Olardyń sózine qaraǵanda, árbir saılaý ýchaskesi boıynsha saılaýshylar tizimderin saılaý komıssııalaryna tıisti ákimdikter daýys berý bastalardan jıyrma kún buryn, ıaǵnı 2019 jylǵy 20 mamyrda bergen. Mine, osy tizimderge saı qazir saılaýshylardyń jalpy sany 11 947 995-ti qurap otyr. Al saılaýshylar turǵylyqty jeri boıynsha qurylǵan saılaý ýchaskelerinde on bes kún ishinde ózderiniń tizimde bar-joǵyn bile alady. Derekteriniń anyq emestigine jol berilgen, tizimge engizilmegen, durys engizilmegen nemese shyǵarylǵandyǵyna baılanysty shaǵymdaný múmkindigi qamtamasyz etiledi.
Budan keıin sóz alǵan Ortalyq saılaý komıssııasynyń hatshysy Sábıla Mustafına 2019 jylǵy 20 mamyrda saılaý ýchaskelerine tıisti ákimder qol qoıǵan saılaýshylardyń tizimderi jetkizilgenin habarlady. Al saılaý bıýlletenderi «Qazaqstan Respýblıkasyndaǵy saılaý týraly» Konstıtýsııalyq zańnyń 37-baby 2-tarmaǵyna sáıkes saılaýshylardyń jalpy sanynyń 1 paıyzy rezervimen saılaýshylardyń sanyna teń mólsherde daıyndalady. Demek, 12 067 475 saılaý bıýlletenin daıyndaý qajet.
Sonymen qatar, bıýlletenderdi qoldan jasaýdan jáne tıisinshe olardy burmalaýdan qorǵaýdy qamtamasyz etý maqsatynda saılaý bıýlletenderiniń qorǵalý dárejesi belgilengen. Saılaý bıýlletenderin oblystyq, respýblıkalyq mańyzy bar qalalardyń, astananyń saılaý komıssııalaryna jetkizý arnaıy baılanyspen júzege asyrylady. Oblystyq, respýblıkalyq mańyzy bar qalalar men astananyń saılaý komıssııalaryna saılaý bıýlletenderin úsh kúnnen, ıaǵnı 6 maýsymnan erte emes jáne saılaýǵa deıin bir kúnnen, ıaǵnı 8 maýsymnan keshiktirmeı jetkizýdi qamtamasyz etý qajet, dedi baıandamashy.
Al «2019 jylǵy 9 maýsymǵa taǵaıyndalǵan Qazaqstan Respýblıkasy Prezıdentiniń kezekten tys saılaýyna halyqaralyq uıym baıqaýshysyn akkredıtteýdiń kúshin joıý týraly» másele boıynsha Ortalyq saılaý komıssııasynyń múshesi Záýresh Baımoldına shet memleketterdiń jáne halyqaralyq uıymdardyń baıqaýshylaryn akkredıtteýdiń kúshin joıýdy Syrtqy ister mınıstrliginiń usynýy boıynsha Ortalyq saılaý komıssııasy júzege asyratynyn aıtty. Soǵan sáıkes EQYU/DIAQB-nyń Saılaýdy baıqaý jónindegi mıssııasy hatynyń jáne Qazaqstan Respýblıkasy Syrtqy ister mınıstrliginiń usynymy negizinde EQYU/DIAQB-nyń Saılaýdy baıqaý jónindegi mıssııasynyń baıqaýshysy Aleksandr Djon Folksty akkredıtteýdiń kúshin joıý jáne kýáligin keri qaıtaryp alý týraly qaýly qabyldanǵan.
Mine, osyǵan baılanysty baıqaýshylar tiziminen «EQYU/DIAQB-nyń Saılaýdy baıqaý jónindegi mıssııasy» bóliminde rettik nómiri 40 «7. Alexander Jonh Folkes» degen jol alynyp tastalǵan.
Budan ári Záýresh Baımoldına halyqaralyq uıymdar men shet memleketterdiń baıqaýshylaryn akkredıtteý týraly aıta kelip, Syrtqy ister mınıstrliginen birqatar mıssııanyń baıqaýshylaryn akkredıtteýge usynystar (43) túskenin jetkizdi. Sonymen qatar Armenııa, Bolgarııa, Grýzııa, Malaızııa, Moldova, Latvııa, Reseı Federasııasy jáne Túrkııanyń ortalyq saılaý organdarynyń ókilderi bolyp tabylatyn 16 baıqaýshy usynylǵanyn kóldeneń tartty. Barlyǵy 59 baıqaýshy akkredıtteýge usynylyp otyr eken. Akkredıtteýge usynymdardyń túsýine qaraı baıqaýshylar jónindegi derekter jańartylady, deıdi Z.Baımoldına. Shet memleketter men halyqaralyq uıymdardyń baıqaýshylaryn akkredıtteýdi Ortsaılaýkom 2019 jylǵy 3 maýsym kúngi saǵat 18.00-ge deıin júzege asyrady.
