Sharaına
Senbi, 16 aqpan 2013 7:47
Meteorıt kópshilikti úreılendirdi
Keshe erteńgisin Chelıabi oblysynyń aýmaǵynda meteorıt qulaýy saldarynan jarylys boldy. Reseı ishki ister mınıstrliginiń taratqan málimetterine qaraǵanda, qýatty jarylys saldarynan mektepter men balabaqsha terezeleriniń áınekteri synǵan.
Senbi, 16 aqpan 2013 7:47
Meteorıt kópshilikti úreılendirdi
Keshe erteńgisin Chelıabi oblysynyń aýmaǵynda meteorıt qulaýy saldarynan jarylys boldy. Reseı ishki ister mınıstrliginiń taratqan málimetterine qaraǵanda, qýatty jarylys saldarynan mektepter men balabaqsha terezeleriniń áınekteri synǵan.
«Novostı» aqparat agenttiginiń habarlaýynsha, meteorıt qulaǵan aýmaqtarda bıik ǵımarattardyń, mektepter men balabaqshalardyń, basqa da nysandardyń áınekteri synǵan. Sońǵy málimetterge qaraǵanda, meteorıt qulaýynan 100-den astam adam jaraqat alǵan. Meteorıtti Chelıabi, Sverdlov, Túmen jáne Qorǵan oblystarynyń turǵyndary da baıqapty. Osyǵan baılanysty Chelıabi ákimshiligi jergilikti turǵyndardy balalaryn mektepterden alyp ketýge shaqyrdy.
Qaıta jańǵyrtý jumystaryn bastady
Soltústik Koreıa eldiń soltústik-shyǵysynda ornalasqan «Tonhe» zymyran ushyrý alańyn qaıta jańǵyrtý jumystaryn bastady. Aqparat quraldarynyń jazýynsha, ushyrý alańyn alysqa ushatyn iri kólemdegi zymyrandar úshin daıyndaýda.
Start berý alańyn jetildirý Iran ınjenerleriniń nemese ırandyq tehnologııanyń kómegimen júzege asyrylatyn kórinedi. «Tonheniń» kóptegen elementteri Irannyń «Semnan» keshenine uqsas keledi. Sarapshylardyń pikirinshe, qurylys qarqyny báseńdemese, nysandy jańǵyrtý 2016 jylǵa qaraı, tipti odan da erte aıaqtalýy múmkin. Anyqtalmaǵan derekterge qaraǵanda, nysandy koreıalyq jańa KN-08 jáne «Mýsýdan» zymyrandaryn ushyrý úshin daıyndaýda.
40 jyldan astam ýaqyt ótken soń…
Ulybrıtanııanyń qorǵanys mınıstrligi 1972 jyly Soltústik Irlandııada «qandy jeksenbi» kezinde qaza tapqan jáne aýyr jaraqattar alǵan adamdarǵa ótemaqy tóleıtin boldy. Bul jóninde «Frans-press» agenttigi habarlady.
Sol qandy oqıǵa bolǵan kúni qaza tapqan 13 jáne jaralanǵan osynsha adamnyń týǵan-týystaryna 50 myń fýnt sterlıngten (77,5 myń dollar) ótemaqy usynylady. Qorǵanys mınıstrligi osy maqsatqa 1,3 mıllıon fýnt sterlıng bólip otyr. Qaza tapqandardyń keıbir týystary bul ótemaqy mólsherine qanaǵattanbaǵandyq bildirýde. Al qandy oqıǵa 1972 jyldyń 30 qańtarynda Soltústik Irlandııanyń Derrı qalasynda bolǵan edi. Parashıýtshiler batalonynyń áskerleri beıbit sherý jasaýshylarǵa qarsy oq atyp, sonyń saldarynan 13 adam mert bolyp, 14 adam jaralanǵan bolatyn.
Qysqa qaıyryp aıtqanda:
Qyrǵyz depýtaty Týrsýnbaı Bákiruly «Obshestvennyı reıtıng» aptalyǵynyń tilshisi Erık Israılovqa qol jumsady. Oqıǵa parlamentarııdiń óz qyzmet bólmesinde bolǵan.
Ázerbaıjan prezıdenti Ilham Álıev Ismaıl aýdanynyń basshysy Nızamı Alekperovty osy jyldyń qańtaryndaǵy tártipsizdikterge baılanysty qyzmetinen bosatty.
Aǵylshyndyq zertteýshi, teńizge júzýshi jáne kartograf Djeıms Kýktiń tapanshasy Avstralııada ótken aýksıonda 227 myń AQSh dollaryna satyldy.
Taılyq erli-zaıypty súıisý uzaqtyǵy boıynsha álem rekordyn jańartty. Olar 58 saǵat 35 mınót jáne 58 sekónt boıy súıisip turǵan.
Kútpegen jerden daý shyqty
Egıpette el prezıdentiniń ulyn azamattyq avıasııa mınıstrliginde joǵary eńbekaqy alatyn jumysqa qabyldanǵanyna baılanysty kútpegen jerden daý-damaı týyndady. «Assosheıted press» agenttiginiń aqparatyna qaraǵanda, osyǵan baılanysty mınıstrlik arnaıy málimdeme jasaýǵa májbúr bolǵan.
Málimdemede el prezıdenti Mohammed Mýrsıdiń bes ulynyń biri – Omar Mýrsı áńgimelesýden ótip, tıisti qyzmetke ornalasqany aıtylǵan. Al mınıstrlikke qarasty agenttik qyzmetkeriniń aıtýynsha, Omar Mýrsı jergilikti ýnıversıtetterdiń birin jaqynda ǵana bitiripti. Kóp ýaqyt ótpeı ol aıyna 5 myń dollar alatyn jumysqa ornalasqan. Egıpette túlekterdiń basym kópshiligi eńbek jolyn 75 dollardan aspaıtyn memlekettik qurylymdarda bastaıdy eken. Aıta keteıik, prezıdent M.Mýrsıdiń prezıdenttik saılaýǵa túsken kezdegi baǵdarlamasynda óziniń jemqorlyqpen jáne tamyr-tanystyqpen aıanbaı kúresetindigi kórsetilgen.
Heıgeldiń kandıdatýrasy qoldaý tappady
Respýblıkashyl senatorlar toby AQSh prezıdenti Barak Obamanyń eldiń qorǵanys mınıstri qyzmetine usynǵan Chak Heıgeldiń kandıdatýrasyna qoldaý bildirmedi. Bul jóninde «Frans-press» aqparat agenttigi habarlady.
Daýys berý qorytyndysynda Ch.Heıgelge senatorlardyń 58-i qarsy daýys bergen, al ony senatorlardyń nebári 40-y jaqtaǵan. Jaqtap daýys bergenderdiń basym kópshiligi demokrattar. Osynyń aldynda Pentagon basshylyǵyna usynylǵan Chak Heıgeldiń kandıdatýrasyn AQSh Senatynyń qarýly kúshter jónindegi komıteti maquldaǵan bolatyn. Senattaǵy respýblıkashylar fraksııasy Heıgeldi senator bolǵan bir kezderi Izraıl atyna syndar aıtqan jáne ol Irannyń ıadrolyq baǵdarlamasyna qatysty qatań kózqaras ustanbaıdy dep aıyptaıdy. Senattyń kelesi otyrysy bir aptadan soń ótedi.
Saıahatshy keme jaǵalaýǵa jetkizildi
Bes kúnnen beri Meksıka buǵazynda buzylý saldarynan turyp qalǵan «Karnıval Trıýmf» saıahatshy kemesi áreń degende jaǵaǵa jetkizildi. «Reıter» agenttiginiń habarlaýynsha, kemeniń bortynda 3143 jolaýshy jáne 1086 ekıpaj múshesi bolǵan.
Keıin belgili bolǵandaı, kemeniń mashına bólimshesinen órt shyqqan, ol elektr júıelerin búldirgen. Sonyń kesirinen lıftiler men kárizder jumys istemeı qalypty. Basqa da problemalar týyndaǵan sııaqty. «Karnıval» saıahat kompanııasy jolaýshylardyń barlyǵyna bılet qunyn qaıtarýǵa, 500 dollardan qolma-qol aqsha berýge, olardyń barlyq kóliktik shyǵyndaryn tóleýge, sondaı-aq, jolaýshylardy tegin taǵy bir saıahatqa alyp shyǵýǵa ýáde berip otyr. Degenmen, keıbir jolaýshylar buǵan qanaǵattanbaı, qomaqty ótemaqy tólettirý úshin sotqa shaǵymdanatyndaryn málimdedi.
Internet materıaldary negizinde ázirlendi.
