Jıyn barysynda mınıstrler kóp balaly otbasylardyń áleýmettik jaǵynan qorǵalýy, turǵyn úımen qamtý, densaýlyq, bilim máselelerin talqylady.
Gúlshara Ábdihalyqovanyń aıtýynsha 2019 jyldyń 1 shildesinen bastap, múgedek balasy bar ata-anaǵa kútim úshin járdemaqy 31 183 teńgeden 41 578 teńgege ósken. Tómengi jalaqy alýshylardyń jalaqysyna qosylyp, kóp balaly otbasylarǵa jalǵa úı beriletin bolmaq. Kóp balalylar qatarynan 906 otbasy ShQO-da baspaǵa zárý. 2025 jylǵa deıin bundaı otbasylarǵa jeńildikpen 2 paıyzdyq nesıemen páter beriledi ne bolmasa ómir baqı jalǵa alyp turý úshin baspanalar berilýi týraly, eki túrli nusqadaǵy úlgisi bar baǵdarlama bekitilgen eken.
Aıta ketý kerek, Qazaqstanda qazirgi ýaqytta turǵyn úı qurylysy qarqyn alyp otyr. Bir ǵana Semeıdegi Qaraǵaıly aýdanynda 25 kóppáterli úı salynyp, jaqyn aralyqta paıdalanýǵa berilmek. Aldaǵy ýaqytta bul jerde 100 kóppáterli úı salynbaq.
Investısııa jáne Damý mınıstrliginiń turǵyn úı kommýnaldy sharýashylyq jáne qurylys jónindegi Komıtet tóraǵasy Marhabat Jaıymbetovtyń aıtýynsha, qalaı desek te, jańa páterge kez kelgenniń qoly tez arada jete bermeıtini anyq. Ásirese, jalǵyz basty analar, kóp balaly otbasylar jáne múgedek balasy bar otbasylar baspanaǵa zárý. Eń aldymen solarǵa jaǵdaı jasaý qajet.
Al Bilim jáne ǵylym mınıstri Kúlásh Shamshıdınovanyń aıtýynsha, búginde úsh aýysymda oqyp jatqan mektepterge basty nazar aýdarý kerek. Olardyń kópshiligi apatty eskirgen ǵımarattarda oqyp jatyr. Táýelsizdik alǵan jyldary elimizde 1672 mektep salynǵan. 2020-2021 jyldary 190 mektep salynady. Bıyl Shyǵys Qazaqstan boıynsha eki mektep salynyp, paıdalanýǵa berilmek.
Halyq densaýlyǵy salasyndaǵy oń ózgerister týraly mınıstr Eljan Birtanov bylaı dedi:
- Prezıdent tapsyrmasyna oraı emhanalarda alǵashqy járdem qyzmetin sapaly jolǵa qoıýymyz qajet. Búginde medısına mamandary jetispeı jatyr. Ásirese, dárigerler. Bizdiń eldiń medısına ýnıversıtetteri jetkilikti túrde dárigerler daıarlap jatsa da, dárigerler jalaqy azdyǵynan jekemenshik bireýlerge ketedi. Ne bolmasa, basqa mamandyqqa aýysýǵa májbúr. Bıyl Shyǵys Qazaqstan oblysy boıynsha 22 myń medısına qyzmetkeri jalaqylaryna ústemaqy alatyn bolmaq. Eger buryndary bir dárigerdiń júktemesine 3000 pasıent kelse, endi ony 1700-ge azaıtpaq.
Jumys sapary barysynda mınıstrler toby qaladaǵy mektepterdi, kolledjderdi de aralady.
Raýshan NUǴMANBEKOVA
«Egemen Qazaqstan»
SEMEI
