Qaıta jalǵanǵan ǵumyr
Juma, 1 aqpan 2013 6:55
Erlan – otbasyndaǵy eki uldyń úlkeni bolatyn. Qarshadaıynan ómirge qushtar ol shaǵyn aýyldyń betke ustar ulany bolyp ósti. Jańalyqqa jany jaqyn turatyn bala aýdan ortalyǵynda ashylǵan karate úıirmesine ózi baryp jazylyp, az ǵana ýaqytta birneshe básekelerden marapat alyp oraldy.
Juma, 1 aqpan 2013 6:55
Erlan – otbasyndaǵy eki uldyń úlkeni bolatyn. Qarshadaıynan ómirge qushtar ol shaǵyn aýyldyń betke ustar ulany bolyp ósti. Jańalyqqa jany jaqyn turatyn bala aýdan ortalyǵynda ashylǵan karate úıirmesine ózi baryp jazylyp, az ǵana ýaqytta birneshe básekelerden marapat alyp oraldy.
Osy tynymsyz izdenis, alys kúnderge asyǵýshylyq, bolashaqtan qol bulǵaǵan arman ony mektep bitirisimen úlken qala jaqqa ala jóneldi. Sondaǵy joǵary oqý ornyna túsip, alǵashqy kýrstyń ózinde-aq talantymen oqý ornynyń maqtanyshyna aınaldy. Júris-turysy jyldam, qaǵylez, sózge jetik, oıy ushqyr da tapqyr, elgezek jigitti osy qaladaǵy jaıdarmanshylar attaı qalap qataryna qosty. О́zi oqıtyn bilim ordasy qabyrǵasynda jaıdarmanshylar tobyn quryp, repertýaryn dostarymen birlese taqyryptyq jáne tartymdylyq jaǵynan jańarta baıytqan Erlan óz elimiz aýmaǵynan shyǵyp, shet memleketter sahnasynyń sánin kirgizdi. Qalaǵa barysymen orys tilin meńgerip alǵan jigitke ol tilde óner kórsetý qıyn bolǵan joq, nátıjesinde Reseıdiń aıtýly qalasyndaǵy salmaqty saıysta jeńimpaz atanyp, altyn medaldi ıelenip qaıtty. Oqý ornyna oralǵan soń, ózi jaldap jatatyn úıdiń balalarymen týysqandaı bolyp aralasyp ketken Erlan sol úıdegi qos inisine dombyra úıretti. Qos inisi arqyly dombyraǵa qyzyǵýshylyǵy oıanǵan onyń synyptastary shubyryp kele bastady. Qazaqtyń qara dombyrasyn úırenemin degen jetkinshek bolsa, nege úıretpeske? Erlan mektepterdi aralap júrip, dombyra tartyp úırengisi keletin balalardy jıyp úıirme ashty, ózi biletin kúılerdi, ánderdi jáne qazaq dástúrine saı kelinniń betin ashýdy úıretti.
Osylaısha, ómirge de, ónerge de qushtar Erlannyń belsendiligi, sonaý alystaǵy aýyldan kelip alyp shahar aspanynda jaryq juldyzdaı jarq ete qalýy ishi tar, nıeti buzyq jandardyń qyzǵanyshyn týdyryp ta úlgerip edi. Erlannyń júris-turysy, jastardyń oǵan degen qoshemeti, eń bastysy – ol jazyp shyǵarǵan dúnıelerdiń jarystarda qarsylastardyń márege barar jolyn qıyp, jıi shań qaptyryp ketýi básekelesterdi uıqydan shoshyp oıanatyn halge jetkizdi. Erlan jarqyraǵan saıyn, kózge kórinbeıtin bette qap-qara qastandyqtyń da sulbasy zoraıyp birge ósip kele jatty. Erlan ony ańǵarǵan joq, tek kóktemniń ádemi bir keshinde qara qanjar bolyp ańdaýsyzda jandy jerden qadalǵanda, ne bolǵanyn túsinip úlgerdi me, joq pa – bas-aıaǵy on mınýtta o dúnıege attanyp kete bardy, qyrshyn jas…
Arada bes jyl ótti. Áke-sheshe, týma-týystarynyń qaıǵysyn ýaqyt emshi emdeı almaı ezilgen kúnderdiń biri bolatyn. Bul kezde tuńǵysh nemeresi Erlanǵa úlken úmitpen qaraıtyn, onymen birge kári kóńiliniń túkpirin shýaqtaı jylytyp turatyn tátti úmit, jaqsy kúnderge degen senimi birjolata qyrqylǵan qart atasy qaıǵyny kótere almaı baqılyq bolǵan. Qudaı taǵalanyń bereıin dese, shapaǵaty shash-etekten eken. Dál Erlan qaıtqan kúni kóz jasyn kól qylyp otyrǵan ata-anasyna Almatydan Erlannyń dostary qońyraý shaldy. Erlannyń áne-mine úılenemin dep júrgen súıikti qyzy – ol qaıtys bolysymen qursaǵynda qalǵan sharanany ómirge ákelýge bekinipti. Ata-anasynan bul úshin talaı urys estip, arasynda taıaq ta jegen, tipti, jeti aılyǵynda úsh aýdarylyp turǵan kólik apatynan da aman qalǵan qyz náresteni ómirge ákeldi. Sóıtip, súıiktisi Erlannyń ómirin osylaı jalǵady.
Osymen: «Apa, kóp jylaı berme. Tek qyzdardan habar alshy», dep túsine mazasyzdana jıi kiretin Erlan da tynshydy. Alty aı boıy qulaǵynan ketpegen shyryldaǵan sábı daýsynyń syryn Erlannyń anasy endi uǵyndy. Bes jasar nemeresimen ańsaı jolyqqan olar qazir ony alaqandaryna salyp otyr. Almaty men Aqtaý arasy, ıaǵnı nekesin perishte qıǵan eki jas – Erlan men Asyldyń ata-analary jáne kishkentaı uly jıi qatynaıtyn týystyq jolyna aınaldy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
