4-7 sáýir aralyǵynda Almatyda Halyqaralyq djaz festıvali dástúrge saı Jambyl atyndaǵy Qazaq memlekettik fılarmonııasynda ótedi. Bul festıval osy baǵytty janymen súıetin mýzykanttardyń óz arasynda «Halyqaralyq djaz merekesi» dep te atalady. Jıyrma jylǵa jýyq ómirderegi bar aýqymdy án-kúı merekesinde 300-den asa mýzykant óner kórsetken. Al bıylǵy festıvalde qazaqstandyq tyńdarmandar Izraıl, Vengrııa, Avstrııa, Polsha, Túrkııa, Germanııa jáne Fransııadan kelgen toptar men jekelegen ánshiler ónerin tamashalamaq. Djaz festıvaliniń sahnasynda qazaqstandyq toptarmen birge Almaty Jazz Youth Band mektep orkestri de oryndaýshylyq sheberligin kórsetedi. «Biz Qazaqstannyń sahnasynda, sizderdiń Almatydaı ǵajaıyp shaharlaryńyzda óner kórsetetinimizge, sizdermen birge mýzyka áýenimen birge terbeletinimizge áli sene almaı turmyz», – deıdi ızraıldik djazmen Gaı Mıntýs.
Festıval aıasynda sheteldik qonaqtardyń qatysýymen tegin dástúrli sheberlik saǵattary ótkiziledi. Aıta ketsek, 4 sáýir kúni Polsha men Túrkııadan kelgen mýzykanttar, 5 sáýirde Fransııa men Izraıl, 6 sáýirde Germanııa men Avstrııanyń djaz ártisteri óner kórsetip, al 7 sáýirdegi konserttik baǵdarlamany Qazaqstan, Vengrııa jáne Amerıka mýzykanttary men toptary túıindemek. Almaty qalasy ákimdiginiń qoldaýymen ótkizilip kele jatqan festıvaldiń basty uıymdastyrýshylary Almaty djaz mektebiniń dırektory Tagır Zarıpov pen jobanyń menedjeri Qarlyǵash Maqatova.
ALMATY
