№48386 áskerı bólim komandıriniń tárbıe jáne ıdeologııalyq jumystar jónindegi orynbasary, podpolkovnık Vladımır Ýlıanovtyń aıtýynsha, batalon 11 barlaýshylar rotasynan turady. «Suńqar», «Úki», «Naıza», «Orbıta» dep atalatyn rotalardyń árqaısysy áýe, qurlyq barlaýymen qosa baılanys, jaýdyń múmkindigin anyqtaý syndy jeke mindetterge jaýap beredi. Bólim 1962 jyldyń 1 mamyrynda qurylǵan. Jabdyqtalǵan oqý-jattyǵý keshenderinen bólek zamanaýı barlaý tehnıkasynyń úzdikteri osy jerden tabylady. Atap aıtar bolsaq, úrlemeli «Rotan» qaıyǵy, «D-30» artıllerııa gaýbısasy, «KamAZ» jáne «Lendrover» ústine ornatylǵan zenıttik qondyrǵy men radıostansııa, «Vasılek» mınometi, «BTR-80» jáne «Arlan» brondalǵan áskerı tehnıkalar – desantshylardyń ıeliginde. Barlaýshylar kelisimshart negizinde qyzmet etedi eken. Áskerı bólim – Reseıde ótken halyqaralyq jarystardyń birneshe dúrkin jeńimpazy.
Odan keıin desanttyq-shabýyldaýshy brıgadasy ázirlegen kórinisin tamashalap, jaýyngerlerdiń daıyndyǵyna kóz jetkizdik.
Áskerı tehnıkanyń múmkindigin dáleldep, jýrnalısterdi tańǵaldyrǵan taǵy bir jaıt – Ile ózenindegi sýdy tazartyp, ishýge jaramdy etý. Ol Qapshaǵaı qalasynda ornalasqan desanttyq-shabýyldaýshy áskeriniń ınjenerlik bólimine tıesili «VOZ-4» tazalaý stansasy arqyly júzege asady. Buǵan jaýapty qatardaǵy jaýynger Elaman Egizbaevtyń aıtýynsha, kólik ishine ornatylǵan fıltr arqyly 1 saǵatta 4 m3, ıaǵnı 4 tonna sý tazalaý múmkindigi bar. Bul qurylǵymen bizdiń jaýyngerler Iraktaǵy Tıgr ózeniniń sýyn tazartyp, halqyn aýyz sýmen qamtamasyz etken.
Sý rasymen ishýge jaramdy bolyp shyqty. Bólim qyzmetkerleriniń aıtýynsha, qurylǵy ózen sýy emes batpaqtardy da ońaı tazartady.
Odan keıin mına mamandary – saperlerdiń bazasyna attandyq. «Jaǵalaý» ınjenerlik-saperlik brıgadasynyń maıory Ashat Serjanov kınologtardyń jumysymen tanystyrdy.
Injenerlik-saperlik polk komandıri Baqytbek Tájibaev saperdiń qorqýy tabıǵı nárse, qoryqpaıtyn saper jaqsy maman bolmaıtynyn aıtady.
Saperlermen birge «belgııa tóbeti» de boldy. Akıra atty senimdi serik jýrnalısterdiń sómkesine aldyn ala jasyrylǵan jarylǵysh tıptes zatty ońaı taýyp berdi. Serjant Sársenbek Orazaevtyń aıtýynsha, ıt tek bir adamdy ǵana tyńdap, ıesi sanaǵannyń buıryqtaryn oryndaıdy eken. Tapsyrmasyn sátti oryndaǵan tóbetke ıesi oıynshyǵyn berip, erkeletip qoıdy.
Jýrnalıster qaýymy ári qaraı hımııalyq qarý, radıasııamen zaqymdanǵan áskerı tehnıka men áskerlerdi zararsyzdandyrý jumysyna kýá boldyq. Arnaıy tehnıka, tazalaý quraldarymen urys alańynan qaıtqan kólikti tazalap, jaýyngerlerdi sabyndy sýmen jýyndyrady. Bul radıasııanyń tasymaldanýyn aldyn alady. Bir saǵatta bir vzvod 7-8 kólikti tazarta alady, al túgel rota jumyldyrylsa, bir aýdandy tazartyp berýge kúshi jetedi.
Radıasııa, hımııa jáne bıologııalyq qorǵanys
batalonynyń komandıri A.Nazarbaev batalon ıadrolyq jarylystyń aldyn alý,
radıasııalyq, hımııa-bıologııalyq barlaý, osyǵan baılanysty aqparat jınaý, taldaýmen
de aınalysatynyn aıtyp ótti. Batalon beıbit kezde Tótenshe jaǵdaılar
komıtetimen de birlesip jumys isteıdi eken. «Mobıldi batalon 2014 jyly
quryldy. Hımııa – jyldam damıtyn, óte arzan qarý. Kún sanap jańa túrleri tabylyp
jatady, sondyqtan quraldarymyzdy da únemi jańartamyz. Radıasııany tekserý, zararsyzdandyrýǵa
qajetti quraldardyń barlyǵy bar. Zararsyzdandyrýdyń tolyq jáne jartylaı túri
bolady» deıdi maıor.
Kórip kelgenimizdeı, beıbit kúnniń saqshylary únemi daıyndyq ústinde. №58012 áskerı bólimi komandıriniń orynbasary Rýslan Jylqybaev «Tynyshtyq kerek bolsa, soǵysqa daıyn bolý kerek» deıdi.
Budan bólek «ÝR-77» arnaıy tehnıkasynyń mınadan tazalaý jumysymen de tanystyq.
Osy operasııaǵa jaýapty aǵa leıtenant B.Shoqanuly mınasyzdandyrý tehnıkasy bir mezette 90 metr jerdi mınadan tazalap beretinin aıtady. Halyq arasynda bul mashınany «Zmeı Gorynych» dep ataıdy.
Jaýyngerlerimiz ónerli de bolyp shyqty. Press-týr sońy konsertpen támamdaldy.
