ShARAINA
Beısenbi, 27 jeltoqsan 2012 7:51
Jańa konstıtýsııaǵa daýys berdi
Egıpettiń saılaý komıssııasy eldiń jańa konstıtýsııasynyń taǵdyrynda sheshýshi ról atqarýy tıis bolǵan referendýmnyń resmı qorytyndylaryn jarııalady. Bul jóninde «Frans-Press» agenttigi habarlady. Agenttiktiń habarlaýyna qaraǵanda, qujatty daýys bergenderdiń 63,8 paıyzy qoldaǵan.
Beısenbi, 27 jeltoqsan 2012 7:51
Jańa konstıtýsııaǵa daýys berdi
Egıpettiń saılaý komıssııasy eldiń jańa konstıtýsııasynyń taǵdyrynda sheshýshi ról atqarýy tıis bolǵan referendýmnyń resmı qorytyndylaryn jarııalady. Bul jóninde «Frans-Press» agenttigi habarlady. Agenttiktiń habarlaýyna qaraǵanda, qujatty daýys bergenderdiń 63,8 paıyzy qoldaǵan.
Saılaýshylardyń daýys berý ýchaskelerine kelý kólemi 32,9 paıyz ǵana bolǵan. Daýys berýge quqyǵy bar mysyrlyqtardyń jalpy sany 52 mıllıon ekenin eskersek, muny az da, kóp te dep oı túıýge negiz bar. Saılaý komıssııasynyń basshysy Samır Abý Mýatı oppozısııashylar málimdegen daýys berý barysyndaǵy burmalaýshylyqtardy teriske shyǵardy. Endi elde tynyshtyq ornaǵanyn qalaıtyndar kóp, shyrqyn buzǵysy keletinder de joq emes.
Japonııadaǵy jańa da eski premer
Japonııanyń jańa premer-mınıstri bolyp Lıberal-demokratııalyq partııanyń serkesi Sındzo Abe saılandy. Ol úkimet basshysynyń oryntaǵynda Demokratııalyq partııanyń ókili Esıhıko Nodany almastyrdy. Bul jańalyqty da «Frans-Press» agenttigi taratty.
Endi Sındzo Abe jaqyn bolashaqta jańa úkimet jasaqtaýy tıis. Bir aıta ketetin jaıt, ol 2006-2007 jyldary da Japonııa úkimetiniń basynda bolǵan. Jalpysynda, Sındzo Abe ekinshi dúnıejúzilik soǵystan keıingi Japonııa tarıhynda úkimet basshylyǵyna ekinshi ret kelip otyrǵan alǵashqy adam. Al Esıhıko Noda eldegi kópshilikke unamaǵan salyq saıasaty úshin oryntaǵynan aıyrylǵan edi.
Joldaýyn Sırııa men Qytaıǵa arnady
Rım Papasy Benedıkt HVI dástúrli jańa jyldyq joldaýyn bul joly Sırııadaǵy jáne Afrıkadaǵy áskerı janjaldarǵa, sondaı-aq Qytaıdyń dinı senim-nanym bostandyǵyna qatysty saıasatyna arnady, dep habarlap otyr «Frans-Press» agenttigi.
Rımdegi Áýlıe Petr ǵıbadathanasynyń balkonynan 40 myńdyq katolıkterge arnaǵan jáne teledıdardan kórsetilgen óziniń sózinde pontıfık Sırııadaǵy qantógisti toqtatýǵa shaqyrdy. Jalpy, Papa osy eldegi janjaldy saıası jolmen sheshýge bolady dep esepteıdi. Benedıkt HVI, sondaı-aq Izraıl men Palestına avtonomııasyna, Nıgerııaǵa, Kongo Demokratııalyq Respýblıkasyna, Kenııa men Malıge beıbitshilik tiledi. Qytaıdyń jańa basshylyǵy elde baýyrlastyq qoǵam qura alady degen senim bildirdi.
Memlekettik dýma taratyla ma?
«Novaıa gazeta» óziniń saıtynda Memlekettik dýmany taratý úshin qol jınaýdy bastady. Sóıtip, basylym 2013 jyldyń 1 aqpanynda Reseı prezıdenti men Ortalyq saılaý komıssııasyna jınalǵan qol men búkilhalyqtyq referendým ótkizý týraly ótinishti qosa tapsyrmaq. Jalpyǵa ortaq daýysqa parlamenttiń tómengi palatasyna senimsizdik kórsetý máselesin shyǵarý usynylady.
Eger azamattar parlament jumysyna kóńilderi tolmaıtyn bolsa, bılik ne isteý kerek ekenin sheshsin. Muny júzege asyrýdyń bir joly – azamattardyń Memlekettik dýmaǵa senimsizdigi máselesin qoıýlaryna múmkindik beretin jańa zań, deıdi «Novaıa gazeta» baspasóz qyzmetiniń jetekshisi Nadejda Prýsenkova. Onyń aıtýynsha, bul jerde gazet ózine zańnyń bastamashysy rólin almaıdy, tek óziniń saıtyn qoǵamdyq kóńil-kúı bildiriletin únqatysý alańy retinde usynady.
Jańa jyldy Aýǵanstanda qarsy alady
Grýzııa prezıdenti Mıhaıl Saakashvılı jańa jyl qarsańynda grýzın áskerı qyzmetshileri qyzmet atqaryp jatqan Aýǵanstanǵa attanbaqshy. Bul jóninde prezıdent ákimshiligine silteme jasaı otyryp, «Trend» agenttigi habarlady.
Agenttiktiń aıtýynsha, Saakashvılı Gelmend provınsııasyna kelip, áskerılerdi merekemen quttyqtaıdy jáne Jańa jyl túnin solarmen birge ótkizedi. Bul Grýzııa basshysynyń Aýǵanstanǵa ekinshi sapary bolmaq. Alǵashqysy ústimizdegi jyldyń aqpan aıynda jasalǵan edi. Grýzııanyń áskerı kontıngenti Aýǵanstanda 2009 jyldan beri qyzmet etýde, quramy – 18 adam. Bir áskerı qyzmetker jeltoqsan aıynyń ortasynda joǵalyp ketken-tin.
Aǵaıyndylar ertegilerine – 200 jyl
Germanııanyń Kassel qalasynda aǵaıyndy Grımmder ertegileriniń alǵashqy baspa kórýiniń 200 jyldyǵyna arnalǵan aǵaıyndy Grımmder jylynyń saltanatty ashylýy ótti. Kassel aǵaıyndylar 1798-1841 jyldar aralyǵynda úzilistermen turǵan olardyń týǵan qalasy bolyp tabylady.
Jyldyń sharyqtaý shegi Kasselde aldaǵy jyldyń 27 sáýiri men 8 qyrkúıegi aralyǵynda ótetin «Grımm ekspedısııasy» kórmesi bolady. Onda jurtshylyq nazaryna jazýshylardyń qoljazbalary men jeke zattary usynylmaq. Aǵaıyndylar ertegileriniń ishindegi asa tanymaldary «Qasqyr men jeti laq», «Kúl qyz», «Qyzyl telpek», «Bremen mýzykanttary», «Uıqydaǵy arý» jáne «Aqshaqar» ekeni belgili. Barlyǵy folklorshylar 200-den astam ertegi bastyryp shyǵarsa, olardyń kópshiligi boıynsha fılmder men mýltfılmder túsirilgen.
Qytaıdaǵy eń júrdek poıyz
Qytaı astanasy – Beıjiń qalasy men Gýandýn provınsııasynyń ortalyǵy – Gýanchjoý qalalarynyń arasyn jalǵaıtyn alǵashqy júrdek poıyz jolǵa shyqty. Ol saǵatyna 305 shaqyrym jyldamdyqpen júre alady.
Eki qalanyń arasy 2200 shaqyrymdy qurasa, buǵan deıingi júretin poıyzdar eki aralyqty eńserý úshin 24 saǵat ketiretin, endi jolaýshylar júrdek poıyzdyń arqasynda bul aralyqty bar bolǵany 8 saǵattyń ishinde júrip ótedi. Kóptegen jolaýshylar bul quramnyń ushaqqa qaraǵanda tıimdiligi kóp ekenin aıtady. О́ıtkeni, ushaqqa otyrý úshin kóptegen tekserýlerden ótip, júkti tapsyrýǵa týra keledi. Áýejaıdan qalaǵa jetý de aıtarlyqtaı ýaqyt alady. Poıyzǵa otyrsań, mundaı mashaqattyń bárinen qutylasyń.
Internet materıaldary negizinde ázirlendi.
