Bıyl keminde 1 mln teńge sharshy metr turǵyn úıdi, 8500-ge jýyq páterdi paıdalanýǵa berý josparlanyp otyr. Sonymen birge, qurylys, sáýlet jáne qala qurylysy basqarmasynyń basshysy Nurlan Imanalın baıandaǵandaı, óńirge «Bazıs-A», «BI Group», «Highvill» syndy iri qurylys kompanııalaryn tartý josparda bar.
Jalpy, qurylys jumystarynyń kólemi 207,3 mlrd. teńgeni quraıdy. Onyń ishinde 46,9 mlrd teńge bıýdjet qarajatynan, 15 mlrd. teńge memlekettik—jeke seriktestik jelisi boıynsha, 145,4 mlrd. teńge jeke ınvestısııalar esebinen júzege asyrylmaq. Oblys basshysy qurylys jobalaryn júzege asyrýda ınvestorlardy tartýdy, jeke ınvestısııalar úlesin ulǵaıtýdy tapsyrdy.
Sondaı-aq, óńir basshysy memlekettik sáýlet-qurylys baqylaý basqarmasy men basqa da quzyrly memlekettik organdardan uzaq merzimdi qurylys máselesin sheshýdi, jobalyq-smetalyq qujattamany ázirleý jáne bekitý sharttaryn ońtaılandyrýdy, qurylys salasynda standartty jobalardy keńinen qoldanýdy talap etti.
Budan basqa, Berdibek Saparbaev jaýapty mekemelerdi qymbat turatyn áleýmettik nysandardyń qurylysy úshin synǵa aldy.
«Qurylys materıaldaryn únemdeńizder, bıýdjet qarajatyn únemdeńizder. Jeke qurylys salýshylarda qymbatshylyq joq. Al qazyna úshin áleýmettik nysandardyń qurylysy jyl saıyn qymbatqa túsýde»,- dedi oblys ákimi.
Buǵan qosa, óńir basshysy «7-20-25» memlekettik baǵdarlamasynyń júzege asyrylý qarqynynyń tómendigine kóńil aýdardy.
«Aqtóbe óńiri turǵyn úıdi memlekettik baǵdarlamamen satýda árqashan kósh basyndaǵylardyń qatarynda boldy, biraq bıyl altynshy bolyp tur»,- dedi jaǵdaıdy túzetýmen aınalysýdy tapsyrǵan B.Saparbaev.
Budan basqa, jańa ǵımarattardyń sáýlet beınesine, qasbetterin gúlmen bezendirý jáne zamanaýı árleý materıaldaryn paıdalanýǵa tıisti dárejede kóńil bólý tapsyryldy.
Oblysta «Aqyldy qala» pılottyq jobasy belsendi júzege asyrylyp jatyr. Qazirgi tańda baǵdarlama aıasynda «Nur Aqtóbe» shaǵyn aýdanyndaǵy úıler paıdalanýǵa berilip, Aqtóbe men Yrǵyz aýdanyndaǵy eki iri nysanda beıne baqylaý júıeleri ornatyldy. Berdibek Saparbaev jańǵyrtylyp jatqan energııa kózderi boıynsha jobalardy kóbeıtý kerektigine nazar aýdardy. Kún sáýlesiniń batareıalaryna, gaz-pispekti qondyrǵylardy belsendirek ınvestısııalaýdy tapsyrdy.
Qala men aýyldaǵy ınjenerlik ınfraqurylymdardyń damýy jaıly oblystyq energetıka jáne turǵyn úı – kommýnaldy sharýashylyq basqarmasynyń basshysy Dastan Amanov esep berdi.
Basqarma málimeti boıynsha, 2019-2020 jyldary 7 myńnan asa halqy bar 13 eldi meken gazdandyrylmaq. Jalpy quny 6,3 mlrd teńge bolatyn 20 gazben jabdyqtaý jobasyn júzege asyrý josparlanyp otyr. Oblystaǵy sýmen jabdyqtaý júıelerin damytýda jeti aýyspaly jáne tórt jańa jobany jalǵastyrý úshin bıyl 2,2 mlrd teńge qarastyrylǵan.
Sondaı-aq, Aqtóbe qalasy men oblys aýdandarynyń ákimdikterine oblystyń búkil jerindegi, ásirese mektepterdegi transformatorlyq qosalqy stansalardy qorshaý jumystaryn jalǵastyrý tapsyryldy.
