– Eń aldymen maǵan daýys bergen Qazaqstan azamattaryna alǵysymdy aıtqym keledi. Bul – úlken jaýapkershilik. Jaýapkershilikti oryndaý – men úshin úlken mindet. Bul – halyqtyń senimi. Saılaý joǵary deńgeıde, ádil jáne ashyq ótti. Saılaý barysyn myńnan astam halyqaralyq baıqaýshy qadaǵalady. Álemniń 40 elinen kelgen 350-ge jýyq sheteldik jýrnalıst dúnıe júzine habar taratty, – dedi Memleket basshysy.
Budan keıin buqaralyq aqparat quraldary ókilderi Memleket basshysyna ózderin tolǵandyrǵan suraqtaryn qoıa bastady.
Birinshi kezekte saılaýdaǵy básekeles úmitkerlerdiń saılaýaldy baǵdarlamalarynda qamtylǵan ózekti máseleler Qazaqstan Prezıdentiniń aldaǵy jumysy barysynda nazarǵa alyna ma degen mazmunda saýal qoıyldy. Suraqqa oraı Qasym-Jomart Toqaev saılaýdyń eń basty ereksheligi úmitkerler sanynyń kóp bolýynda ekenin jetkizdi. Onyń aıtýynsha, jeti úmitker óz baǵdarlamasyn jarııalap, úgit-nasıhat júrgizý isinde teń múmkindikke ıe boldy. «Bul saılaý qyzyq ári ashyq ótti dep aıtýǵa bolady. Olardyń usynystaryn óte oryndy dep esepteımin. Eń paıdaly tustary jumys barysynda nazarǵa alynady», dedi Memleket basshysy.
Saılaý kúni Nur-Sultan men Almaty qalalaryndaǵy ruqsat etilmegen mıtıngilerge qatysqan azamattar týraly suraqqa da tushymdy jaýap berildi. Osy oraıda Prezıdent Qazaqstan Respýblıkasynyń Zańyna sáıkes Bas prokýratýranyń eskertýine qaramastan narazylyq tanytqandardyń áreketi quqyq buzýǵa jatatynyn aıtty. Keıbir azamattardyń arandatýshylyqqa barǵanyn, polısııa qyzmetkerleriniń jumysyna kedergi keltirgeni týraly faktilerdiń tirkelgenin málimdedi. Ondaı quqyq buzýshylyqqa tıisti sharalardyń qoldanylatynyn eskertti. «Olar basqa turǵyndardyń qaýipsizdigine nuqsan keltirdi. Úsh qyzmetker aýrýhanaǵa tústi. Polısııa qyzmetkerleri tıisti sharalardy qoldandy. Osy oraıda olarǵa óz jumysynda kásibılik tanytyp, máseleni der kezinde sheshkeni úshin alǵysymdy aıtamyn», dedi Prezıdent.
Sondaı-aq Q.Toqaev quqyq qorǵaý organdaryna meılinshe sabyrly bolýdy tapsyrǵanyn, olar keleshekte de osy qalpynda qalatynyna senimdi ekenin aıta kelip, «Men narazylyq sherýine shyqqandarǵa dıalog formatyn usyný qajet dep sanaımyn.
Buǵan deıin Qoǵamdyq senim komıteti qurylatynyn aıtqan edim, onyń quramyna qoǵamymyzdyń túrli toptarynyń ókilderi kiredi, onda pikir almasatyn bolamyz. Meniń oıymsha, ártúrli kózqarastyń bolýy zańdy, biraq biz – bir halyqpyz. San pikir – birtutas ult», dedi Prezıdent.
Qasym-Jomart Toqaev óńirlerde keıbir máseleler áli de sheshimin kútip turǵanyn aıtty. «Saılaý naýqany kezinde men aımaqtardyń barlyǵyn aralap shyqtym. Árbir aımaqtyń óz ereksheligi bar jáne elimizdiń damýyna óz úlesin qosyp otyr. Al shynyna kelsek, elimizde túıini sheshilmegen máseleler bar. Men olardy jaqsy bilemin, sizder de jaqsy bilesizder. Bul – medısınanyń sapasy, jalaqynyń tómendigi, ekologııa, aýyz sýmen qamtamasyz etý. Sondyqtan ózekti máselelerdi basty nazarǵa alamyz», dedi Memleket basshysy.
Qazaqstan Prezıdenti osy oraıda Úkimetke tıisti tapsyrmalar beretinin basa aıtty. «Qazirgi tańda naqty sheshimder qabyldaý kerek. Halyq bizden osy sheshimderdi kútip otyr. Halyq uzaq sózden ábden sharshady. Sondyqtan men Prezıdent retinde osy jumyspen mindetti túrde shuǵyldanamyn», dedi Qasym-Jomart Toqaev.
Jýrnalısterdiń Úkimet quramyna qatysty suraǵyna «Bizdiń zańnamamyzǵa sáıkes Úkimet taratylmaıdy. Degenmen, jekelegen kadrlyq aýysý bolady. Buǵan deıin atap ótkenimdeı, Úkimetke jańa tulǵalar, onyń ishinde jastar tartylady. Menińshe, barynsha qabiletti jas kadrlardy tartý qajet» dep jaýap berdi Memleket basshysy. Osy oraıda Qasym-Jomart Toqaev buǵan deıin kadrlyq rezerv daıyndaýǵa ýáde bergenin eske saldy. Prezıdenttiń aıtýynsha, oǵan elimizdiń barlyq óńirlerinen 300 adam kiretin kórinedi. «Biz bul tizimdi jańartyp otyramyz. Basty maqsat – jastardy memleketti basqarýǵa tartý. Jalpy aıtqanda, Úkimet jumysyna jańa tynys, jańa serpin berý kerek. Sondyqtan meniń talabym óte qatań bolady», dedi Prezıdent.
Kezdesý barysynda Qazaqstan aýmaǵynda atom elektr stansasyn salý máselesi kún tártibine shyǵarylmaıtyny naqty aıtyldy. «Atom elektr stansasynyń qurylysy bizdiń kún tártibimizde joq. Eger mundaı másele kóterilip jatsa, mindetti túrde halyqpen aqyldasamyz. Tipti qajet bolsa bul másele boıynsha referendým ótkizemiz. Sebebi bul – óte jaýapty, ózekti másele», dedi Qasym-Jomart Toqaev.
El Prezıdenti elimizdegi negizgi máselelerdiń biri bolyp sanalatyn sybaılas jemqorlyqpen kúresý toqtamaıtynyn aıtyp ótti. «Sybaılas jemqorlyq – óte kúrdeli qubylys. Bylaı aıtqanda dert dep te aıtýǵa bolady. Sondyqtan bul dertpen mindetti túrde qoǵam bolyp kúresýimiz kerek. Biz sybaılas jemqorlyq týraly ashyq túrde aıtamyz. Elimizde sybaılas jemqorlyq – óte úlken problema. Bul dert – bizdiń qaýipsizdigimizge syn-qater. Sondyqtan meniń mindetim – sybaılas jemqorlyqpen kúresý. Jaqynda, bıylǵy mamyr aıynda osy máselege arnalǵan úlken jınalys boldy. Keshendi is-sharalardy qoldanamyz dep oılaımyn. Bul jóninen halyqqa esep beremiz», dedi Memleket basshysy.
Kezdesý kezinde sheteldik jáne otandyq jýrnalısterdiń halyqaralyq qatynastar týraly qoıǵan suraǵyna oraı Memleket basshysy halyqaralyq yntymaqtastyq úshin barlyq qajet sharalar qoldanylatynyn, buǵan deıin qalyptasqan ekijaqty, kópjaqty jáne halyqaralyq uıymdar aıasyndaǵy yntymaqtastyqtardy nyǵaıta túsetinin aıtty. Sonymen qatar Reseı, Qytaı, Ortalyq Azııa elderimen qarym-qatynasqa basymdyq beriletinin jáne álemniń basqa da barlyq memleketterimen dostyq baılanystar saqtala beretinin sóz etti.
Sonymen birge baspasóz máslıhatynda Qazaqstan Respýblıkasy Prezıdentin ulyqtaý rásimi 12 maýsymda ótetini málim boldy. «Eger osy ýaqytta Ortalyq saılaý komıssııasy daýys berý qorytyndysyn tolyqtyrý mindetin oryndap, esepterin jarııalaı alsa, ulyqtaý rásimin 12 maýsymda ótkizýdi josparlap otyrmyz. О́ıtkeni 14 maýsymda Bishkekte, Dýshanbede halyqaralyq sharalar josparlanǵan. Bul sharalarǵa Qazaqstan Prezıdentiniń ókilettikterge ıelik etkendigi durysyraq bolady», dedi Qasym-Jomart Toqaev.
Joldybaı BAZAR,
Svetlana ǴALYMJANQYZY,
«Egemen Qazaqstan»
