Atalǵan kezdesýge «Aýyl» Halyqtyq demokratııalyq-patrıottyq partııasynyń tóraǵasy, Parlament Senatynyń depýtaty Álı Bektaev, «Aýyl» Halyqtyq demokratııalyq-patrıottyq partııasy Jambyl oblystyq fılıalynyń saıası keńes músheleri, oblystyq jáne aýdandyq máslıhattyń depýtattary, «Aýyl» Halyqtyq demokratııalyq-patrıottyq partııasynyń qalalyq jáne aýdandyq fılıaldarynyń tóraǵalary, kásipkerler, professor-oqytýshylar quramy men stýdentter qatysty.
Áýeli «Aýyl» partııasynyń tóraǵasy Álı Bektaev Qazaqstan Respýblıkasynyń Prezıdenttigine kandıdat Tóleýtaı Raqymbekovtiń saılaýaldy baǵdarlamasymen tanystyryp, partııanyń qazirgi jumystaryna toqtaldy. Sonymen qatar, saılaýaldy baǵdarlamada aıtylǵan Qazaqstannyń agroónerkásiptik keshenin damytý – halyqtyń ál-aýqatyn arttyrýdyń kilti, aýyldar men qalalardyń áleýmettik teńdigi – qoǵamnyń ózekti máselelerin sheshý múmkindigi, dástúrli jáne rýhanı qundylyqtardy saqtaý – el damýynyń senimdi negizi jáne aýyldaǵy jastar saıasatynyń tıimdi modeli – aýyldy órkendetýdiń quraly syndy máseleler de keńinen talqylandy. Árbir qatysýshy baǵdarlamaǵa sáıkes óziniń pikirin bildirip, onyń mańyzdylyǵyn atap ótti.
Budan keıin «Aýyl» Halyqtyq demokratııalyq-patrıottyq partııasy Jambyl oblystyq fılıalynyń saıası keńes múshesi, «Qazaq sý sharýashylyǵy ǵylymı-zertteý ınstıtýty» jaýapkershiligi shekteýli seriktestiginiń Bas dırektory Nurlan Balǵabaev jáne «Aýyl» partııasy Taraz qalalyq fılıalynyń tóraǵasy Qaırat Baıjanov sóz alyp, elimizdegi eń iri saıası naýqanǵa baılanysty óz oılaryn bildirdi. Jıyn sońynda «Aýyl» Halyqtyq demokratııalyq-patrıottyq partııasynyń tóraǵasy Álı Bektaev partııanyń qalalyq jáne aýdandyq tóraǵalarymen kezdesti.
