip otyramyz?» deıdi sport bóliminiń basshysy.
«Azamat QASYM,
«Egemen Qazaqstan»
Shyǵys Qazaqstan oblysy
