«Aq jol» demokratııalyq partııasy usynǵan prezıdenttikke kandıdat Danııa Espaeva saılaýaldy naýqan barysynda Aqmola oblysyndaǵy Shortandy aýylyna bardy. Bul is-sharany uıymdastyrýǵa oblystyq aımaqtyq shtab muryndyq boldy. Oǵan respýblıkalyq shtab músheleri Dmıtrıı Vasılev, Merýert Qazbekova jáne partııanyń aımaqtyq belsendileri qatysty.
Úgitshiler toby aldymen A.Baraev atyndaǵy Astyq sharýashylyǵynyń ǵylymı-ónerkásip ortalyǵyna soqty. Ortalyqtaǵy suryptaý zertteýi nátıjesinde bıdaı, arpa, tary jáne basqa da daqyldardyń 60-qa jýyq jańa túri shyǵaryldy. Otandyq suryptaý sorttary kúnnen-kúnge qoldanys aıasyn keńeıtip keledi. D.Espaeva ortalyqtyń sońǵy jetistikterimen tanysyp, ǵylymı jańalyqtarǵa qol jetkizý úshin ǵalymdarǵa ne qajet ekenin surap bildi.
Budan soń «Aq jol» partııasynyń úmitkeri Shortandy aýdanynyń bıýdjettik qyzmetkerlerimen jáne kásipkerlerimen kezdesti. Aýdandaǵy 1300-deı adam shaǵyn jáne orta bıznespen aınalysady. Olardyń 40 paıyzy – áıelder. Aýdanda qyzmet kórsetý salasy jaqsy damyǵan. Kandıdat jınalǵan qaýymǵa saılaýaldy baǵdarlamasyn tanystyryp, ekonomıkanyń basym salalary úshin tómendetilgen qosymsha qun salyǵy mólsherlemesin engizý sııaqty usynystaryn aıtty.
«Dál osyndaı eldi mekenderde bıznesti kóbine áıelder ashady. Nandy pisiretin kim? Shashtaraz ashatyn kim? Sulýlyq salonyn ashatyn kim? Árıne, áıelder. Men úshin myna zalda otyrǵan áıelder meniń kandıdatýramdy oń qabyldaǵany mańyzdy. О́zimdi elimizdiń basty laýazymyna usyný arqyly ózim úshin ǵana emes, barlyq qazaqstandyq áıelder úshin batyl qadam jasadym», dedi D.Espaeva.
* * *
«Aýyl» halyqtyq-demokratııalyq patrıottyq partııasy atynan prezıdenttik saılaýǵa túsip jatqan Tóleýtaı Raqymbekovti Taldyqorǵan jastary qoldady. Kandıdattyń saılaýaldy baǵdarlamasyndaǵy «Jastar saıasatyn nyqtap qolǵa alý kerek. Ásirese, bilim berý, turǵyn úı, jumysqa ornalasý jáne tálim-tárbıege qatysty máselelerge beıjaı qaraýǵa bolmaıdy» dep kórsetilgen baǵyttar Almaty oblysynda keńinen talqylandy.
Prezıdenttikten úmitker T.Raqymbekov baı rýhanı muramyzdy saqtap, ony jas urpaqtyń sanasyna sińirý joldaryn usyndy. О́ıtkeni qazirgi jahandaný dáýirinde jas tolqynnyń jat mádenıetke jutylyp ketý qaýpi bar dep sanaıdy. Osy baǵytty ashyp kórsetý úshin Taldyqorǵan qalasynyń qaq tórinde arnaıy fleshmob uıymdastyryldy. Jergilikti qyz-jigitter ulttyq bıimizdi erekshe naqyshta oryndap shyqty.
«Jastar saıasatyn bir jolǵa qoıý ulttyq qundylyqtardy saqtaýdan ǵana turmaıdy. Onyń ishinde bilim alý, jumysqa turý jáne baspana máseleleri de sheshimin tabý kerek. Sonyń arqasynda ǵana qazirgi jappaı ýrbanızasııany toqtatýǵa bolady. Áıtpese, joǵary jalaqy izdegen jastar aýyldaryn tastap, iri qalalarǵa qaraı aǵylyp jatyr. Munyń arty aýyldyń turmys-tirshiligine keri áserin tıgizeri sózsiz», dedi T.Raqymbekov. Aksııa aıasynda kandıdattyń óńirlik shtabynyń ókilderi saılaýaldy baǵdarlamany qala turǵyndaryna taratyp, onyń negizgi baǵyttaryn túsindirdi.
Qazir úgit-nasıhat naýqanynyń naǵyz qyzǵan shaǵy. Prezıdenttikten úmitker Tóleýtaı Raqymbekovti qoldaýǵa arnalǵan sharalar elimizdiń barlyq aımaǵynda ótip jatyr. Al kandıdattyń ózi aldaǵy aptada batystaǵy óńirlerge baryp, jergilikti turǵyndarmen kezdesýler ótkizbek.
* * *
Kásipodaqtar federasııasynan prezıdenttikke kandıdat Amankeldi Taspıhovtyń respýblıkalyq qoǵamdyq shtaby Batys Qazaqstan oblysy Aqjaıyq aýdanyndaǵy Taıpaq aýylynyń jurtshylyǵymen kezdesti. Delegasııany shtab tóraǵasynyń orynbasary, Memlekettik, bank mekemeleri jáne qoǵamdyq qyzmet kórsetý qyzmetkerleriniń salalyq kásiptik odaǵynyń tóraǵasy Mırbolat Jaqypov pen Qazaqstan munaı-gaz kesheniniń salalyq kásipodaq tóraǵasy Sultan Qalıev bastap bardy.
Úgit-nasıhat jumystary aıasyndaǵy bul is-shara Taıpaq aýylynyń Mádenıet úıinde ótti. Kezdesýge aýyl turǵyndary, aqsaqaldar, eńbek ardagerleri jáne kásipodaq músheleri qatysty. Respýblıkalyq qoǵamdyq shtab tóraǵasynyń orynbasary M.Jaqypov prezıdenttikten úmitker A.Taspıhovtyń ómir joly týraly baıandap, onyń azamat retindegi ustanymdary men kózqarastary kásipodaqtar atynan kandıdat retinde usynýǵa negiz bolǵanyn atap ótti. Qazaqstan munaı-gaz kesheniniń salalyq kásipodaq tóraǵasy S.Qalıev kandıdattyń eńbekti qorǵaý men eńbek qaýipsizdigi, eńbek adamynyń quqyqtary men múddelerin qorǵaýǵa baǵyttalǵan saılaýaldy tuǵyrnamasyna tolyǵyraq toqtalyp, qatysýshylardy qyzyqtyrǵan suraqtarǵa jaýap berdi. Kezdesý barysynda kitaphana qyzmetkeri S.Tilekeeva qaýipsiz eńbek pen laıyqty eńbekaqyǵa qatysty usynystardy qýana qoldaıtynyn jetkizip, kópshilikti saılaýǵa qatysyp, eńbek adamynyń ókili A.Taspıhovke daýys berýge shaqyrdy.
Sonymen qatar respýblıkalyq saılaýaldy shtab ókilderi Atyraý oblysyna atbasyn buryp, kandıdat A.Taspıhovty qoldaý maqsatynda medısına qyzmetkerleriniń kúnine oraı ótken dərigerler spartakıadasyna qatysty.
1. 51 shet memlekettegi Qazaqstan Respýblıkasynyń ókildikteri janynda 65 saılaý ýchaskesi quryldy.
2. Tizimderge tıisti shet memlekette turatyn nemese uzaq merzimdi sheteldik issaparda júrgen jáne Qazaqstan Respýblıkasy azamatynyń jaramdy pasporttary bar barlyq azamattar engiziledi.
3. Shet memleketterge jeke shaqyrý boıynsha qyzmettik, iskerlik jáne týrıstik saparlarǵa kelgen Qazaqstan azamattary ýchaskelik saılaý komıssııasyna júgingen kezde jáne olarda Qazaqstan Respýblıkasy azamatynyń jaramdy pasporty bolǵan kezde saılaýshylar tizimine engiziledi.
4. Shetelge shyǵatyn azamattar tirkeý orny boıynsha ýchaskelik saılaý komıssııasynan esepten shyǵarý kýáligin ala alady.
5. Tizimder Qazaqstan Respýblıkasy ókildikteriniń basshylary usynatyn derekter negizinde jasalady jáne daýys berý kúniniń aldyndaǵy kúngi jaǵdaı boıynsha mindetti naqtylanýǵa jatady.
6. Daýys berý kúnine 15 kún qalǵanda árbir azamat saılaýshylar tizimindegi ózi týraly derekterdi teksere alady jáne tizimge engizilmeýge, durys engizilmeýge nemese shyǵarylýǵa, sondaı-aq tizimge saılaýshy týraly derekterdiń durys emestigine shaǵymdana alady.
* * *
Qazaqstan Kommýnıstik halyq partııasy usynǵan prezıdenttikke kandıdat Jambyl Ahmetbekov úgit-nasıhat sharalarynyń aıasynda «Ońtústik» arnaıy ekonomıkalyq aımaq jumysshylarymen kezdesti. Kandıdat jıyn qatysýshylaryna saılaýaldy tuǵyrnamasyn tanystyryp, otandyq taýarǵa, ásirese AО́K ónimderine tutynýshylyq suranysty yntalandyrý jáne kedeılikpen kúresý baǵdarlamasyn qabyldaýdy usynǵanyn, onyń júzege asyrylýy úshin jumys isteıtinin málimdedi.
«Baılar men kedeıler arasyndaǵy alshaqtyq jyldan-jylǵa artyp kele jatyr. Aýqatty adamdar halyqtyń esebinen ózderiniń jaıly ómirin tolyq qamtamasyz etýde. Al óz eńbekterimen aqsha taýyp júrgender az jalaqymen kún kórýge májbúr. Tabystyń ádiletsiz úlestirilý júıesin toqtatý qajet. Eńbek adamy óz eńbegine saı jalaqy alýy tıis. Biz resýrstardy durys paıdalanǵan jaǵdaıda Qazaqstan ómir súrý deńgeıi boıynsha Kýveıtpen, Birikken Arab Ámirlikterimen jáne Norvegııamen ıyq tirese alady», dedi J.Ahmetbekov.
Buǵan qosa, kandıdat zamanaýı Qazaqstannyń basty qundylyǵy beıbitshilik pen ultaralyq kelisimdi saqtaý kerektigin aıtty. Onyń oıynsha, egosentrli ındıvıdýalızm jańa batystyq dástúr izbasarlarynyń minez-qulqyna tán. Ol kóp etnosty Qazaqstan halqynyń biregeı mádenıetine, diline jat.
Kásiporyn jumysshylary Kommýnıstik halyq partııasy úmitkeriniń saılaýaldy tuǵyrnamasyn jaqsy qabyldap, áleýmettik sıpattaǵy suraqtaryn qoıdy. Aımaqta gaz ben elektr qýatynyń joǵary tarıfteri, jumyssyzdyq, densaýlyq mekemeleriniń tapshylyǵy sııaqty máseleler bar. Kandıdat qoıylǵan barlyq suraqqa tolyqqandy jaýap berýge tyrysty.
* * *
Nur Otan partııasynan prezıdenttikke kandıdat Qasym-Jomart Toqaevtyń respýblıkalyq qoǵamdyq shtaby ókilderi Qyzylorda oblysynyń halqymen kezdesti. «Muz aıdyny» sport kesheninde ótken kandıdatty qoldaýshylar forýmyna halyq qalaýlylary, memleket jáne qoǵam qaıratkerleri, tanymal jýrnalıster men sportshylar jáne óner ókilderi qatysty. Is-sharada Ilıa Ilın, Elızabet Tursynbaeva, Mádına Sádýaqasova jáne Serik Ibragımov sııaqty tanymal azamattar Elbasy usynǵan kandıdatqa daýys berýge shaqyryp, jerlesterine keremet kóńil kúı syılady.
Júzdesýge kelgen halyqqa Q.Toqaevtyń saılaýaldy baǵdarlamasyndaǵy úsh basymdyq týraly aıtyldy. Myńnan asa belsendi qatysqan forýmda shtab jetekshisi Máýlen Áshimbaev jınalǵandardy prezıdenttikten úmitker Qasym-Jomart Toqaevty, sol arqyly bılik sabaqtastyǵyn ádildik pen órleýdi qoldaýǵa shaqyrdy.
«Q.Toqaev – Elbasynyń senimdi serigi, ekonomıkany, ishki-syrtqy saıasatty, zań shyǵarý qyzmetin jetik biletin qaıratker retinde prezıdenttikke eń laıyqty kandıdat. Syr eli qashanda Elbasynyń strategııalyq saıasatyn qoldaıdy. Sondyqtan sizderdi Elbasy senim artqan tulǵany qoldaıdy dep senemiz. 9 maýsymda bizdiń kandıdatqa daýys berýge týǵan-týys, dos-jaran, áriptesterińizdi shaqyramyz. Alǵa, Qazaqstan!», dedi M.Áshimbaev.
Týǵan kúnimen tuspa-tus kelgen jıynda I.Ilın jerlesterin elimizdiń jarqyn bolashaǵy, ári qaraı órkendeýi úshin Elbasy usynǵan kandıdatqa daýys berýge úndedi. Al mánerlep syrǵanaýdan el quramasynyń kóshbasshysy E.Tursynbaeva jınalǵandar aldynda óz ónerin pash etti.
* * *
«Ult taǵdyry» ulttyq-patrıottyq qozǵalysynan prezıdenttikke kandıdat Ámirjan Qosanov Nur-Sultan qalasynda ornalasqan respýblıkalyq shtabynyń keńsesinde óziniń senim bildirilgen adamdaryn qabyldady. Qatysýshylar baǵdarlamanyń negizgi baǵyttaryn atap ótip, qujatty tolyqtyrýǵa qatysty óz ıdeıalarymen bólisti. Kandıdat túrli ózekti qoǵamdyq máselelerge qatysty óz ustanymyn jetkizdi.
Al Almaty oblysynyń Kóksý kentinde Á.Qosanovtyń oblystyq saılaýaldy shtabynyń músheleri men senimdi ókilderi qant zaýytynyń eńbek ujymymen kezdesti. Bul zaýyt – Qazaqstandaǵy tamaq ónerkásibiniń jetekshi kásiporyndarynyń biri. Kezdesýdiń moderatory oblystyq shtab bastyǵy Júkel Hamaı boldy. Shtab músheleri kandıdattyń saılaýaldy tuǵyrnamasyn tanystyryp, kandıdattyń túrli máselege kózqarasy jaıly baıandap berdi. Buǵan qosa, oblysta saılaý baıqaýshylarynyń semınary ótti.
Sonymen qatar Atyraý qalasynda prezıdenttikten úmitker Á.Qosanovtyń senim bildirilgen adamdary «Raýan Nalko» JShS eńbek ujymymen kezdesti. Seriktestik – Qazaqstannyń jetekshi munaı-hımııa kásiporyndarynyń biri, munaı-gaz óndirisine arnalǵan hımııalyq reagentterdi óndirýshi, álemniń 160 elin qamtıtyn halyqaralyq «Nalko Chempıon» (Nalco Champion) kompanııasymen birlesken otandyq kásiporyn.
Kezdesýde sóz tizginin oblystyq shtab bastyǵy Ǵalymjan О́tebaev ustady. Shtab músheleri jınalǵandarǵa saılaýaldy tuǵyrnamany jan-jaqty túsindirip, ásirese «О́rkenıetti ári halyqshyl ekonomıka» atty taraýyna keńirek toqtaldy. Onda ádil básekelestikti damytý, monopolızmge jol bermeý týraly baıandalǵan. Kásiporyn jumysshylary ózderin qyzyqtyrǵan suraqtaryn qoıyp, oǵan tushymdy jaýaptaryn aldy.
* * *
«Uly dala qyrandary» respýblıkalyq qozǵalysynan prezıdenttikke kandıdat retinde tirkelgen Sádibek Túgel Nur-Sultan qalasy ákimdigine qarasty «Sharapat» áleýmettik qyzmet kórsetý ortalyǵynda bolyp, ardagerlermen suhbattasty. Bul ortalyq alǵashynda 1989 jyly «Qarttar men múgedekterge arnalǵan medısınalyq-áleýmettik mekeme» bolyp qurylǵan. 2016 jyldan beri ataýy «Sharapat» bolyp ózgergen ortalyq búginde 321 adamǵa qyzmet kórsetip keledi. Ortalyq dırektory Rysty Baımaǵambetovanyń aıtýynsha, olardyń arasynda 2 soǵys ardageri men olarmen teńestirilgen 8 adam jáne 25 tyl ardageri bar.
Ortalyqtyń májilis zalyna jınalǵandar aldynda prezıdenttikten úmitker S.Túgel «Qarııalar – asyl qazynamyz. Sizderdiń aldaryńyzǵa úlken tolqynyspen kelip otyrmyz. Saılaý – úlken qoǵamdyq-saıası mańyzy bar shara. Onda el bolashaǵyna daýys beremiz. Allanyń qalaýymen, halyqtyń qoldaýymen osy dodaǵa qatysyp otyrmyn. О́zim qoǵamdyq-saıası keńistikte 20 jyldan asa qyzmet atqaryp kelemin. Bizdiń «Uly dala qyrandary» qoǵamdyq birlestiginiń jumys istep kele jatqanyna 8 jyl boldy. Bizdiń maqsatymyz – ultymyzǵa adal qyzmet etý, jastardy otansúıgishtikke tárbıeleý», dedi.
Kandıdat óziniń saılaýaldy baǵdarlamasyndaǵy tórt tuǵyrǵa jeke-jeke toqtalyp ótti. Onda aıtylǵan baǵyttardy qyzyǵýshylyqpen tyńdaǵan qarttar kókeıindegi saýaldaryn da irkip qalmady. Memlekettik tildiń bolashaǵy, onyń ózge tilderdiń kóleńkesinde qalyp qoımaýy, latyn grafıkasyna negizdelgen álipbıdi qarııalardyń qalaı qabyldaǵany týraly keńinen talqylandy. Sonymen qatar aqsaqaldar bolashaqta ortalyqta bılıard oınaýǵa múmkindik jasalsa degen tilekterin de bildirdi.
Daıyndaǵan Orynbek О́TEMURAT,
«Egemen Qazaqstan»
