«Tarıfterdi tómendedi deısizder, al halyq tómendegenin kórip turmaǵandaryn aıtady. Birinshi kezekte, halyq muny qaltasymen sezinýi kerek»,-dedi oblys ákimi kommýnaldy qyzmet basshylaryna.
Onyń tapsyrmasymen Aqtóbede, sonymen qatar oblystyń barlyq aýdandarynda 19 aqpannan bastap arzandatylǵan tarıfterge qatysty aǵymdaǵy jaǵdaıǵa monıtorıng jasaýǵa kirisetin jumys toptary quryldy.
Berdibek Saparbaev: «Jumys toptaryna jaýapty memlekettik organdardyń ókilderinen ózge qoǵam qaıratkerleri de kirý kerek. Páterlerdi aralap, adamdarmen sóılessin, túbirtekterin alyp, salystyrsyn. Tarıfterdi tómendetý – memleket basshysynyń mindetti túrde oryndalýy tıis tapsyrmasy, muny árbir úı ıesi sezinýi kerek»,- dep atap ótti.
Eske salaıyq, jańa jyldan bastap óńirde kommýnaldy qyzmmetterdiń barlyq túriniń quny tómengen bolatyn. Kommýnaldy qyzmetterdiń málimetterine súıensek, oblysta gaz, jylý tarıfteri 10,2%, jaryq 3% arzandady. Sýmen jabdyqtaý 5,5%, sý tartý 5,9% tómendegen. Jedelsaty qyzmetiniń tarıfi 10% azaıyp, PIK qyzmeti 7,3% arzandady. Domofon qyzmeti úshin aqtóbelikter 5% arzan tóleı bastady.
