Jıynǵa Prezıdent Ákimshiliginiń Basshysy B.Saǵyntaev, Prezıdenttiń kómekshisi – Qaýipsizdik keńesiniń hatshysy Q.Qasymov, Premer-Mınıstrdiń birinshi orynbasary – Qarjy mınıstri Á.Smaıylov, Ulttyq ekonomıka mınıstri R.Dálenov, sondaı-aq Qorǵanys mınıstrliginiń basshylyq quramy qatysty.
Qazaqstan Prezıdenti – Joǵarǵy Bas qolbasshy Qasym-Jomart Toqaev Elbasynyń turaqty qoldaýynyń arqasynda Qazaqstanda yqsham, mobıldi jáne soǵysqa qabiletti armııa qurylǵanyn, onyń negizgi mıssııasy – memlekettiń egemendigi men aýmaǵynyń tutastyǵyn qorǵaý ekenin aıtty.
– Qarýly Kúshterdiń basshylyq quramynyń aldynda bolyp jatqan ózgeristerge beıimdelý ǵana emes, sondaı-aq aldyn alý jumystary tur. Bul qaýip-qaterlerge jan-jaqty taldaý jasaýdy talap etedi. Búginde biz geosaıası qaıshylyqtardyń shıelenise túskenine, jańa qaqtyǵystardyń paıda bolǵanyna kýá bolyp otyrmyz. Áskerı is-qımyldardy júrgizýdiń formalary men tásilderi ózgerdi, dáldigi joǵary qarýlar men basqa da zamanaýı qarý-jaraqtardyń úlesi artty. Sondyqtan men «Aıbalta» oqý-jattyǵýy kezinde Qorǵanys mınıstrine Qarýly Kúshterdi qurý jáne damytý tujyrymdamasyna tıisti ózgerister engizý jóninde tapsyrma berdim, – dedi Qazaqstan Prezıdenti.
Memleket basshysy Qorǵanys mınıstrliginiń basshylyǵyna sheshim qabyldaý ýaqytyn barynsha qysqartý úshin basqarý júıesin jańǵyrtýdy mindettedi. Sondaı-aq robottandyrý, sıfrly tehnologııa, jasandy ıntellekt jáne ushqyshsyz basqarý júıesin engizýdiń mańyzdylyǵyn aıtty.
Qazaqstan Prezıdenti jaýyngerlik daıyndyqtyń deńgeıin kóterý men shuǵyl áreket etý, áskerı bilim berý júıesin jetildirý máselelerine arnaıy toqtaldy. Onyń aıtýynsha, oqý-jattyǵý baǵdarlamalary túrli jaǵdaılardy, urys júrgizýdiń zamanaýı formalary men ádisterin, qarý-jaraq pen tehnıkanyń jańa túrlerin úıretip, qoldanýy tıis.
– Mamandardy daıarlaý jáne áskerı-patrıottyq tárbıe berý isinde bolashaq áskerı ınjenerlerdi, IT mamandaryn, robottehnıkalardy, jasandy ıntellekt boıynsha mamandardy tárbıelep shyǵarý kerek. Olar – «SMART» dep atalatyn býyn. «Jas sarbaz» qozǵalysynyń bazasynda, ásirese fızıka-matematıka boıynsha tereńdete oqytylatyn mektepterde «SMART-SARBAZ» úıirmelerin qurýdy usynamyn, – dedi Qasym-Jomart Toqaev.
Memleket basshysy kelesi aptaǵa josparlanǵan bitimgerlik jóninde ótetin forým, aldaǵy ýaqytta Qazaqstannyń belsendi bitimger-memleket retindegi mártebesin arttyryp, bul baǵyttaǵy áleýetine tyń serpin beretinin jetkizdi.
Onyń aıtýynsha, Qazaqstan jaıaý áskerlerdi ǵana jibermeı, BUU bitimgerlik mıssııasyna asa qajetti ınjener-saper, barlaýshy, dárigerler quramy jáne basqa da bólimshelerdi jiberý arqyly kókjıegin keńeıtýi qajet.
Otyrys barysynda Qasym-Jomart Toqaev áskerı tártip pen áskerılerdiń rýhyn kúsheıtý, olardy áleýmettik turǵydan qamtamasyz etý deńgeıin kóterý qajettigin atap ótti.
– 2017-2018 jyldary áskerılerdiń jalaqylary ósip, sanattyq qosymshalar tólene bastady. Jýyrda áskerı ushqyshtardyń jalaqylary eki ese artty. Jańa júıe boıynsha áskerılerdi baspanamen qamtamasyz etý máseleleri sheshilýde. Bul keste jalpy alǵanda ozyq bolǵanymen, turǵyn úı tóleminde aýytqýshylyqtar bar. Garnızondardyń turǵyn úı qoryn jańartý qajet. Máseleni qordalandyrmaı, shuǵyl sheshý kerek. Sonda ǵana áskerı qyzmettiń jáne áskerılerdiń áleýmettik mártebesin kóteremiz, – dedi Qazaqstan Prezıdenti.
Qazaqstan Respýblıkasynyń Prezıdenti – Qarýly Kúshterdiń Joǵarǵy Bas qolbasshysy is-sharadan soń Qorǵanys mınıstrliginiń strategııalyq basqarý ortalyǵynyń jumysymen tanysty.
