Sýretti túsirgen: Aleksandr Kýprıenko
Oral qalasynda apatty úı turǵyndaryn jańa baspanamen qamtamasyz etýdiń tyń tásili tabylǵanyn budan buryn da jazǵan bolatynbyz. Apatty úılerdi aýystyrýdyń oraldyq tájirıbesi búginde elimizdiń barlyq óńirine taratylyp jatyr. Memleket-jekeshelik áriptestigi baǵdarlamasy aıasynda qalanyń qaq ortasynda, kommýnıkasııa jelilerin tartýǵa shyǵyn ketpeıtin yńǵaıly jerde turǵan apatty úıdi jekemenshik qurylys kompanııalaryna berýdiń tıimdiligi qazirdiń ózinde anyq kórindi. Úı turǵyndary ýaqytsha, qurylys aıaqtalǵansha basqa jerde tura turady, olardyń baspana jaldaý shyǵynyn jergilikti atqarýshy organdar nemese qurylys kompanııasynyń ózi kóteredi.
Jańa úı salynyp bitken soń turǵyndar burynǵy páter kólemine saı baspanaǵa tegin ıe bolady. Qalǵan páterlerdi kompanııa ózi satady. Eki jaqqa da tıimdi degen osy emes pe?! Mine, sońǵy tórt jyl ishinde Oralda osyndaı 11 apatty úı qıratylǵan eken. 113 páterdiń turǵyndary basqa jerge kóshirilip, kóne úı oryndarynda qurylys qaınap jatyr. Buǵan deıin úsh úıdiń qurylysy aıaqtalsa, búgin tórtinshi úı ıelerin tapty.
Iаǵnı, memlekettik-jekemenshik áriptestik baǵdarlamasy aıasynda salynǵan kóp páterli úıdiń 8 páteri buryn osy jerde bolǵan kóne úı turǵyndaryna berilse, qalǵany «7-20-25» baǵdarlamasyna qatysýshylarǵa jáne «Turǵynúıqurysjınaqbanki» salymshylaryna tabystaldy.
- Jyl saıyn memleket qoldaýymen Batys Qazaqstan oblysynda myńdaǵan páter muqtaj azamattarǵa berilip jatyr. О́ńirimizde apatty jáne tozyǵy jetken turǵyn úı máselesin sheshý úshin aýqymdy sharalar atqarylýda. Bul jerde ótken ǵasyrda salynǵan, tozyǵy jetken, apatty úıler bolsa, búgin zaman talabyna saı jańa kóp qabatty úıdi paıdalanýǵa bergeli turmyz. Qalamyzda tozyǵy jetken 200-deı kóne úı tirkelse, sonyń 41-i resmı túrde apatty dep tanylǵan bolatyn. Bul máseleni joıyp, turǵyndardy qaýipsiz de jaıly baspanamen qamtý baǵytyndaǵy jumystar aldaǵy ýaqytta da jalǵasa beredi, - dedi osy sharaǵa arnaıy qatysqan óńir basshysy Altaı Kólginov.
Búgingi tabys etilgen úıdiń qurylysyn «Kaz Holl» JShS jeke ınvestısııalar esebinen júrgizgeni.
Aıta keteıik, osydan úsh jyl buryn qaladaǵy apatty úılerdiń sany 52 bolǵan edi. Sońǵy eki jylda qos úıdiń qurylysy aıaqtalyp, 58 otbasy jańa páterge ıe boldy.
Qazbek QUTTYMURATULY,
«Egemen Qazaqstan»
Batys Qazaqstan
