– Asqar Álirahymuly, «Dınamo» sport qoǵamynyń qazirgi baǵyt-baǵdary qandaı?
– Bir ǵasyrǵa jýyq tarıhy bar «Dınamo» sport qoǵamy talaı qıyndyqty bastan ótkerdi. Árıne Keńes Odaǵy tusynda «Dınamonyń» dańqy, ataǵy jer jaratyn. Elimiz táýelsizdik alǵan alǵashqy jyldary qur qol qarap otyrmaı, óz betimizshe ómir súre bildik. Sóıtip aıaǵymyzdy tiktep, ornymyzdan turdyq. Qazirgi tańda qazaqstandyq «Dınamo» qoǵamy dınamolyq uıymdardyń halyqaralyq Úılestirý keńesiniń múshesi. Onyń quramynda 17 memlekettiń ókilderi bar. Olar ózge eldegi dınamolyq seriktesteriniń tájirıbelerin únemi zerttep, zerdelep otyrady.
Aımaqtarda 18 fılıalymyz turaqty túrde jumys isteıdi. Bizdiń uıym negizinen úsh baǵytta jumys atqarady. Basty baǵytymyz – quqyq qorǵaý organdary qyzmetkerleriniń dene jáne arnaıy daıyndyqtaryn damytý. Bir sózben aıtqanda, «Dınamo» sport qoǵamy 90 myńnan asa áskerı qyzmetker men kúshtik qurylymdardyń, qaýipsizdik qyzmetiniń jáne quqyqtyq tártip qyzmetkerleriniń basyn qosady. Mańyzdy baǵyttardyń biri – joǵary dárejeli sport túrlerine jiti kóńil bólý. Dınamolyq sportshylar sporttyń ár túrinen elimizdiń ulttyq qurama komandalarynyń 80 paıyzyn quraıdy. Sondaı-aq Elbasymyz dene shynyqtyrý jáne buqaralyq sportty damytý arqyly salamatty ómir saltyn qalyptastyramyz dep aıtyp ótkendeı, qarapaıym halyqty sportqa baýlýǵa da erekshe mán beremiz.
– Osy baǵytta naqty qandaı ister atqarylyp jatyr?
– Jyl saıyn áskerı qyzmetkerler jáne sportshylarmen birlesip semınarlar, erlik sabaqtaryn ótkizemiz. «Dınamo» DShSQ Spartakıadasy aıasynda qyzmettik-qoldanbaly sport túrlerinen 15 myńǵa jýyq qyzmetker men áskerı qyzmetkerlerdi qamtıtyn vedomstvoaralyq chempıonattar men týrnırler uıymdastyramyz. Iаǵnı, sambo jáne áskerı sambo, qoıan-qoltyq urys, prezıdenttik kópsaıys, jaýyngerlik qarýdan oq atý, boks jáne basqa da sport túrlerinen chempıonattar ótedi. Al táýelsizdik jyldarynda qazaqstandyq sportshylardyń jazǵy jáne qysqy Olımpııa oıyndarynda alǵan 72 júldeniń 60-y «Dınamo» sport qoǵamynyń sportshylaryna tıesili. Onyń ishinde 12 altyn, 19 kúmis jáne 29 qola medal bar. Sonymen qatar elimizdiń aldyńǵy qatarly sportshylarynyń basym bóligi «Dınamo» DShSQ Ortalyq keńesiniń usynymymen 65 shtattyq birlikten turatyn IIM Ulttyq Ulannyń sporttyq komandasynyń quramyna kirgen.
– Jasóspirimder men balalar sportyna qanshalyqty kóńil bólinedi?
– Álbette, kóńil bólinedi. Máselen, 2017 jyly Ishki ister mınıstrliginiń
bastamasymen jastar men jasóspirimderge arnap «Jas Dınamo» jastar qozǵalysyn uıymdastyrdyq.
Jas dınamolyqtardyń negizin elimizdiń orta, arnaýly orta jáne joǵary oqý oryndarynyń,
sonyń ishinde quqyq qorǵaý organdary men qaýipsizdik organdary úshin rezerv ázirleıtin
IIM, IIM UU, UQK jáne UQK ShQ oqý oryndarynyń, áskerı-kásibı lıseılerdiń sporttyq
lıgalary quraıdy. 25 myńnan astam jastar men jasóspirimderden turatyn «Jas Dınamo»
jobasy elimizdiń barlyq túkpirinen eriktilerdi jınap, olar áleýmettik mańyzy bar
bastamalardy júzege asyrýǵa atsalysyp, aldarynan úlken múmkindikter ashyldy. «Dınamo»
qoǵamynyń barlyq fılıalynda 187 úıirme kúndelikti jumys isteıdi. Onda
6 myńnan astam jas dınamoshy jattyǵady. Oblystyq ákimdikterdiń jastar saıasaty jónindegi
basqarmalarynyń qoldaýymen «Dınamo» fılıaldary bazasynda jyl basynan bastap 8 aýla
klýby jáne sporttyq baǵyttaǵy jastar tájirıbesi mektebi ashyldy. Sonymen qosa
bizdiń uıym 30 balalar úıi men ınternattarǵa qamqorlyq jasaıdy.
– Kezinde «Dınamo» sport qoǵamynyń baı materıaldyq bazasy bolatyn. Qazir osynyń jaǵdaıy qalaı?
– Sport qaýymdastyǵy kóp jyldan beri Bilim jáne ǵylym mınıstrligi Dene shynyqtyrý jáne sport ǵylymı-tájirıbelik ortalyǵymen birlesip jumys istep keledi. Sonyń ishinde kóptegen mektep spartakıadalary, stýdentterdiń ýnıversıadalary bar. Bul jarystarǵa elimizdiń mektepteri men stýdent jastary, ıaǵnı uzyn sany 2 mıllıonǵa jýyq bala men jasóspirim qatysady.
Bul yntymaqtastyqtyń jetistikteri kóńil qýantady. Degenmen, sportshylardy daıyndaý baǵytyndaǵy osy jumystardyń memlekettik júıedegi dene shynyqtyrý jáne sport qoǵamdardyń zań turǵysynan belgilengen arnaıy dárejesi bolsa, atalǵan sharalar odan da zor jemisin berip, tıimdiligi artar edi. О́tkizilgen jarystardyń qorytyndysy negizinde qarjylyq jáne sporttyq razrıadtar berý máselesin sheshe alatyn sporttyq federasııa dárejesi bolsa, quba-qup.
Sonymen qatar sporttyq qoǵamdar men klýbtar úshin úlken mańyzǵa ıe, balalar men jasóspirimderdiń sportyn jappaı damytýǵa arnalǵan memlekettik baǵdarlamany bekitse deımiz. Eń bastysy, 1992 jyldyń 27 shildesinde IIM alqasynyń №3 sheshimimen oblystyq jáne qalalyq ákimdikterdiń kommýnaldyq menshigine ótip ketken elimizdiń 14 qalasyndaǵy «Dınamo» sport qoǵamyna tıesili sporttyq-materıaldyq bazany qoǵamnyń ózine qaıtarý jónindegi másele kóterilse eken. «Dınamonyń» ózine tıesili sporttyq keshender Almaty, Oral, Qyzylorda jáne Shymkent qalalarynda ǵana saqtalyp qaldy.
Búginde Nur-Sultan qalasyndaǵy sport keshenin qaıtarý prosesi bastaldy. Mektep oqýshylary arasynan qyzmetkerler rezervin daıyndaý – búgingi tańnyń eń ózekti máselesi. Quqyq qorǵaý organdary men ózge de qurylymdardyń qyzmetkerler quramynyń sapasyn arttyrý máselesi osydan týyndaıdy. Oǵan qosa, jemqorlyqqa qarsy kúres jónindegi máselelerdi sheshý, eń bastysy, quqyq qorǵaý jáne kúshtik qurylymdardyń bedeli men abyroıyn qalpyna keltirý sııaqty máselelerdi de umytpaýymyz kerek. Elbasymyz Jastar jyly dep jarııalaǵan osy bir jylda bizdi qoldaıdy degen úmittemin.
Áńgimelesken Dýman ANASh,
«Egemen Qazaqstan»
