– Qazirgi fransýz kınematografy bul ózindik qundylyqtary, ózindik atmosferasy bar kıno, – deıdi ónertaný doktory, Qazaqstannyń kınosynshylar qaýymdastyǵynyń prezıdenti Gúlnár Ábikeeva. Qazir biz zorlyq-zombylyq, kisi óltirý kóp qylmystyq kıno dáýirinde ómir súrip jatyrmyz. Al fransýz kınosy burynǵysha janǵa jylý syılaıtyn kúıinde. Jáne bul tek komedııalarǵa nemese melodramalarǵa ǵana qatysty emes. Bıylǵy baǵdarlamada «Amandanyń jańa ómiri» degen drama bar. Onda 24 jastaǵy jigit óz ápkesiniń óliminen keıin 7 jasar nemere qaryndasyna bas-kóz bolyp qalady. Bul osyǵan deıin tek mansabymen jáne qyz-qyrqynmen qarym-qatynasymen bas qatyrǵan jas jigittiń ómirin baıandaýdaǵy jańa tásil. Kútpegen jerden jas jigit kishkentaı qyzǵa áke de, ana da bolýy kerek. Maǵan fransýz kınosynyń jylýlyq syılaıtyny unaıdy. Eń basty ereksheligi, fransýz kınosynda tamasha akterler oınaıdy. Aıtpaqshy, bıyl kórsetiletin fılmderde jańa akterlerdiń esimderi kóp bolady.
Festıvaldiń ashylýy men jabylýy, sonymen qatar negizgi kórsetilimderi UniFrance agenttigi men onyń seriktesteri – Fransııanyń Qazaqstandaǵy elshiligi jáne Almatydaǵy Fransýz alıansy uıymdastyrǵan festıvaldiń basty alańyna aınalǵan «Arman» kınoortalyǵynda ótedi.
ALMATY
