«UMC» korporatıvtik qorynyń Ana men bala ulttyq ǵylymı ortalyǵy uıymdastyryp otyrǵan sporttyq jarysqa qatysýǵa aýyr dertti jeńgen 2 men 18 jas aralyǵyndaǵy 106 baladan ótinim kelip túsken. Saıys jeńil atletıka (60 metrge júgirý), asyq atý, ústel tennısi, atý (pnevmatıkalyq vıntovkadan 10 metrge), fýtbol (mını-fýbol), shahmat (shveısarııalyq júıemen), boýlıng túrleri boıynsha «Alaý» muz saraıy men «Pıngvın» boýlıng kesheninde ótedi.
Uıymdastyrýshylar atalǵan sporttyq sharanyń qaterli isik aýrýlaryna shaldyqqan jáne aǵzalary transplanttalǵan balalardy ońaltyp, olardyń qalypty ómir saltyna oraltý, bul máselege qoǵam nazaryn aýdartý, mundaı dertterdiń emdelmeıtini týraly qate túsinikpen kúresý, medısına qyzmetkerleriniń abyroı-bedelin arttyrý maqsatynda alǵash ret iske asyrylǵaly otyrǵanyn aıtady.
Aıta keteıik, Qazaqstanda jyl saıyn orta eseppen 600-deı qaterli isik aýrýlaryna shaldyqqan bala anyqtalyp jatady. Qazirgi ýaqytta respýblıka boıynsha 4 myńǵa tarta bala dárigerlerdiń qatań baqylaýynda. Olardyń ishinde 300-deı bala qoldaý terapııasyn, ıaǵnı em-dom alyp júr. Osy turǵydan alǵanda da chempıondar oıyny balalar men olardyń ata-analary jáne emdeýshi dárigerler úshin qosymsha yntalandyrý bolmaq.
Is-sharany uıymdastyrýǵa elimizdiń sport federasııalary, Densaýlyq saqtaý mınıstrliginiń Sıfrlandyrý keńsesi, Mádenıet jáne sport mınıstrliginiń Sport jáne dene shynyqtyrý isteri jónindegi komıteti, Medısınalyq qyzmetkerleriniń kásipodaǵy, «Temirmash» Pavlodar zaýyty, «Daýa» qaıyrymdylyq qory, «О́mir syıy» naýqastar qoǵamy, eriktiler men bıznes ókilderi belsendi astalysýda.
