Otbasy qundylyqtaryn qalyptastyryp, ata-ana men balanyń arasyndaǵy qarym-qatynasty jaqsartýǵa jáne psıhoaktıvti zattardan saqtaný joldaryna arnalǵan kýrsty mektep psıhologtary jáne pedagog-kýrator Bıbigúl Arystanova júrgizdi. Sharany uıymdastyrýdaǵy basty maqsat – otbasy músheleriniń qarym-qatynasyn jaqsartyp, ata-ana balany, bala ata-anany túsinip, januıadaǵy yntymaqtastyq pen berekeni ıkemdilik arqyly damytý.
- Kýrs 10-14 jastaǵy balalar men olardyń ata-analaryna arnalǵan. Sabaq barysynda biz jasóspirimderdiń kúızelisiniń erekshelikterin, aınalasyndaǵy ortamen qarym-qatynasyn, ózine degen senimniń qalyptasýyn zerttedik. Sondaı-aq, otbasydaǵy shekteýlerge, konflıkt jaǵdaıyndaǵy balanyń ózin-ózi ustaýyna nazar aýdaryp, balany kúshpen tárbıelemeý joldaryn qarastyrdyq. Baǵdarlamanyń eń mańyzdy tusy bul – toptyq dınamıka. Komanda músheleri óziniń janyndaǵy adamnyń myqty tustaryn taba bildi, - deıdi psıholog Tilektes Orazbergenqyzy.
Mektep pedagog-psıhologtarynyń sózinshe, kýrstyń eki dárisinen keıin-aq, top músheleri aýyzbirshilik tanytyp, ózara jaqyn til-tabysa bastapty. Sonymen qatar, sabaq barysynda ata-analar balalaryn jańa qyrynan tanyǵandaryn da atap ótti.
- Balalarǵa stress degenniń ne ekenin, odan shyǵý joldary, otbasylyq tártipti saqtaý, úlkenderde týyndaıtyn qıyndyqtar týraly aıtyldy. Jobanyń bir ereksheligi qatysýshylarǵa tek qana leksııa oqyla bermeı, ár túrli oıyndar, toptyq jumystar jasaý arqyly túsindirdik, - deıdi kýrator Bıbigúl Abatqyzy.
Trenerlerdiń sózinshe, jobanyń tıimdiligin anyqtaý maqsatynda otbasylar áli de baqylaýda bolady. Munymen qosa kýrs jetekshleri, komanda músheleriniń bilimin ózge de synyptaǵy oqýshlarǵa taratý máselesin jolǵa qoıýdy josparlap otyr. Aıta keteıik, «Berik otbasy» psıhologııalyq kýrsyn Ulybrıtanııadaǵy Oksford Brýks ýnıversıtetiniń mamandary birigip jasaǵan. Qazirgi tańda joba álemniń 35 eline engizilip, orys, ıspan, nemis, portýgal, fransýz, qytaı tilderine aýdarylǵan. 2018 jyldyń qarasha aıynda Aqtaý qalasyndaǵy Nazarbaev Zııatkerlik mektebiniń psıhology Tilektes Maskarova men pedagog-kýrator Oksford Brýks ýnıversıtetiniń aǵa muǵalimi, fılosofııa ǵylymdarynyń doktory Debbı Alen jáne Lındsı Klýbstan baǵdarlama boıynsha bilim alǵan.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
