Onyń aıtýynsha, Jastar jylynda jáne Aqtóbe qalasynyń 150 jyldyǵyn merekeleý aıasynda óńirde respýblıkanyń ár aımaǵynan, jaqyn shetelderden keletin 200 myńnan astam adamdy qamtıtyn 150 sporttyq shara ótkizilmek.
«Memleket basshysynyń buqaralyq sportty damytý, ásirese aýyldyq jerlerde damytý tapsyrmasy boıynsha 2019 jylǵa arnalǵan oblystyq sporttyq baǵdarlamalardyń josparynda 14-29 jas aralyǵyndaǵy jastardy qamtıtyn QR-nyń Tuńǵysh Prezıdenti – Elbasynyń testterin ótkizý kózdelip otyr. Aqtóbelik jastardyń bos ýaqytyn tıimdi uıymdastyrý maqsatynda 103 oblystyq jarystar, 8 QR chempıonaty, 14 halyqaralyq jáne respýblıkalyq týrnırler, sporttyń ár túri boıynsha 3 keshendi sporttyq sharalar uıymdastyrylady. Naýryz aıynda Aqtóbede júlde qory 1 mln.teńgeni quraıtyn ústel tennısinen «AQTÓBE-2019» ashyq halyqaralyq týrnıri ótedi. Al, mamyr aıynda "AQTÓBE RUN-2019" ashyq respýblıkalyq marafonyn ótkizýdi josparlap otyrmyz», - dedi josparlarymen bólisken basqarma basshysy.
Aqtóbede alǵash ret ótetin respýblıkalyq jazǵy marafon aıasynda Azııa, Afrıka, Avstralııa jáne Amerıkanyń iri shólderin jalǵyz júgirip ótken marafonshy, halyqaralyq dárejedegi sport sheberi master-klass uıymdastyrady.
Sonymen qatar, oblys aýmaǵynda birneshe sport túrinen iri respýblıkalyq jarystar ótedi. Atap aıtqanda, QR H jazǵy ýnıversıadasy, júzýden QR-nyń V spartakıadasy, QR Paralımpıadalyq oıyndary, ulttyq sport túrlerinen respýblıkalyq V festıval ótedi.
«Mamyr aıynda onynshy jazǵy Ýnıversıada aıasynda sporttyń 18 túri boıynsha jarystar ótedi. Oǵan elimizdiń JOO-nyń 9 myńnan astam stýdenti qatysady.Ýnıversıada eki jylda bir ret uıymdastyrylady. Sporttyq jarystardyń qorytyndysy boıynsha QR-nyń stýdenttik quramasy jasaqtalyp, elimizdi Italııadaǵy Dúnıejúzilik Ýnıversıadada tanystyratyn bolady. Maýsym aıynda 600 sportshynyń qatysýymen júzýden QR-nyń V spartakıadasy ótedi, al tamyz aıynda IV Paralımpıada oıyndarynyń myńǵa jýyq qatysýshylaryn qarsy alamyz. Respýblıkanyń ár óńirinen kelgen sportshylar paralımpıadalyq sporttyń 10 túrinen óner kórsetetin bolady», - dedi Meırambek Mahambetov.
Sondaı-aq, aǵymdaǵy jyldyń 18-25 qyrkúıegi aralyǵynda "Uly Dalanyń muragerleri" halyqaralyq forýmy aıasynda ulttyq sport túrlerinen V respýblıkalyq festıval ótkizý josparlanýda. Jarys báıge, kókpar, aýdaryspaq, teńge ilý, toǵyzqumalaq, asyq atý – bes tas, qazaq kúresi, jamby atý, qusbegilik, jekpe-jek sekildi sport túrlerinen ótetin bolady. Oǵan elimizdiń ár óńirinen 2 myńǵa jýyq sportshy jınalady.
