Kórshińiz kim?
Seısenbi, 5 aqpan 2013 7:19
Biz ony Jenıa deımiz. Aýlamyzdaǵy eń aqkóńil adam da, sirá, osy uzyn boıly aqsary jigit aǵasy shyǵar. Qaratorǵaıdyń uıasyndaı keýdeńdi qysqan páterden bas saýǵalap, esiktiń aldyndaǵy oryndyqqa otyrsam, avtoturaqqa kóligin «qańtaryp» kele jatqan ol anadaı jerden qol bulǵap, ańqyldaı amandasady.
Kisiler, ádette, amandasqan soń kóp aıaldamaı ótip ketedi ǵoı, al ol qol alysyp, hal-jaǵdaı suraspaıynsha kóńili kónshimeıdi. Jáne ózimsingendeı qasyńa jalp etip otyra ketip, erteli beri qaıda barǵanyn, ne istegenin táptishteı bastaıdy.
Seısenbi, 5 aqpan 2013 7:19
Biz ony Jenıa deımiz. Aýlamyzdaǵy eń aqkóńil adam da, sirá, osy uzyn boıly aqsary jigit aǵasy shyǵar. Qaratorǵaıdyń uıasyndaı keýdeńdi qysqan páterden bas saýǵalap, esiktiń aldyndaǵy oryndyqqa otyrsam, avtoturaqqa kóligin «qańtaryp» kele jatqan ol anadaı jerden qol bulǵap, ańqyldaı amandasady.
Kisiler, ádette, amandasqan soń kóp aıaldamaı ótip ketedi ǵoı, al ol qol alysyp, hal-jaǵdaı suraspaıynsha kóńili kónshimeıdi. Jáne ózimsingendeı qasyńa jalp etip otyra ketip, erteli beri qaıda barǵanyn, ne istegenin táptishteı bastaıdy.
Biraz boldy, bizdiń Jekeń shaǵyn dúken ashýdyń sharýasymen áýre bolyp júr. «Áýre bolyp» degende, tońmoıyn sheneýnikterdiń kedergilerine tap bolyp, qınalyp júrgen joq, jeke ıgiliktiń isimen de sharshaýdyń bir rahaty bar emes pe, onyki – sol.
Jaqyn jerdegi kóp qabatty turǵyn úıdiń birinshi qabatynan páter satyp alyp, sony áıeli ekeýi balalar kıimin satatyn dúkenge aınaldyrdy. Jenıanyń otbasynyń kóp kúni sony jóndep, árleýdiń sarsańymen ótti. Almatydaǵy avtosalonnan sý jańa «djıp» mashınasyn satyp alyp kelgen kúngi qýanyshyn táptishtemesek, endi, mine, sol balalar kıimderine arnalǵan dúkeniniń jumysyn tııanaqtap, alǵashqy saýda-sattyqtaryna da kirisip ketti.
Oqyrmandar oılap otyrǵan shyǵar, Jenıa dep «jelpildetip» otyrǵany, bir dókeı kásipkerdiń erkesi shyǵar dep. Joq, qaıdaǵy, Jekeńniń mamandyǵy kádimgi dánekerleýshi. Toqsanynshy jyldardyń sońyna qaraı qyrǵyzdardyń Kırov sý qoımasynyń jaǵasynan salynǵan jaǵajaıda qurylysshy dánekerleýshi bolyp jumys istep júretin. Odan keıin hımııa zaýytyna aýysty.
Jenıamen áńgimelesý kórshilerge de unaıdy. Onyń aýzyn ashsa júregi kórinetin aq kóńildiligin biletin bir kórshi:
– Jeke, Sankt-Peterbýrgtegi qyzyńa aıtshy, biz jaqynda sol jaqqa barǵaly otyrmyz. Ermıtajdy aralatyp, Qysqy saraıdy kórsetsin. Neva boıyn jaǵalatsyn. Áıtpese, kim biledi, bóten qala, tanymaıtyn adamdar, – deıdi jorta kúmiljip.
Jenıanyń aspan tústes kózi kúlimdep, eki ezýi eki jaǵyna jaıyla túsedi.
– Joq, ol jaqta eshkim tıispeıdi. Men jaqynda baryp qaıttym. Kóshede kele jatsam, aldymda «Alǵa, Qazaqstan!» degen jazýy bar fýtbolka kıgen bir qazaq jigiti ketip bara jatyr. «Qaıdansyń?» desem, «Almatydanmyn» deıdi. Sizder qashan barasyzdar?
– Qudaı qalasa, kelesi jyly dep otyrmyz.
– Onda ýaqyt bar eken. Bilesiz be, Sankt-Peterbýrgte Jambyldyń kóshesi men eskertkishi bar. Men qasyna sýretke tústim.
Jenıa Qazaqstanǵa kezinde Altaı óńirinen kóship kelgen. Reseıdiń Kemerov oblysyn jıi esine alady. Qazaqtan shyqqan gýbernator Aman Tóleevti qatty qurmetteıtinderdiń biri.
Birde Jenıa júrgizýshilik kýáligin kórsetip, jelpinip otyrǵanda, onyń ata-teginiń «Shkedov» ekenin baıqap qaldym:
– Oý, Jeke, mynaý oryssha famılııaǵa uqsamaıdy ǵoı.
– Durys aıtasyz. Mundaı aty-jónder polıaktarda kezdesedi. Erterekte qýǵyn-súrgin kórgen polıaktardyń bir parasy Altaı baryp turaqtasa kerek.
Osydan bes-alty jyl buryn bolar, meni Jekeńniń qatty «qorqytqany» da bar. Ádettegideı aýladaǵy oryndyqta áńgime-dúken quryp otyrǵanbyz.
– Altaıǵa kóshem-aý deımin, – deıdi Jekeń aı-shaı joq.
Túrine qarasam, kúıki tirlikten ábden qajyǵan adam. Qazaqqa tán qalpy bar, jaıdary Jenıanyń ol jaqta kórshilerin saǵynyp kóńili budan da jaman qulazıtynyn oılap:
– Qoı, olaı deme. Bul jaqta kimnen jamandyq kórip otyrsyń? – degenmin.
– Já, myna ónbeıtin tirlik sharshatyp jiberdi.
Shynynda ol bir Jenıanyń jumysy júrmeı, tabysy ónbeı, keıde «silteńkirep» te qoıatyn kezi edi. Sondyqtan sabyrǵa shaqyrýǵa týra keldi.
– Ol jaqtaǵylar jetisip júr deısiń be? Áne, kezinde Germanııaǵa, Reseıge kóship ketkender qaıta oralyp jatyr. Tipti, kórshilerimen jylap kórisýde. Sen de solar qusap ary-beri sandalmaı turǵanyńda ózińdi óziń qolǵa al, sharýańdy túze.
Evgenıı úndegen joq. Endi, mine, sol Jenıa-Jekeń kórshileri minbegen «temir tulpardy» minip, kórshileriniń túsine kirmegen shaǵyn dúkenniń qojaıyny bolyp shyǵa keldi.
Birde teledıdardan Elbasynyń: «Men halqymnyń qolynda úsh kilti – páteriniń, máshınesiniń jáne jeke menshik kásipornynyń kilti bolǵanyn armandaımyn», degen sózin estip edim. Bizdiń Jekeń Elbasynyń sol armanyna qol jetkizgen qazaqstandyqtardyń biri. Eldegi aýyzbirliktiń, tatýlyqtyń, tynyshtyq pen beımaral tirshiliktiń jáne aq-adal eńbeginiń arqasy, árıne.
Bir qyzyǵy, dúnıe bitse de Evgenııdiń minezi sol qalpy. Kóligin «qańtara» salady da kórshilerge sálemdesip, qaıda barǵanyn, ne istegenin ejelgi ádetimen táptishteı bastaıdy.
О́z basym áli kúnge deıin mundaı elgezek, mundaı aqjarqyn kórshini kezdestirmeppin. Shirkin, qazaqstandyqtardyń bári bizdiń Jenıa-Jekeńdeı bolsa ǵoı.
Aıtpaqshy, sizdiń kórshińiz kim?
Kósemáli SÁTTIBAIULY,
«Egemen Qazaqstan».
TARAZ.
