«Osy kúnge deıin bul otbasy páter alý nemese baspanamen qamtamasyz etý boıynsha kezekke turýǵa qatysty eshqandaı ótinish bildirmegen. Olar jergilikti atqarýshy organdarynan da kómek suramaǵan. Kóp balaly otbasy retinde járdemaqy alyp otyrǵan», - dedi baspasóz hatshysy.
Belgili bolǵandaı, atalǵan otbasy «Kóktal-1» turǵyn alabyndaǵy jeke turǵyn úıdiń aýlasyndaǵy ýaqytsha turǵyn úı qurylysynda turǵan.
«Bizdiń aqparat boıynsha ol týysqandarynyń úıi bolǵan. Olar úıleriniń janyndaǵy ýaqytsha qurylys nysanyn atalǵan otbasyǵa bergen. Bul otbasy - Astananyń turǵyndary. Naqty óz baspanalary bolmaǵan jáne ákimdikten páter suramaǵan», - dedi Elvıra Júrgenbaeva.
Eske sala keteıik, 4 aqpannyń túninde elordanyń Saryarqa aýdanyndaǵy Kóktal-1 turǵyn alabynda órt shyqty. О́rtti sóndirý barysynda 2006, 2008, 2014, 2016, 2018 jyly dúnıege kelgen 5 balanyń denesi tabyldy. Eń kishisi nebári úsh aılyq sábı edi.
