Ataýly shara Jastar jylynyń aıasynda uıymdastyryldy. Baq synaýshylar ár aımaqtaǵy joǵary oqý oryndarynda irikteýden ótip kelgen. Sondyqtan bolashaq aýdarmashy nemese shet tiliniń mamany bolmasa da, zaman talabyna saı ǵalamdyq tilderdi meńgerýge talpynyp júrgen talapkerler óte qabiletti. Uıymdastyrýshy, aǵa oqytýshy Qarlyǵash Jálelqyzy osy jyly 98 stýdent qatysyp otyrǵanyn aıtty. «Respýblıkanyń ár túkpirinen jetken jalyndy jastardyń basyn qosatyn olımpıadany fılologııa fakýltetiniń shetel tilder kafedrasy bes jyldan beri jyl saıyn uıymdastyryp keledi. Qatysýshylardyń 32-si nemis tilinde, 62-si aǵylshyn tilinde baq synaýda», deıdi. Onyń aıtýynsha, Nazarbaev ýnıversıtetinen eki oqytýshy, «Inter press» halyqaralyq til ortalyǵynan kelgen ádisker úzdikterdi anyqtaýda táýelsiz sarapshy bolmaq. Al sharany uıymdastyrýǵa AQSh, Germanııa men Brıtanııa elshilikteri qoldaý kórsetken.
Olımpıada eki týrdan turady. Birinshi kezeńde qatysýshylar tildiń B1/B2 deńgeıinen tyńdalym, leksıka-grammatıka jáne oqylym boıynsha test tapsyrsa, ekinshi týrda «Búgingi jas – erteńgi bolashaq» (Today’s Youth – Tomorrow’s Future) taqyrybynda joba qorǵaıdy. Testileýge 2 saǵat bólinse, ekinshi kezeńdegi ár prezentasııaǵa 5 mınýt ýaqyt berilgen.
Olımpıadaǵa qatysýshy Ersultan Omar Sultanmahmut Toraıǵyrov atyndaǵy Pavlodar memlekettik ýnıversıtetiniń «Sáýlet-qurylys» fakýltetinde oqıdy. «Osyǵan deıin oblystyq oqýshylar arasynda ótken tildik olımpıadaǵa qatystym. Respýblıkalyq deńgeıdegi baıqaýǵa alǵash kelip turmyn. Birinshi týr burynnan tanys testileýden turady. Men úshin ekinshi kezeń qyzyq bolyp tur. О́ıtkeni onda tildi qalaı meńgergeniń ǵana emes, ıdeıań, oıyń jáne olardy jetkizý qabiletiń synǵa túsedi», deıdi Ersultan. Ol qarsylastarynyń myqty ekenin sezse de, jeńisten úmitti.
Olımpıada qorytyndysy búgin, ıaǵnı 19 sáýir kúni keshki saǵat 18.00-de belgili bolady.
