Parlament palatalarynyń birlesken otyrysynda Memleket basshysy Qasym-Jomart Toqaev Konstıtýsııalyq Keńes músheleriniń, Joǵarǵy Sot sýdıalarynyń, Qazaqstan Respýblıkasynyń Tuńǵysh Prezıdenti – Elbasynyń, Úkimet músheleriniń qatysýymen Qazaqstan halqyna ant berdi.
– Qazaqstan halqyna adal qyzmet etýge, Qazaqstan Respýblıkasynyń Konstıtýsııasy men zańdaryn qatań saqtaýǵa, azamattardyń quqyqtary men bostandyqtaryna kepildik berýge, Qazaqstan Respýblıkasy Prezıdentiniń ózime júktelgen mártebeli mindetin adal atqarýǵa saltanatty túrde ant etemin, – dedi Qasym-Jomart Toqaev.
Memleket basshysy rásimge qatysýshylar aldynda sóılegen sózinde Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń egemen elimizdi qalyptastyrýǵa jáne órkendetýge, sondaı-aq elordamyz – Astanany turǵyzýǵa sińirgen zor eńbegine aıryqsha toqtaldy.
– Búginde Nursultan Ábishuly Nazarbaev álem tarıhyna asa kórnekti reformator retinde endi. Ol Qazaqstandy dúnıe júzindegi básekege qabiletti 50 eldiń qataryna qosylǵan zamanaýı ári ozyq memleketke aınaldyra bildi. Onyń ekonomıkalyq jáne saıası reformalary memlekettik syndarly saıasattyń sımvoly boldy, – dedi Qazaqstan Prezıdenti.
Qasym-Jomart Toqaev joǵary ári jaýapty qyzmetti atqara otyryp, Elbasynyń strategııalyq baǵytyn jalǵastyra beretinin aıtty.
Rásim barysynda Qazaqstan Respýblıkasynyń Tuńǵysh Prezıdenti – Elbasyǵa «Halyq qaharmany» ataǵy berilip, «Altyn juldyz» aıryqsha belgisi tabys etildi.
