Búgingi tańda Jambyl oblysynda 44100 kóp balaly otbasy bar bolsa, onyń 70 paıyzy aýyl turǵyndary eken. Sondyqtan da aýdandarda turatyn otbasylarǵa nazar aýdarý mańyzdy másele. Bul oraıda Qarataý qalasynan páter ıelengen azamattardyń basym bóligi de kóp balaly otbasyna jatady. Máselen, bes balanyń anasy Lázzat Raıymqulova 2013 jyldan beri páter kezeginde turǵan. «Kóp balaly ana retinde 6 jyldan beri páter kezeginde turdym. Qarataý qalasynan osy ýaqytqa deıin páter jaldap keldik. Endi, mine, memleket qamqorlyǵy arqyly baspanaly bolyp, qýanyp jatyrmyz», deıdi ol. Baspanaly bolǵan Elmıra Aqjanova da qýanyshymen bólisti. Joldasy Erlan Kópesov ekeýi 2013 jyldan beri páter kezeginde turǵan eken. «Memlekettiń qoldaýyna rızamyn. Kóp balaly otbasy retinde tıisti járdemaqyny da ýaqtyly alyp kelemiz. Bul da biz úshin úlken kómek. Áıtpese osy ýaqytqa deıin aıyna 10-15 myń teńge tólep, páter jaldap kún kórdik», deıdi E.Aqjanova.
Aıta keteıik, Talas aýdany boıynsha 2018-2019 jyldary barlyǵy 440 páterdi quraıtyn 6 kópqabatty turǵyn úıdi qaıta jańǵyrtý josparlansa, búginde 290 páter paıdalanýǵa berilgen. Al aǵymdaǵy jyly taǵy da 2 turǵyn úı, ıaǵnı 150 páter paıdalanýǵa beriletin bolady. Bul óz kezeginde aýdan boıynsha turǵyn úı kezeginde turǵan 143 áleýmettik az qamtylǵan otbasyn baspanamen qamtýǵa baǵyttalady dep josparlanǵan.
