«Aq jol» demokratııalyq partııasy usynǵan prezıdenttikke kandıdat Danııa Espaevany qoldaý maqsatynda Almaty qalasynda velojarys ótti. Is-sharany uıymdastyrýǵa «Velo-halyq Almaty» veloqaýymdastyǵy jáne №73 jasóspirimder men balalarǵa arnalǵan sport mektebi muryndyq boldy. Jastar jyly aıasynda ótken jarystyń ashylýynda «Aq jol» partııasy Almaty qalalyq fılıalynyń basshysy N.Jazylbekov prezıdenttikten úmitker D.Espaevanyń saılaýaldy tuǵyrnamasyn jan-jaqty tanystyrdy. Doda Ál-Farabı dańǵylyndaǵy Tuńǵysh Prezıdent parkinen bastalyp, Toraıǵyrov-Kablýkov-Tımırıazev-Baıtursynov-Shevchenko-Qonaev-Gogol kósheleri arqyly ótip, Mádenıet parkinde márege jetti. Dittegen jerine jetken veloshabandozdardy qala turǵyndary, partııa belsendileri «Atameken» ánin shyrqap qarsy aldy. Shara sońynda fılıal jetekshisi velojarystyń barlyq qatysýshylaryn quttyqtap, 2019 jyldyń 9 maýsymynda ótetin saılaýǵa belsendi qatysýǵa shaqyrdy.
Sonymen qatar úgit-nasıhat jumystarynyń aıasynda salamatty ómir saltyn nasıhattaýǵa arnalǵan taǵy bir jarys ótti. Oral qalasynda D.Espaevanyń aımaqtyq qoǵamdyq shtaby baıdarka men kanoe esýden birinshilik uıymdastyrdy. Is-sharaǵa kandıdattyń senim bildirilgen adamdary, partııanyń Batys Qazaqstan oblysyndaǵy belsendi jastary qatysty. Týrnırde Túrkistan, Almaty, Shymkent, Temirtaý, Atyraý, Oral qalalarynan, ıaǵnı Qazaqstannyń túkpir-túkpirinen kelgen 120-dan asa sportshy baq synady. Jaqsy nátıje kórsetken qatysýshylardyń barlyǵy dıplom men medaldar ıelendi. Marapattaý rásiminde «Aq jol» partııasy oblystyq keńesiniń múshesi, Batys Qazaqstan oblysyndaǵy baıdarka men kanoe federasııasynyń prezıdenti Iý.Kazanın men Oral qalalyq máslıhatynyń depýtaty V.Vlasov jeńimpazdardy quttyqtap, elimizdegi saıası naýqannyń mańyzdylyǵyna toqtaldy.
* * *
«Aýyl» halyqtyq-demokratııalyq patrıottyq partııasynan prezıdenttikke kandıdat Tóleýtaı Raqymbekovtiń Túrkistan oblystyq qoǵamdyq shtaby poezııa keshin ótkizdi. Úgit-nasıhat jumystarynyń aıasynda ótken baıqaýǵa aýdan belsendileri, aqyndar, termeshi-ánshiler – barlyǵy 148 adam qatysty. Is-shara qalamgerlerdi aýyldyń rýhanı ómirin, áleýmettik-ekonomıkalyq úderisterdi sýretteýge yntalandyrý maqsatynda uıymdastyryldy.
Kesh barysynda saılaýǵa qatysýdyń, durys tańdaý jasaýdyń mańyzy sóz bolyp, kandıdat týraly jınalǵan qaýymǵa keńinen maǵlumat berildi, saılaýaldy baǵdarlamasy tanystyryldy. Al konkýrstyń qazylar alqasynyń quramyn oblystyq saılaýaldy shtab jetekshisi E.Dýanaev, №17 Atatúrik atyndaǵy mektep-gımnazııanyń muǵalimi D.Aıtileýova men aqyn S.Jolanov tolyqtyrdy. Baıqaý qorytyndysy boıynsha 1-oryndy Kentaý qalasynyń turǵyny J.Bekshoraeva ıelense, 2-oryn Otyrar aýdanynan kelgen J.Sharhanǵa buıyrdy. Al 3-orynǵa báıdibektik A.Qylyshbek laıyq dep tanyldy. Buǵan qosa, Túrkistan qalasynan «Aýylym ádemi» atty óleńimen D.Keıki «Úzdik dıplom» ıegeri atandy. Sońynda uıymdastyrýshylar aýyldyń tynys-tirshiligimen etene tanys, aýyldyń ahýalyn kóterýge atsalysyp júrgen azamat, óziniń saılaýaldy baǵdarlamasynda da aýyl máselesin umyt qaldyrmaǵan T.Raqymbekovtiń kandıdatýrasyn qoldaýǵa shaqyrdy.
Sonymen qatar Almaty oblysynda saılaýaldy naýqan sheńberinde konsert ótip, oǵan jaqyn aýdandardyń turǵyndary shaqyryldy. Konserttik baǵdarlamada týǵan jer, aýyl týraly ánder kóptep shyrqaldy. Aqyndar qaýymy da qalys qalmaı, jyrdan shashý shashty. «Aýyl» partııasynyń ardageri B.Jetpisbaev, aımaqtyq qoǵamdyq shtab ókilderi Q.Bekıev pen Q.Isaeva jınalǵandardy 9 maýsym kúni ótetin saılaýǵa belsendi qatysýǵa úndedi.
* * *
Kásipodaqtar federasııasy atynan saılaýǵa túsip jatqan kandıdat Amangeldi Taspıhovtyń Qyzylorda oblysyndaǵy qoǵamdyq shtaby qarqyndy jumys júrgizip jatyr. Kandıdattyń senim bildirilgen adamdary Aral aýdandyq aýrýhana ujymyna baryp, saılaýaldy tuǵyrnamany egjeı-tegjeıli tanystyrdy. Baǵdarlamadaǵy medısına salasy qyzmetkerleriniń eńbekaqysy, sapaly tegin bilim alý, qajetti mamandar daıarlaý máseleleri eńbek ujymynyń erekshe qoldaýyna ıe boldy. Aýrýhana ujymy árbir mamannyń áleýmettik múddeleriniń qorǵalýy, salada maman tapshylyǵynyń joıylýy eńbek ónimdiligin arttyryp, halyqqa sapaly qyzmet kórsetýge oń áserin tıgizedi deıdi.
A.Taspıhovtyń senim bildirilgen adamy Q.Bekenov Qazaly aýdanyndaǵy №70 mektepte Áıteke bı kentiniń turǵyndaryna kandıdattyń negizgi ustanymdaryn túsindirdi. Jıyn barysynda saılaýshylardyń suraqtaryna da jaýap berip, qoǵamnyń ózekti máseleleri týraly pikirlerin ortaǵa saldy. Ásirese jumyssyzdyq, jastardyń tegin bilim alýy, jumys berýshilerdiń jaýapkershiligin arttyrý máseleleri kóp talqylandy.
Sonymen qatar Qyzylorda oblystyq bilim jáne ǵylym qyzmetkerleriniń kásipodaq uıymy tóraıymy R.Baınazarova Josaly kentiniń jurtymen kezdesti. Kent ortalyǵynda ornalasqan Tańsyqbaı bazarynda jáne «Saltanat» naýbaıhanasynda ótken jıyndar barysynda saılaýshylarǵa kandıdat tuǵyrnamasynyń basym baǵyttary túsindirdi. Osyndaı jumys oryndarynda nápaqasyn taýyp júrgen aǵaıyn óz quqyǵynyń qalaı qorǵalýy kerektigi týraly biraz jaıǵa qanyqty.
Buǵan qosa, qyzylordalyq belsendi top qalanyń halyq kóp shoǵyrlanǵan tustarynda úgit jumystaryn qyzý júrgizýde. Olar demalys kúnderi keshke serýenge shyqqan turǵyndarǵa úgit-nasıhat paraqshalaryn úlestirip, aldaǵy saılaý týraly málimet berip jatyr.
* * *
Qazaqstan Kommýnıstik halyq partııasynan prezıdenttikke kandıdat Jambyl Ahmetbekov Semeı qalasynda partııa belsendilerimen jáne qala turǵyndarymen kezdesti. Mádenıet úıinde ótken basqosýda kandıdat eńbekshi halyq múddesin qorǵaý boıynsha tabandy jumys atqaryp kele jatqanyn aıtty. Ol saılaýaldy baǵdarlamasynyń negizgi aspektilerine toqtalyp, ásirese kedeılikpen kúres týraly baǵytqa basa nazar aýdardy.
Jınalǵandar prezıdenttikten úmitkerdiń úndeýine qoldaý bildirip, memlekettik saıasat eńbek adamyna degen ádiletti qarym-qatynasqa basymdyq berý kerektigin atap ótti. Kópshilik kókeılerinde júrgen suraqtaryn qoıyp, oǵan tushymdy jaýap aldy. Olardyń qatarynda jalaqy kólemin arttyrý, eńbek jaǵdaıyn jaqsartý, medısınalyq qyzmetpen qamtý jáne baspana máselesi boldy.
Sonymen qatar Qaraǵandy qalasyndaǵy oblystyq saılaýaldy qoǵamdyq shtaby «Adal eńbek qoǵam múddesi úshin» degen uranmen fleshmob ótkizdi. Is-shara barysynda aspanǵa Qazaqstan Kommýnıstik Halyq partııasynyń urandary jazylǵan shar ushyrylyp, úgit paraqtary taratyldy.
Qaraǵandy oblystyq saılaýaldy shtab jetekshisi A.Zevahın kommýnıstik ıdeologııa synǵa kóp ushyraıtynyn, alaıda qazirgi kommýnıster burynǵy izasharlarynyń qateligin qaıtalamaı, zaman talabyna saı áreket etip jatqanyn baıandady. Ol partııa halyqtyń senimi men qurmetine ıe bolyp otyrǵanyn atap ótip, saıası qurylym turmysy tómen adamdardyń jaǵdaıyn jaqsartý jolynda qyzmet etip, eńbek adamynyń quqyǵyn qorǵaıtynyn aıtty. Búgingi tańda partııa Parlament Májilisinde qarapaıym halyqtyń múddesin qorǵap, bılik pen halyq arasyna altyn kópir bolyp otyr. A.Zevahın partııanyń saılaýaldy tuǵyrnamasy kedeılikpen kúreske, sonymen qatar batystyń jalǵan qundylyqtarynan bas tartýǵa úndeıtinin jetkizdi.
* * *
Nur Otan partııasynan prezıdenttikke kandıdat Qasym-Jomart Toqaevtyń respýblıkalyq qoǵamdyq shtaby jer jánnaty Jetisý óńirine bardy. Alǵashqy kezdesý Taldyqorǵan qalasyndaǵy Beken Rımova atyndaǵy drama teatrynda bıýdjet salasy qyzmetkerleriniń qatysýymen ótti. Jıynǵa 500-ge jýyq adam qatysty.
Delegasııa quramynda Senat depýtattary B.Jumaǵulov, M.Qul-Muhammed, Májilis depýtaty, Nur Otan partııasy partııalyq baqylaý komıtetiniń tóraǵasy Q.Sultanov, teatr jáne kıno akteri, Qazaqstannyń eńbek sińirgen qaıratkeri Á.Ahmetov boldy. Nasıhatshylar toby jınalǵandarǵa kandıdattyń saılaýaldy baǵdarlamasyndaǵy basymdyqtardyń barlyǵy halyqtyń ál-aýqatyn kóterýge baǵyttalǵanyn jetkizdi.
Kandıdattyń respýblıkalyq shtabynyń jetekshisi Máýlen Áshimbaev sabaqtastyq, ádildik, órleý qaǵıdalary týraly tolyqqandy aqparat berdi. «Q.Toqaev Elbasynyń strategııalyq bastamalarynyń barlyǵyn ári qaraı júrgizýdi negizgi maqsaty etip otyr. Baǵdarlamada aıtylǵan sabaqtastyq qaǵıdasy osyǵan saıady. Barsha qazaqstandyqtardyń zań aldyndaǵy teńdigi, árkimniń laıyqty jumysy jáne eńbegine saı adal jalaqysy bolýy – ádildik qaǵıdasynyń negizi. Al órleý qaǵıdasynda árbir qazaqstandyqtyń ómir súrý sapasyn jaqsartýǵa baǵyttalǵan mańyzdy máselelerdiń barlyǵy qamtylǵan», dedi shtab jetekshisi.
Sondaı-aq ol saılaýaldy baǵdarlamada kórsetilgen turǵyndardyń baspana máselesin sheshýge qatysty basymdyqqa erekshe toqtaldy. 650 myń otbasyn baspanamen qamtamasyz etý, kóp balaly otbasylar men múmkindigi shekteýli jáne basqa da muqtaj jandarǵa arnap 40 myńnan astam jalǵa beriletin páter salý kózdelgenin jetkizdi. Bul bastamalar óz kezeginde taldyqorǵandyq turǵyndar tarapynan qyzý qoldaý tapty.
* * *
«Ult taǵdyry» ulttyq-patrıottyq qozǵalysynan prezıdenttikke kandıdat bolyp tirkelgen Ámirjan Qosanovtyń Qostanaı qalasyndaǵy oblystyq saılaýaldy shtabynda saılaý kúni ýchaskelerde daýys berý prosesin qadaǵalaıtyn baqylaýshylar úshin semınar ótti. Is-sharanyń moderatory jáne treneri Dos Kóshim boldy. Ol baqylaýshylardyń quqyqtary men mindetteri, saılaý kezinde oryn alýy yqtımal túrli jaǵdaılardaǵy áreketteri jaıly túsindirdi. Qatysýshylar qyzyǵýshylyq tanytqan taqyryptaryn kóterip, barlyq ózekti suraqtaryna jaýap aldy.
Belgili saıasattanýshy elimiz boıynsha óziniń semınarlaryn ótkizýdi jalǵastyryp jatyr. D.Kóshim bastaǵan toptyń kelesi jıyny Qaraǵandy oblysynyń ortalyǵynda jáne aýdandarynda ótti. Bolashaq baıqaýshylar elimizdiń barlyq óńirinde shynaıy qyzyǵýshylyq tanytýda.
Al kandıdat Á.Qosanovtyń ózi úgit-nasıhat jumystarynyń aıasynda áleýmettik jelilerdiń áleýetin tıimdi paıdalanyp jatyr. Ol Facebook, Instagramm, Youtube jelilerinde tikeleı efırge shyǵyp, óz ustanymdaryn keńinen túsindirdi jáne kórermenderdiń suraqtaryna jaýap berdi. Onyń ishinde jaqynda ótken teledebat jónindegi oıyn aıtyp berdi. Sondaı-aq Á.Qosanov óz sózinde kózqarastary shaǵyn jáne orta bıznes ókilderi tarapynan qoldaý taýyp jatqanyn aıtyp, baǵdarlamasyndaǵy «Baqýatty aımaqtar – baqýatty memleket» baǵytyna toqtaldy. Onda «Basym baǵytta damý, ómir súrý deńgeıiniń jaqsarýy, rýhanı órkendeý birdi-ekili iri qalanyń ǵana enshisinde bolmaýy tıis. Eldiń barlyq aımaǵyn tıisinshe teń qarjylandyrý, olardyń damýyna jaǵdaı jasaý, damý deńgeıindegi alshaqtyqty birtindep joıý kerek. Shynaıy belsendi ári teń quqyqty jergilikti ózin-ózi basqarýdy damytý jáne aýyl aýdan, qala ákimderin halyqtyń tikeleı saılaýyna kóshý qajet» dep jazylǵan.
* * *
«Uly dala qyrandary» respýblıkalyq qozǵalysynan prezıdenttikke kandıdat Sádibek Túgel Aqmola oblysy Selınograd aýdany Qabanbaı batyr aýylyndaǵy №41 mektepte aýyl turǵyndarymen kezdesti.
«Bul aýyl maǵan óte ystyq. Munda Qabanbaı batyr kesenesin salýǵa, aýyldyń atyn berýge qatysty kóptegen ıgi istiń basy-qasynda júrdim. Búgin barlyǵyńyz jınalyp otyrsyzdar. Aýyldaǵy on myńǵa jýyq turǵynnyń barlyǵymen kezdese almasaq ta, sizder arqyly meniń saılaýaldy baǵdarlamamnyń negizgi baǵyttary jetedi dep senemin. Aldymen, osy kezdesýge qatysyp otyrǵan ustazdar, bolashaǵymyzdyń tutqasy sanalatyn jas urpaq tárbıesi sizderdiń qoldaryńyzda. Meniń baǵdarlamamnyń ózegi – til, dil, jer jáne ar-namys máselesi. Bul tórt tuǵyrdy bir-birinen bólip qaraýǵa bolmaıdy. Ana tilimizdiń mártebesin bıiktetý úshin ár kezdesýimdi memlekettik tilde júrgizip kelemin. Saılaýaldy baǵdarlamamnyń eń basynda da osy másele basty orynda tur», dedi S.Túgel.
Sonymen qatar kandıdat jas otbasylardyń áleýmettik jaǵdaıyn kóterýge, aýyldy kórkeıtýge, jumyssyzdyqty boldyrmaýǵa qatysty baǵdarlamasynda atap kórsetilgen mindetterge toqtaldy. Buǵan qosa, senim bildirilgen adamdar B.Úmbetova, B.Muhamedrahımova, K.Moldahmetova sóz sóılep, «Uly dala qyrandary» elimiz boıynsha ulttyq qundylyqtar men ulttyq sport túrlerin nasıhattap otyrǵan uıym ekendigin, halyqaralyq sport básekelerinde el namysyn qorǵap, qazaqtyń atyn álemge tanytqan ulttyq at sporty túrleriniń bastaýynda ult janashyry S.Túgeldiń turǵandyǵyn jetkizdi.
Kezdesýden soń nasıhatshylar toby Qabanbaı batyr kesenesinde jáne onyń janynda ornalasqan panteonda bolyp, el qorǵaǵan batyr men táýelsizdiktiń tuǵyryn bıiktetýge atsalysqan tulǵalarǵa duǵa baǵyshtady.
Daıyndaǵan
Orynbek О́TEMURAT,
«Egemen Qazaqstan»
