Spıkerlerdiń alǵashqysy bolyp sóz alǵan Aqparat jáne qoǵamdyq damý mınıstrligi Jastar jáne otbasy jónindegi komıtetiniń tóraǵasy Danııar Qojahmet Jastar jyly aıasyndaǵy atqarylyp jatqan jumystarǵa, sondaı-aq atalǵan vedomstvonyń jastar saıasaty baǵytyndaǵy mańyzdy mindetterine toqtaldy. Onyń aıtýynsha, Jastar jyly aıasynda uıymdastyrylatyn sharalarǵa elimizdegi jastardyń 70 paıyzy qamtylady. «Qalǵan 30 paıyzy mekteptiń oqýshylary nemese stýdentter bolýy múmkin. Olar osy jyly bekitilgen jumystardyń jemisin aldaǵy ýaqytta kóredi. Sondaı-aq jastardyń óz kásibin ashyp, konsýltasııalyq keńes alýyna, bıznestegi saýatyn arttyrýǵa baǵyttalǵan baǵdarlamalardy iske asyrý bastaldy. Budan bólek, ataýly jyl aıasynda jas ǵalymdarǵa kóbirek kóńil bólýdi qolǵa alyp otyrmyz. Sonyń bir dáleli – jas ǵalymdardyń joba jumystaryna 3 mıllıard teńgeniń bólinýi», dedi M.Qojahmet.
Al Tuńǵysh Prezıdent qorynyń jetekshi sarapshysy Jaqsylyq Sábıtov óz kezeginde jastar úshin ǵylymda karera jasaýdyń múmkindikteri týraly baıandady. Ol ǵalymdarǵa degen qoǵamnyń kózqarasy burynǵydan áldeqaıda ózgergenin, oǵan zamanaýı talaptardyń áser etkenin aıta kele: «Ǵalymdarǵa osyǵan deıin qaıyrshy sekildi qarap keldi. Ras, óıtkeni keıbir tarıhı ózgerister yqpal etti. Al qazir – ǵalymdardyń zamany. Sondyqtan ǵylym jolyna túsý – tabys tabýǵa, elge qyzmet etýge, qoǵamdy alǵa jyljytýǵa jáne jetistikke jetýge jaqsy múmkindik», dedi. Onyń oıynsha, laıyqty nátıje kórsetý úshin jastar ózi oqıtyn joǵary oqý ornyn aldyn ala muqııat zerttep, saralap, eń úzdigin tańdaý kerek.
Bılik, qoǵam, bıznes jáne jeke tulǵalar arasyn baılanystyratyn kópir bolýdy kózdeıtin «Serpin» bilim jáne ınnovasııa ulttyq palatasy sońǵy ýaqytta ýnıversıtet stýdentterimen ǵana emes, mektep oqýshylary jáne mektepke deıingi balalarmen jumys isteı bastaǵan. Atalǵan palata dırektory Ákim Haziretáli qolǵa alǵan isteriniń eleýlisi retinde «Samsung» kompanııasymen birlesip, baǵdarlamalaý boıynsha túrli olımpıadalar uıymdastyrylyp jatqanyn jetkizdi. «Jaqynda «Toǵyzqumalaq» federasııasymen kelisimge otyrdyq. Sol arqyly ulttyq oıyndarǵa degen balalar men jastardyń qyzyǵýshylyǵyn arttyrýdy maqsat etemiz. Toǵyzqumalaqtyń paıdasyn zertteýde onyń shahmatqa qaraǵanda júristeriniń artyqshylyqtary, aqyl-oıdy damytýǵa áser etetin erekshelikteri baryn ańǵardyq», dedi Á.Haziretáli. Onyń aıtýynsha, palata ýnıversıtetke túsetin úmitkerlerge arnalǵan múmkindikterdi jalǵastyratyn «Serpininfo» platformasyn ázirleý ústinde. Onda talapkerler jınaǵan baly boıynsha qaıda túsýge bolatynyn bile alady. Sondaı-aq Á.Haziretáli otandyq qana emes, 10-ǵa jýyq sheteldik JOO-larmen túrli memorandýmdarǵa otyrǵanyn tilge tıek etti.
Spıkerler men qatysýshylar shara sońyna qaraı pikir talastyryp, ózekti máselelerdi ortaǵa saldy. Sonyń nátıjesinde saraptama alańynyń kezekti sanynda talqylanatyn mańyzdy taqyrypty belgiledi.
