Qazaqstan Prezıdenti táýelsizdiktiń 27 jyly ishinde memleketimiz óziniń damý jolynda zor jetistikterge jetkenin atap ótti.
– Bul – qyran qustaı erkindikke umtylǵan halqymyzdyń ǵasyrlar boıǵy asyl armany oryndalǵan kún. Táýelsizdik – júregi elim dep soqqan árbir qazaqstandyq úshin asa qadirli, aıryqsha ardaqty uǵym.
«Adam baqytty ómir súrýi úshin, onyń táýelsiz Otany bolýy qajet» degen danalyq sóz bar. Búkil halqymyz aqsarbas aıtyp, egemendik baıraǵyn kókte jelbiretkenine, mine, 27 jyl tolyp otyr. Osy ýaqyt ishinde Qazaqstan tamyryn tereńge jaıyp, órisin keńeıtip, kemeldene tústi. Synaǵy kóp syndarly kezeńnen súrinbeı ótip, mártebesi bıik, tuǵyry berik, mereıli memleketke aınaldyq, – dedi Elbasy.
Budan ári Elbasy egemen elimizdiń qurylý tarıhynda Qazaqstannyń jas astanasynyń mańyzdy ról atqarǵanyna aıryqsha toqtalyp:
– Eýrazııanyń júreginde ornalasqan jańa elorda jańǵyrǵan Qazaqstannyń sımvoly sanalady. Bıyl Astanamyzdyń 20 jyldyǵyn elimizdiń barlyq óńirimen birge joǵary deńgeıde atap óttik. Bul mereıtoıǵa elimizdiń barlyq óńirleri atsalysyp, shaharymyzdyń kórkeıe túsýine zor úles qosty, – dedi.
Sonymen qatar osynaý jyldar ishinde tatýlyq pen kelisimdi basty ustanym etken syndarly saıasattyń arqasynda Qazaqstannyń yntymaq-birligi jarasqan elge aınalyp, álem elderi aldynda bedeli arta túskenin atap ótti.
HHI ǵasyrdyń ekinshi onjyldyǵynda Qazaqstan jańa belesterdi baǵyndyrýǵa kiristi. Bıylǵy qańtar aıynda Birikken Ulttar Uıymynyń Qaýipsizdik Keńesine tóraǵalyq etýimiz – sonyń aıqyn dáleli. Qazaqstan eki jyl boıy osy Keńestiń turaqty emes múshesiniń mártebeli mıssııasyn atqaryp keledi, – dedi Nursultan Nazarbaev.
Memleket basshysy Qazaqstanda júrgizilgen aýqymdy naryqtyq reformalar mıllıonnan astam azamattarymyzdyń kásipkerlik qabiletterin ekonomıkaǵa jumyldyrýǵa jol ashqanyn aıtty.
– Ekonomıkany júıeli ındýstrııalandyrý óńdeý ónerkásibiniń úlesin aıtarlyqtaı arttyrýǵa septigin tıgizdi. Búginde mundaǵy ónim kólemi shamamen 9,5 trıllıon teńgeni qurap otyr, – dedi Qazaqstan Prezıdenti.
Sondaı-aq Elbasy kólik-logıstıka ınfraqurylymyna tartylǵan ınvestısııanyń arqasynda Qazaqstan qurlyqtyq mańyzy bar tranzıttik habqa aınalǵanyn atap ótti. Budan soń táýelsizdik jyldary tabysy eń tómengi kúnkóris deńgeıinen tómen turǵyndar sany 15 ese azaıyp, al naqty eńbekaqy 4 ese artqanyn aıtty.
– Egemen Qazaqstannyń basty jetistikteriniń biri – halqymyzdyń sany 18 mıllıonnan asyp, turǵyndardyń ortasha ómir súrý uzaqtyǵy 72,5 jasqa jetýi. Osy mańyzdy jeńisterimiz ben ıgi nátıjelerimiz biz tańdaǵan baǵyttyń durys ekenin rastap otyr, – dedi Memleket basshysy.
Elimizdiń ornyqty damýy jolynda júzege asyrylyp jatqan memlekettik baǵdarlamalar men tyń bastamalarǵa toqtalǵan Elbasy ekonomıkany jańǵyrtýǵa baǵyttalǵan sıfrlandyrý prosesi qarqyndy júrip jatqanyn, halyqtyń ál-aýqatyn jaqsartýdy kózdeıtin «Bes áleýmettik bastama» elimizdiń damýyna oń serpin bergenin atap ótti.
– Bıylǵy qazan aıyndaǵy Joldaýym azamattarymyzdyń turmys sapasyn arttyrý máselesine arnaldy. Jahandyq básekege qabilettilikti qamtamasyz etetin ekonomıkalyq ósimniń ózgeshe modelin qurýǵa qadam bastyq. Qazirgi tańda ulttyq sananyń jańarýyna tikeleı yqpal etetin Úshinshi jańǵyrýdyń máni zor.
Jýyrda jarııalanǵan «Uly dalanyń jeti qyry» atty maqalamda álemdik órkenıetke qosqan úlesimizdi keńinen atap kórsettim, – dedi N.Nazarbaev.
Qazaqstan Prezıdenti 2018 jyly elimizdiń syrtqy saıasatta da, jańǵyrý baǵdarlamalaryn iske asyrý aıasynda da qol jetkizgen basty jetistikterine toqtaldy.
– Bizdiń jaýapty ári syndarly syrtqy saıasatymyz álemdik arenadaǵy óz ornymyzdy aıtarlyqtaı nyqtaı túsýge múmkindik berdi. Qazaqstannyń jemisti bitimgerlik qyzmeti Astanadaǵy Sırııaaralyq kelissózderdiń nátıjeli bolýyna septigin tıgizdi, – dedi Elbasy.
Sondaı-aq Nursultan Nazarbaev «Astana» halyqaralyq qarjy ortalyǵyn, «Astana hab» IT-startaptardyń halyqaralyq tehnoparkin jáne «Jasyl» tehnologııalar men ınvestısııalyq jobalardyń halyqaralyq ortalyǵyn iske qosý jónindegi jumystardyń nátıjelerine nazar aýdardy.
– Qoǵamdaǵy birlik pen kelisim bizdiń barlyq jetistigimizdiń bastaýynda turǵanyn árdaıym este ustaýymyz kerek. Etnosaralyq jáne konfessııaaralyq damýdyń qazaqstandyq modeli búginde halyqaralyq brendke aınaldy, – dedi Memleket basshysy.
Qazaqstan Prezıdenti elimizdegi keıingi bastamalardyń bári turǵyndarymyzdyń turmys sapasyn jaqsartýǵa, qoǵamdyq qaýipsizdikti joǵary deńgeıde qamtamasyz etýge jáne ál-aýqatymyzdy arttyrýǵa baǵyttalǵanyn atap ótti.
– Áleýmettik salany keshendi jańǵyrtý – bizdiń mańyzdy baǵytymyz. Táýelsizdik jyldary mıllıonǵa jýyq azamatymyz baspanaly boldy. Biz jýyrdaǵy 5 jyl ishinde 70 mıllıon sharshy metrden astam turǵyn úı salamyz. Bul shamamen taǵy eki mıllıonǵa jýyq qazaqstandyq baspanaly bolady degen sóz, – dedi Elbasy.
Sóziniń sońynda Nursultan Nazarbaev táýelsiz el turǵyndarynyń qazirgi býyny ýaqyt talabyna saı bolyp, Qazaqstandaǵy árbir otbasynyń ıgiligi men berekesin nyǵaıtýǵa úles qosatynyna senim bildirdi.
Joldybaı BAZAR,
«Egemen Qazaqstan»
