Ortalyqtyń ashylý rásiminde «El-ana» ádebı-tanymdyq stýdenttik almanaǵy men «Ádebıettaný ǵylymy jáne bilim berý» jınaǵynyń tusaýy kesilip, oqyrmanǵa jol tartty.
– «El-ana» ádebı-tanymdyq stýdenttik almanaǵy stýdentter shyǵarmashylyǵyna arnalǵan. Qazirgi dáýirdiń myń-qat zaman baǵytyn túzýshi tulǵa qalyptastyrýdyń aýqymdy mindetterine az da bolsa septigin tıgizsem dep ashylyp otyrǵan basylymda birneshe turaqty aıdar bar. Qolaıyna qaraı túrli janrda qazirgi qoǵam, stýdent jastar ómiriniń ózekti jaılaryn qamtyp otyrmaq, – dep atap ótti joba avtory, Qazaq ádebıeti kafedrasynyń professory Qanıpash Mádibaeva.
Onyń aıtýynsha, almanahta negizinen stýdentterdiń tól týyndylary jarııalanady. Jaryq kórgen shyǵarmalar aldyn ala saralanyp baryp usynylady.
Al «Ádebıettaný ǵylymy jáne bilim berý» jınaǵy «Qazaq ádebıeti» pánin oqytý: Abaıtanýdyń ózekti máseleleri» taqyrybynda ótken «Joǵary mektepte «Qazaq ádebıettaný ǵylymy jáne bilim berý» atty joǵary oqý oryndary stýdentteriniń respýblıkalyq bilim saıysy negizinde jaryq kórip otyr. Jınaq ádebıettanýshy mamandarǵa, jas zertteýshilerge arnalǵan. Qazaq ulttyq qyzdar pedagogıkalyq ýnıversıtetiniń 75 jyldyǵy men Jastar jyly aıasynda uıymdastyrylǵan bilim dodasy Abaıdyń aqyndyq murasyn ıgerýge baǵyttalǵan.
Jeńimpazdar arnaıy sertıfıkatpen marapattalyp, «Qazaq ádebıeti páni» ataýly shákirtaqysyna ıe boldy. Aıta keteıik, «El-ana» jastar rýhanııat jáne bilim ortalyǵy Qazaq fılologııasy jáne álem tilderi fakýltetiniń Qazaq ádebıeti kafedrasynyń muryndyq bolýymen qurylyp otyr. Oqý ornynyń 75 jyldyǵy men Jastar jyly qarsańynda qolǵa alynǵan joba aıasynda elimizdiń joǵary oqý oryndary stýdentteriniń arasynda bilim saıystary turaqty túrde ótkizilip turmaq. Sonymen qatar uıym bastamasymen eki aıda bir ret «El-ana» ádebı-tanymdyq stýdentter almanaǵy jaryq kóredi. Budan ózge «Ádebıettaný ǵylymy jáne bilim berý» serııalyq jınaqtary men qazaq sóz óneriniń aıtýly ókilderine arnalǵan «Tulǵataný» kóptomdyǵyn shyǵarý, jazǵy mektep, ǵylymı-tanymdyq ekspedısııalar men bilimdi kóterý baǵytyndaǵy semınar-trenıngter jáne «Rýhanı áńgime», «Tulǵadan taǵylym» formatyndaǵy shyǵarmashylyq sharalar ótkizý de josparlanǵan.
ALMATY
