29 Mamyr, 2019

Áskerı kafedraǵa Qabanbaı batyr esimi beriledi

881 ret kórsetildi

Bul – óńirdegi ýnıversıtetterdiń ishinde ashylyp otyrǵan úshinshi áskerı kafedra.

Jastar jyly aıasynda keshe, 28 mamyrda О́skemendegi Sársen Amanjolov atyndaǵy Shyǵys Qazaqstan memlekettik ýnıversıtetinde áskerı kafedra saltanatty túrde ashyldy. Erekshe atap óterligi, bul – óńirdegi ýnıversıtetterdiń ishinde ashylyp otyrǵan úshinshi áskerı kafedra. Oqý ornynyń baspasóz qyzmetiniń habarlaýynsha, áskerı kafedraǵa stýdentterdi qabyldaý bastalyp ta ketipti. Bul maqsatta ýnıversıtet tarapynan 2019-2020 oqý jylyna úsh mamandyq boıynsha 45 grant bólinipti.

 

ShQMÝ rektory Muhtar Tólegen áskerı kafedra Qorǵanys mınıstri, general-maıor Nurlan Ermekbaevtyń bıylǵy 11 mamyrdaǵy №328  buıryǵy negizinde ashylǵanyn, aldaǵy ýaqytta grant sanyn ulǵaıtý josparlanyp otyrǵanyn aıtady. «Áskerı kafedrany bitirgen stýdentter joǵary oqý ornyn aıaqtaǵandary týraly dıplommen qatar zapastaǵy ofıser kýáligin alady. Olar Qorǵanys mınıstrliginde, áskerı bólimderde, áskerı polısııada jáne basqa da mekemelerde jumys isteıtin bolady» degen ýnıversıtet basshysy jaqynda oqý ornynyń ǵylymı keńesinde kafedraǵa Qabanbaı batyr esimin berý týraly usynys túskenin jetkizdi.

Áskerı kafedranyń ashylý rásimine О́skemen qalasynyń ákimi Jaqsylyq Omar, polkovnık, 27943 áskerı bólimi garnızonynyń bastyǵy A. Myrzyqanov, polkovnık, oblystyq Qorǵanys isteri departamentiniń bastyǵy K.Qaıyrqanov, 27943 áskerı bóliminiń komandıri, podpolkovnık B.Tájibaev qatysty.  «Búgin – erekshe kún. Ýnıversıtet osy bastamany iske asyrý úshin kóp jyldardy sarp etti. Mine, búgin Qorǵanys mınıstriniń qoldaýymen rektor áskerı kafedrany ashyp otyr. Onyń tarıhı ǵımaratta – oqý ornynyń tuńǵysh korpýsynda ornalasýy da mańyzdy», – dedi óziniń quttyqtaý sózinde J.Omar.

Áskerı kafedranyń ashylǵanyna ásirese stýdentter erekshe qýanyp jatyr. «Bul – oqý ordamyzdyń 67 jyldyq tarıhynda bolmaǵan dúnıe. Osy úshin ýnıversıtet basshylyǵyna osyndaǵy barsha stýdentterdiń atynan alǵysymdy bildiremiz», – deıdi ýnıversıtet stýdenti Marlen Ábýbákir.

О́SKEMEN

Sońǵy jańalyqtar

Uqsas jańalyqtar