Bul - Atyraý oblysyndaǵy Reseımen aradaǵy shekarada ornalasqan bólimshe. «Qandaı memlekettiń de tynyshtyǵy el mejesin qyraǵy kúzetýde jatyr. Elimizdiń batys qaqpasy sanalatyn bul nysanǵa Er Qosaı batyrdyń aty berilýi – Otan qorǵaýshy shekarashy jastarymyzdyń baba dańqyna kir keltirmeı, jaýapkershilikti sezine bilýlerin de talap etedi» -deıdi Qurmanǵazy aýdany ákiminiń mindetin atqarýshy Jandos Bektemirov.
Bıyl Atyraý shekarasynyń qurylǵanyna 20 jyl toldy. Osy mereıli dataǵa oraı oblysta eki jańa shekara zastavasy ashyldy. Onyń biri oblys ortalyǵynda ornalasqan, al ekinshi zastava Isataı aýdanynda. Zabýryn aýyldyq okrýginde oblys ákiminiń qoldaýymen ashylǵan Qazaqstan Respýblıkasy Ulttyq qaýipsizdik komıteti Shekara qyzmeti Jaǵalaý kúzeti óńirlik basqarmasy 2016 áskerı bólimine qarasty zastavaǵa Isataı batyrdyń esimi berildi. Shekara beketteriniń batyr babalarymyzdyń qurmetterine atalýy qazaq eliniń arystaryn umytpaıtyn, ulyqtaıtyn úrdisiniń kýási ispetti.
Áskerı bólim komandıri Muhtar Qanabekov Kaspıı teńiziniń aýmaǵynda memlekettik shekarany kúzetý tapsyrmasy júktelgen jańa nysannyń iske qosylýy birlesip atqarǵan jumystardyń jemisi ekenin aıtady.
Memleket basshysy «Bolashaqqa baǵdar: rýhanı jańǵyrý» atty baǵdarlamalyq maqalasynda: «Árbir ólkeniń halqyna sýyqta pana, ystyqta saıa bolǵan, esimderi el esinde saqtalǵan birtýar perzentteri bar. Osynyń bárin jas urpaq bilip ósýge tıis» dep atap kórsetken bolatyn. Atyraýdaǵy shekara bólimsheleriniń batyr babalar atyn enshileýi shekara shebinde qaltqysyz kúzette turǵan sarbazdardy otanshyldyq rýhta tárbıelep, keń baıtaq jerimizge qalqan bolǵan qaharmandar qashan da qurmetke ıe ekenin kórsetedi.
Baqytgúl BABASh,
«Egemen Qazaqstan»
ATYRAÝ
