«Aq jol» demokratııalyq partııasy usynǵan prezıdenttikke kandıdat Danııa Espaevanyń saılaýaldy aımaqtyq shtaby Atyraý qalasyndaǵy «Raýan Nalko» kásipornynyń ujymymen kezdesti. Bul «Raýan Nalko» JShS – munaı-gaz óndirisine arnalǵan hımııalyq reagentterdi óndirýshi, álemniń 160 elin qamtıtyn halyqaralyq «Nalko Chempıon» (Nalco Champion) kompanııasymen birlesken otandyq kásiporyn.
Kezdesýdi kásiporyn dırektory Baýyrjan Ájiǵalıev ashyp, kásiporynnyń qazirgi áleýeti týraly habardar etti. Budan keıin «Aq jol» demokratııalyq partııasy oblystyq fılıalynyń jetekshisi Ermekqalı Iýsýpov kandıdattyń baǵyt-baǵdarlary jáne saılaýaldy maqsattarymen bólisti. Ol D.Espaeva baǵdarlamasynyń basty baǵytynyń biri kásipkerlikke qoldaý kórsetý ekenin, ónerkásipti órkendetýge dem berý el ekonomıkasyn kóteretinin atap ótti.
Sondaı-aq jıynda oblystyq fılıaldyń saıası jetekshisi Ábilhan Tóleýishov, oblystyq saıası keńestiń múshesi Serik Erýbaev sóz sóılep, barsha jınalǵandardy úmitkerdi qoldaýǵa shaqyrdy. Kásiporyn jumysshylary ózderin qyzyqtyrǵan suraqtaryn qoıyp, oǵan tushymdy jaýaptaryn aldy.
Al búgin kandıdat D.Espaeva respýblıkalyq shtab múshelerimen birge Qostanaı oblysyna jol tartady. Olardyń arasynda Májilis depýtaty Erlan Barlybaev ta bolady. Nasıhatshylar toby Y.Altynsarın aýylyna atbasyn buryp, sondaǵy aýyldardy, «Temte» ÁKK soǵymdyq ornyn, mashına-traktor sheberhanasyn, «Olja-Belıavka» JShS, Selantev orta mektebin aralap, saılaýshylarmen kezdesedi.
* * *
«Aýyl» halyqtyq-demokratııalyq patrıottyq partııasy atynan saılaýǵa qatysyp jatqan Tóleýtaı Raqymbekov Nur-Sultan qalasynda S.Seıfýllın atyndaǵy qazaq Agrotehnıkalyq ýnıversıtetiniń ujymymen kezdesti. Kandıdattyń bul oqý ornyna kelýi beker emes. О́ıtkeni bul jerde tek aýyl sharýashylyǵy mamandaryn daıarlap qana qoımaı, salaǵa qajetti ozyq ǵylymı jobalar jasalady. Ásirese ımmýndy hımııa, taǵam mıkrobıologııasy jáne topyraqty taldaý baǵyttarynda teńdessiz bastamalar bar. Biraq ony óndiriske engizý ońaı bolmaı tur. T.Raqymbekov óz baǵdarlamasynda osyndaı jobalardy óndiriste keńinen qoldanýǵa erekshe basymdyq bergen. Buǵan qosa ǵylymı jumystardy qarjylandyrýdy kúsheıtý kerek deıdi. Sebebi eksporttalatyn taýarlar saraptamasynyń ózine mıllıondaǵan qarjy shetelge shashylady. Al eger osy zerthanalar jumysyn júıelesek, qansha qarajatty ózimizde qaldyrýǵa bolatynyn alǵa tartady úmitker.
T.Raqymbektovtiń saılaýaldy baǵdarlamasy tek aýyl sharýashylyǵymen ǵana shektelmeıdi. Onda jumyssyzdyqpen kúres, baspana máselesi jáne ınfraqurylymdy damytýǵa qatysty da tetikter bar. Bul ýnıversıtet qabyrǵasynda ótken jıynda jan-jaqty talqylandy.
Sonymen qatar Almaty qalasynda О́.Ospanov atyndaǵy Qazaq topyraqtaný jáne agrohımııa ǵylymı-zertteý ınstıtýtynda kezdesý ótip, agrarlyq sala ǵalymdary baıandama jasap, azyq-túlik qaýipsizdigi jahandyq máselege aınalyp bara jatqanyn atap ótti. Dóńgelek ústel barysynda qatysýshylarǵa ulttyq jáne aımaqtyq erekshelikterge qaraı qazaqstandyq azyq-túlik qaýipsizdigi standarttaryn ázirleý jóninde usynystar aıtyldy. Sol otyrysqa jınalǵandar kandıdat T.Raqymbekovtiń saılaýaldy baǵdarlamasyn talqylap, saılaýda qoldaý bildiretinderin jetkizdi.
* * *
Kásipodaqtar federasııasynan kandıdat Amankeldi Taspıhovtyń Túrkistan oblysy jáne Shymkent qalasy boıynsha qoǵamdyq shtabynyń basshysy Berik Bekjanov bastaǵan top Túlkibas aýdanyna taban tiredi. Nasıhatshylar toby Sosıalıstik Eńbek Eri Mántaı Jarymbetovtiń atymen atalatyn sharýa qojalyǵynda aýyl sharýashylyǵy eńbekkerlerinen jáne bilim berý, mádenıet, kitaphana qyzmetkerlerinen quralǵan 150 adamnyń basyn qosty. Aýdannyń brendi sanalatyn alma baǵynda B.Bekjanov bul saıası naýqannyń memleket tarıhyndaǵy mańyzdylyǵyna toqtalyp, jınalǵan kópshilikti saılaýda belsendilik tanytyp, daýys berý quqyn tıimdi paıdalanýǵa shaqyrdy. Saılaýaldy sharaǵa salalyq kásipodaq basshylary Bastarbek Pirimbetov, Barlybaı Qýandyqov, Gúldar Esebaeva, Tımýr Júnisov te atsalysty.
Sondaı-aq jıynda sóz alǵan bilim salasynyń qyzmetkerleri Erjan Maqashev pen Gaýhar Meńdibaeva kásipodaq atynan asa mártebeli laýazymǵa usynylyp otyrǵan kandıdatqa tileýlestik bildirip, elimizdiń táýelsizdik jyldary jetken jetistikteri men Qazaqstannyń jarqyn keleshegi týraly oı-pikirlerin ortaǵa saldy. Kezdesýge kelgen jurt kásipodaq uıymynyń bolashaqtaǵy josparlarymen tanysyp, jańa múmkindikterge qanyqty. Emin-erkin, ashyq-jarqyn jaǵdaıda ótken sharada jınalǵandar shtab múshelerinen kóńilderin kúpti etken saýaldarǵa jaýap alyp tarqasty.
Al «Keleshek» jastar qanatynyń músheleri Túrkistan qalasynda halyqqa nasıhat paraqshalary men A.Taspıhovtyń saılaýaldy baǵdarlamasy bar kitapshalaryn taratty. Kıeli shahardaǵy Q.A.Iаsaýı kesenesi, ortalyq saıabaq, «Rámizder alańy» alleıasy sııaqty halyq kóp shoǵyrlanǵan oryndarǵa baryp zııarat etip kelgen soń jurtshylyq pen qala turǵyndaryna kandıdattyń ustanymdaryn tanystyrdy.
* * *
Qazaqstan Kommýnıstik halyq partııasynan kandıdat retinde tirkelgen Jambyl Ahmetbekovtiń saılaýaldy qoǵamdyq shtaby Nur-Sultan qalasyndaǵy Astana elektrtehnıkalyq zaýytynyń eńbek ujymymen kezdesti. Elordadaǵy shtabtyń jetekshisi Nurdáýlet Orazhanov bul zaýyt elimizdegi elektrtehnıkalyq qurylǵylar óndiretin aldyńǵy qatarly kásiporyn ekenin, onyń ónimderi óndiris salasynda qashanda suranysqa ıe ekenin atap ótti. Qalalyq komıtet jetekshisi saılaýaldy baǵdarlamany tanystyryp, barlyq baǵyttaryn qysqasha mazmundap berdi. Ol QKHP únemi qarapaıym azamattardyń múddesin qorǵaýǵa basymdyq berip otyratyndyǵyn atap ótti.
«Kommýnıstik halyq partııasy memlekettik deńgeıde qarapaıym halyq múddesin qorǵaý boıynsha jumys atqaryp keledi. Kommýnıster halyqpen tyǵyz baılanysta jumys istep, kópshiliktiń shaǵymdaryn qarastyryp, memlekettik organdar men mınıstrlikterge áleýmettik sıpattaǵy máseleler boıynsha depýtattyq saýaldar joldaıdy. Elimizdiń jer-jerindegi saılaýshylar bizdiń ekonomıkadaǵy, áleýmettik-saıası ómirdegi ustanymymyzdy qoldaıtynyna senemiz. Sondyqtan Qazaqstan Prezıdentin saılaýda bizdiń úmitkerge daýys berýge shaqyramyz», dedi N.Orazhanov.
Qatysýshylar azyq-túlik pen kópshilik qoldanatyn taýar baǵasynyń ósýi, medısınalyq qyzmettiń sapasy, baspana, zeınetaqy júıesi, jalpy álemdegi jáne eldegi ekonomıkalyq jaǵdaı tóńireginde suraqtar qoıdy.
Elordadaǵy partııanyń shtaby úgit-nasıhat jumysyn belsendi atqaryp jatyr. Shtab keńsesi jýrnalıster jáne sarapshylarmen tyǵyz baılanysta, úgit-nasıhat materıaldary jetkilikti jáne saılaýaldy komandasynyń músheleri qajetti túsindirý jumystaryn júrgizýge daıyn.
* * *
Nur Otan partııasynan prezıdenttikke kandıdat Qasym-Jomart Toqaevtyń respýblıkalyq qoǵamdyq shtab músheleri Soltústik Qazaqstan oblysyna bardy. Aımaq negizinen halyqty azyq-túlik qaýipsizdik bazasymen, jeńil jáne aýyl sharýashylyǵy ónimderimen qamtamasyz etip otyr. Bul týraly Nur Otan partııasy shtabynyń jetekshisi Máýlen Áshimbaev Petropavl qalasyndaǵy Oqýshylar saraıynda oblys aktıviniń aldynda sóılegen sózinde aıtty. Ol prezıdenttikke kandıdattyń saılaýaldy baǵdarlamasyna jan-jaqty toqtaldy.
«Elimiz boıynsha joǵary sapaly kólik joldaryn salý jáne jóndeý, barlyq apatty jaǵdaıdaǵy mektepterdi paıdalanýdan shyǵarý josparlanyp otyr. Sonymen qatar 650 myń otbasynyń baspana máselesin sheship, dárigerler men muǵalimderdiń eńbekaqysyn kóterý, bilim berý sapasyn jaqsartý jáne álemniń eń úzdik JOO-larynda oqýǵa múmkindik jasaý – munyń barlyǵy órleýge aparatyn jol. Bul bizdiń kandıdatymyzdyń saılaýaldy baǵdarlamasynda egjeı-tegjeıli qamtylǵan», dedi Máýlen Áshimbaev.
Buǵan qosa respýblıkalyq shtab atbasyn tiregen kelesi nysan Soltústik Qazaqstan oblysyndaǵy «Zenchenko jáne K» aýyl sharýashylyǵy kásiporny boldy. Shtab músheleri elimizde agroónerkásiptik keshenniń básekege qabilettiligin arttyryp, aýyldyqtardyń ómir súrý sapasyn jaqsartýǵa, aýylda turýdy jyldan-jylǵa jaıly etýge barlyq jaǵdaı jasalyp jatqanyna toqtaldy. Sonymen qatar shtab músheleri prezıdenttikke kandıdat Q.Toqaevtyń saılaýaldy baǵdarlamasynda «Aýyl – el besigi» jobasy boıynsha aýylsharýashylyq salasyn qoldaý men damytýǵa erekshe kóńil bólip otyrǵanyn jetkizdi.
* * *
«Ult taǵdyry» ulttyq-patrıottyq qozǵalysynan prezıdenttikke kandıdat Ámirjan Qosanovtyń qoǵamdyq shtaby elordadaǵy Ortalyq bazarda úgit-nasıhat jumysyn júrgizdi. Aksııaǵa stýdentter, belsendi jastar qatysyp, bazardaǵy júzdegen turǵyndar men astana qonaqtaryna óz kandıdattarynyń saılaýaldy tuǵyrnamasyn túsindirdi. Qatysýshylar paraqshalarǵa basylǵan naýqandyq materıaldardy taratyp, suraqtaryna jaýap berip, turǵyndarmen sýretke túsip jatty. Ári-beri ótken jurt kandıdattyń ustanymdaryna qyzyǵýshylyq tanytyp, ózderi de halyqtyń áleýmettik máselelerin sheshýge qatysty usynystaryn bildirdi.
Al qaladaǵy Áýezov pen Máskeý kósheleriniń qıylysyndaǵy alleıada jastar fleshmoby ótkizildi. Aq fýtbolka kıgen eriktiler «Tańdaý – Qosanov» degen aksııada úgit-nasıhat materıaldaryn úlestirip, kandıdat ustanymynyń baǵyttaryn túsindirdi, turǵyndarmen sýretke tústi, saılaýaldy urandarymen án shyrqap, jınalǵandardy jigerlendirdi. Mundaı qoldaýshy belsendi jastar tek elordada emes, basqa qalalardan da tabylyp jatyr.
Sonymen qatar Á.Qosanovtyń senim bildirilgen adamdary Oral qalasyndaǵy qarttar men múgedekterge arnalǵan ınternat úıiniń turǵyndarymen kezdesý ótkizdi. Jınalǵan qaýymnyń barlyq suraqtary jáne tilekteri eskerilip, qarttar men múgedekterdiń máseleleri keńinen talqylandy. Olarǵa kandıdattyń saılaýaldy tuǵyrnamasynda kóterilgen baǵyttar týraly aıtylyp, atalǵan máseleler boıynsha shtab ókilderi aldaǵy jumys barysynda sheshimder qabyldaýǵa ýáde berdi.
* * *
«Uly dala qyrandary» respýblıkalyq qozǵalysynan kandıdat Sádibek Túgeldiń senim bildirilgen adamdary Aqkól qalasynda asyq atýdan týrnır ótkizdi. Qaladaǵy agrotehnıkalyq kolledj stýdentteri arasynda ótken saıysta jastar shapshańdyq pen dál atyp tıgizýden sheberlikterin kórsetti.
«Bul oıyn túri IýNESKO-nyń mádenı muralar tizimine engizilgenin aıta ketýimiz kerek. Ulttyq oıyndarymyzdy tek saıys úshin emes, ulttyq qundylyqtarymyzdy qadirlep, ata-babamyzdan kele jatqan salt-dástúrimizdi kózdiń qarashyǵyndaı saqtap, qasterleı bilýge dáripteý úshin uıymdastyrý kerek. Bul oıynnyń osy kúnge deıin umytylmaı, úzilmeı jalǵasyp kele jatqany urpaqtar sabaqtastyǵyn kórsetedi. Ulttyq oıyndarymyzdy jańǵyrta bilsek, bul bizdiń ótkendi umytpaǵanymyzdyń belgisi. Urpaq boıyna asyl qazynalarymyzdy ulttyq tárbıe arqyly sińire alamyz», dep sanaıdy prezıdenttikten úmitker, jazýshy, Ulttyq at sporty oıyndary federasııasynyń prezıdenti S.Túgel.
Al kandıdattyń senimdi ókili Erbolat Sezhan «Dál kózdeı bilý, ıkemdilik pen shapshańdyqty qajet etetin qazaqtyń ejelden kele jatqan asyq atý oıyny basqa sport túrlerindeı arnaıy alań men qomaqty qarajat salýdy qajet etpeıdi. Eń negizgisi – ynta men qyzyǵýshylyq. Resmı derekter boıynsha bul oıyndy elimizde 80 myńdaı adam oınaıdy eken», dedi.
Memlekettik tildiń mártebesin bıiktetip, tuǵyryn nyqtaýdy maqsat etken S.Túgeldiń saılaýaldy shtaby uıymdastyrǵan týrnırde qazaq tilin jetik meńgergen Aqkól qalasynyń jas turǵyny Rústem Ledenov jeńimpaz boldy.
Daıyndaǵan Orynbek О́TEMURAT,
«Egemen Qazaqstan»
