Qonaqtar aldynda sóz sóılegen QR Elshisi Erlan Ydyrysov Naýryz merekesiniń jańarý men jańa ómirdiń sımvoly retindegi ereksheligin, sondaı-aq festıvaldiń halyqtar men mádenıetterdiń birigý turǵysyndaǵy mańyzdylyǵyn atap ótti. Sonymen qatar ol mundaı is-sharalar Qazaqstan-Brıtan qarym-qatynastaryn damytýǵa, sondaı-aq qazaq mádenıetin Ulybrıtanııada tanymal etýge qomaqty úles qosatynyn atap ótti.
Mereke qonaqtary úshin uıymdastyrylǵan konsert aıasynda Atyraýdan Londonǵa arnaıy kelgen «Murager» folklorlyq ansambli óner kórsetti. Ansambl Uly dalanyń folklorlyq áýenderin – «Qarajorǵa» halyq kúıin, «Árıdaı» halyq ánin, Q.Jumaǵalıdiń «Kóktem sazy», S.Turysbektiń «Aq jaýyn» jáne t.b. týyndylardy oryndady.
Konsertte Ulybrıtanııanyń joǵary oqý oryndarynda bilim alyp jatqan qazaqstandyq stýdentter de óner kórsetti. «Qos Arna» atty etnofolklorlyq dýeti erekshe kózge tústi. Dýet músheleri – mýltıquralshylar Aıda men Azamat Jahanbekovter qobyz, jetigen, dombyra, sybyzǵy jáne shańqobyz ulttyq aspaptarda oınap, A.Qunanbaevtyń «Aıttym sálem, Qalamqas», N.Tilendıevtiń «Aqqý» atty shyǵarmalaryn, sondaı-aq «Shattyq sazy» atty óziniń avtorlyq týyndysyn oryndady. Aıda qazirgi ýaqytta Sheffıld ýnıversıtetinde oqıdy, al onyń inisi Azamat – K.J.Baıseıitova atyndaǵy daryndy balalarǵa arnalǵan respýblıkalyq mamandandyrylǵan mýzykalyq orta mektep-ınternatynyń oqýshysy.
Konsertten basqa qonaqtar nazaryna Atyraý oblysynyń Tarıhı-ólketaný murajaıy ákelgen tarıhı eksponattar men qazaqstandyq qolónershilerdiń jumystary usynyldy. Mýzeıdiń 50-ge jýyq eksponaty – zergerlik buıymdar, ulttyq kıim jáne turmystyq zattar – festıvaldiń naǵyz kórki boldy. Sonymen qatar merekede qazaqstandyq sán dızaınerlerdiń jumystary usynyldy. Al stendtegi kitap ónimder Qazaqstanǵa, onyń tarıhyna, mádenıetine jáne týrıstik múmkindikterine arnaldy.
Festıvaldiń basty nazar aýdararlyq oryndarynyń biri ulttyq turmys zattary men dástúrli mýzykalyq aspaptarmen bezendirilgen qazaq kıiz úıi boldy. Qonaqtar dala qazaqtardyń úıine qonaqqa kelip, kóshpendilerdiń aty ańyzǵa aınalǵan baspanasynda sýretke túsýge múmkindikke ıe boldy.
Naýryz meıramynyń sharyqtaý shegi qazaqtyń «tusaý keser» salty boldy. Qazaq dástúri boıynsha mundaı jaýapty is otbasyndaǵy eń qurmetti adamǵa – sol adamnyń qadamyn bassyn dep tapsyrylady. Balanyń ata-anasynyń suraýymen QR Elshisi Erlan Ydyrysov qonaqtardyń aldynda búldirshinniń tusaýyn kesip, onymen birge tóselgen aq jol ústimen birneshe sımvoldyq qadam jasady.
