Memlekettik eńbek ınspeksııasy basqarmasy óńirde eń tómengi jalaqy alatyn jumyskerlerdiń eńbekaqysyn kóterý boıynsha monıtorıng jáne túsindirý jumystaryn júrgizip, tekseris nátıjesinde keıbir jumys berýshilerdiń 28-30 myń teńge ǵana aılyq tólep otyrǵany belgili boldy. Jumysshylardyń jalaqysyn kóterýi tıis 13852 kásiporyn anyqtaldy. Olardyń 84,5 prosenti ishki rezervter esebinen 38 myńnan astam jumysshynyń jalaqysyn arttyrýǵa kelisken. Osyǵan oraı jumys berýshilermen 3327 memorandým jasalyp, 928 ujymdyq kelisimshartqa qol qoıyldy.
Aımaq basshysy Qumar Aqsaqalov bıýdjet salasynda 43 myń, naqty sektorda 101 myń adamnyń jalaqysyn kóterý boıynsha josparly jumys júrgizý qajettigin atap aıtyp, tıisti basshylarǵa naqty tapsyrmalar bergen bolatyn. Eńbekaqyny kóterýge baılanysty tıisti sharalardy qoldaný, múmkindikterdi izdestirý arqasynda eńbekaqyny eseleýge nıettiler qarasy molaıdy. «Izolıt» JShS-i elektr oqshaýlaǵysh materıaldar shyǵarýmen aınalysady. Onda turaqty jumyspen 97 adam qamtylǵan. Ortasha jalaqy 100 myń teńgeni quraıdy. Munda byltyr jumysshylardyń jalaqysy 13 prosentke artsa, bıyl taǵy 10 prosentke kóbeıip, 110 myń teńgeni quramaq.
«JBI Edınstvo» jəne «Alıans joly» sııaqty kásiporyndarda 350-ge jýyq adam eńbek etse, olardyń úshten biri eń tómengi jalaqy alady eken. Kásiporyn basshylyǵy Elbasynyń tómengi jalaqyny ósirý jónindegi tapsyrmasyna oraı eń tómengi jalaqyny 58-62 myń, al ortasha jalaqyny 110 myń teńgege deıin arttyrýdy josparlap otyr. Sol sııaqty «Blok» JShS-i de óz qyzmetkerleriniń turmys sapasyn jaqsartý maqsatynda eńbekaqyny arttyrý týraly sheshim qabyldady. «Rızolın» atty elektr oqshaýlaǵysh materıaldarymen tanymal osy attas zaýytta sońǵy úsh jylda eńbekkerlerdiń jalaqysy 30 prosentke artyp, ortasha aılyq jalaqy 120 myń teńgeni quraǵan. Seriktestik aldaǵy ýaqytta jalaqyny taǵy 10-15 prosentke ulǵaıtýdy belgilep otyr.
О́mir ESQALI,
«Egemen Qazaqstan»
Soltústik Qazaqstan oblysy
