Rapıd pen blısten ótken dodada tórtkúl dúnıeniń 16 eń úzdik oıynshysy ǵana baq synady. Jarysqa qatysýshylar arasynda eń jasy kúlli qazaqstandyqtardyń maqtanyshy Jansaıa Əbdiməlik boldy. Almatylyq arý burynǵy əlem chempıondarynyń birazyn oısyrata utty.
– Meniń qarsylastarymnyń arasynda buǵan deıin əlem chempıony atanǵandary az bolǵan joq. Sol sebepti bir sekýndqa da bosańsyǵan joqpyn. Rapıdte 2017-2018 jyldardaǵy əlem chempıony Tan Chjýnıdi, sol sekildi Nanı Dzagnıdze, Irına Krýsh jəne Leı Tınszy syndy ataqty shahmatshylardy uttym. Blıste Marııa Mýzychýkty 2:0 esebimen utyp, osyǵan deıin ketken esemdi qaıtardym. Dəl sondaı eseppen Hampı Konerýdy da jeńdim – deıdi Jansaıa.
Osy jarystyń qorytyndysynan keıin Jansaıa Əbdiməliktiń blıste jıǵan upaıy 2414-ge deıin jetti. Qazirgi kezde ol ELO reıtıngi boıynsha shahmattyń barlyq túrinen 2400-den asa upaı jıǵan elimizdegi jalǵyz shahmatshy atanyp otyr.
– Jansaıa rapıd pen blısten ótken jarystyń nátıjesi boıynsha jetinshi orynǵa taban tiredi. Qytaıda ol tamasha oıyn órnegin kórsetti. Nebir myqty oıynshylardy utqan qyzymyz osy týrnırdiń favorıti sanalǵan jergilikti oıynshy Leı Tınszymen teń tústi. Al álemniń eks-chempıony, ataqty Aleksandra Kostenıýk Jansaıadan jeńilgennen keıin qolda turǵan altynnan aıyryldy, – deıdi Qazaqstan shahmat federasııasynyń atqarýshy dırektory Irına Grıshenko.
