Buǵan aq ulpanyń normadaǵydan eki esege jýyq kóp jaýǵany áser etip otyr. Buǵan aq ulpanyń normadaǵydan eki esege jýyq kóp jaýǵany áser etip otyr.
«Kún kúrt jylynyp, temperatýra keı jerlerde 20 gradýs jylylyqqa jetýi múmkin», dedi ol tótenshe jaǵdaılardyń aldyn alý jáne joıý jónindegi komıssııanyń kezekten tys otyrysynda.
Ondaı qaýiptiń oryn alyp otyrǵanyn aımaq basshysy Qumar Aqsaqalov ta jasyrmady. Vedomostvo basshylary men aýdan ákimderi qatysqan tikeleı baılanys barysynda ol Premer-Mınıstrdiń orynbasary Jeńis Qasymbek óńirge kelip, kóktemgi sý tasqynyna ázirlik barysymen tanysqanyn, birqatar tapsyrmalar júktegenin jetkizdi. Qoldaǵy aqparattarǵa qaraǵanda Sergeevka sý qoımasy 93 prosentke tolǵan. Qalyń qardyń erýinen Esil ózeniniń arnasy da kóterilip keledi. Osy sebepti oblysta kúsheıtilgen jumys rejimi jarııalanyp, tabıǵattyń tosyn minezin eńserý, turǵyndardyń qaýipsizdigin qamtamasyz etý sharalaryna erekshe nazar aýdarylyp otyr.
Tótenshe jaǵdaılar jónindegi departament bastyǵy Ramıl Kamalov esebin qutqarýshylardyń saqadaı-saı daıyndyǵynan bastady. Jedel áreket etý jasaǵy quramyna 1400 adam, 730 tehnıka, 353 sorǵy quraly toptastyrylǵan. 18 myń tonna ınertti materıal, qum salynǵan 35 myń qapshyq, 130 tonna janarmaı qory ázirlengen. Eldi mekenderden 800 myń tekshe metr qar shyǵarylǵan. Qarǵyn sýdan zardap shegýi yqtımal aýyldardyń mańaıynda jarty myń shaqyrym alqap, 2 myńdaı sý ótkizgish qubyr tazartylǵan.
Aımaq basshysy barlyq eldi mekender men úılerdi tekserýge tapsyrma berdi. Sý basý qaýipin seıiltýdiń múmkindikterin jete qarastyrýdy, tyǵyryqtan shyǵý úshin jeke kásiporyndarmen kelisim-shartqa otyryp, olardy tartý qajettigin atap kórsetti. Oblys ortalyǵyndaǵy Jumysshy kenti, Oıqala, Bereke yqshamaýdary turǵyndary tarapynan shaǵymdardyń jıi túsetinin aıtty. 92 aýyldy sý shaıý yqtımaldyǵy basym. Respýblıkalyq jáne oblystyq mańyzy bar joldardyń úshjúzden astam ýchaskesine qater tónýi yqtımal. Olardyń boılaryndaǵy qubyrlardyń 64 prosenti ǵana qalypqa keltirilgen.
«Oblys ortalyǵynda keı baspanalardy sý ala bastady. Jaǵdaı baqylaýda. Sý sorý jumystarymen 6 apattyq brıgada aınalysady. Sý ótkizgish qubyrlar muzǵa tolyp qalǵandyqtan, bý kómegimen jibitý tájirıbesin qoldanýdamyz. Eki dıspetcherlik beket táýlik boıy jumys isteıdi», deıdi «Tazartqysh, sý tartqysh jáne sý ótkizgish ǵımarattar» mekemesiniń dırektory Pavel Býlaev.
Oblys ákimi Q. Aqsaqalovtyń Ýálıhanov aýdanyna sýyt júrip ketti. О́ıtkeni, Aqmola oblysynda ornalasqan Sileti sý qoımasynan artyq sýdyń bosatylyp jiberilýine baılanysty Qaratal men Qýlykól eldi mekenderinde kúrdeli ahýal qalyptasqan. Qumar Irgebaıulynyń jetekshiligimen osynda jedel shtab qurylyp, turǵyndardy jaıly jerlerge ornalastyrýdyń, azyq-túlikpen, dári-dármekpen qamtýdyń joldary jiti oılastyrylǵan.
О́mir ESQALI,
«Egemen Qazaqstan»
Soltústik Qazaqstan oblysy
