Densaýlyǵy nashar ekenin rastady
Sársenbi, 6 naýryz 2013 6:25
Venesýelanyń baılanys jáne aqparat mınıstri Ernesto Vılegas el prezıdenti Ýgo Chavestiń densaýlyq jaǵdaıy nasharlaǵanyn rastady. Aqparat agenttikteriniń habarlaýynsha, prezıdenttiń tynys alýynda problema bar, bul jańa juqpaly aýrýdyń saldary bolyp tabylady.
Sársenbi, 6 naýryz 2013 6:25
Venesýelanyń baılanys jáne aqparat mınıstri Ernesto Vılegas el prezıdenti Ýgo Chavestiń densaýlyq jaǵdaıy nasharlaǵanyn rastady. Aqparat agenttikteriniń habarlaýynsha, prezıdenttiń tynys alýynda problema bar, bul jańa juqpaly aýrýdyń saldary bolyp tabylady.
Mınıstrdiń málimdeýinshe, prezıdent óziniń densaýlyǵy nashar ekenin biledi. Ol sondaı-aq Venesýelaǵa qarsy «psıhologııalyq soǵys» órship turǵanyn, oǵan jol berýge bolmaıtynyn atap ótken. Ýgo Chaves ótken jyldyń jeltoqsanynda tórtinshi ret operasııa ústeline jatqan edi. Sodan beri prezıdent ne teledıdar ekranynan, ne halyq arasynan kóringen emes. Bul túrli aqparattardyń taralýyna sebep bolýda. 58 jastaǵy Ýgo Chaves 1999 jyldan beri Venesýelany basqaryp keledi.
Búkilqytaılyq sessııa bastaldy
Keshe Beıjińde Búkilqytaılyq halyq ókilderi jınalysynyń sessııasy jumysyn bastady. Jınalys eki aptaǵa sozylady. Bul jóninde «Sınhýa» agenttigi habarlady.
Jıynda delegattar QHR-dyń jańa tóraǵasynyń jáne onyń orynbasarlarynyń, sondaı-aq premer-mınıstrdiń, vıse-premerdiń kandıdatýralaryn jáne mınıstrler kabınetiniń quramyn bekitedi. Bulardan bólek delegattar ákimshilik reformasynyń josparyn talqylaıdy. Sessııa sońynda QHR tóraǵasy Sı Szınpın qyzmetine resmı túrde kirisedi dep kútilýde. Al eldiń premer-mınıstri Lı Kesıan bolatyn sııaqty. Sessııanyń ashylýynda qazirgi premer-mınıstr Ven Szıabao sóz sóılep, úkimettiń ótken jylǵy jumysy jóninde esep berdi.
Álemdegi eń qart áıel kim?
Álemdegi eń qart áıel Mısao Okava esimdi keıýana 115 jasqa toldy. Japondyq keıýana óziniń týǵan kúnin qarttar úıinde atap ótken. «Frans-press» agenttiginiń jazýynsha, ol osynshama uzaq jasaımyn dep múlde oılamaǵan.
Osy jyldyń aqpanynda M.Okava álemdegi eń qart áıel retinde Gınnestiń rekordtar kitabyna tirkelgen edi. Mundaı qurmet oǵan 116 jyl 100 kún ómir súrgen amerıkalyq Bessı Kýper qaıtys bolǵannan keıin kórsetilip otyr. Osy ýaqytqa deıin álemde 114 jasqa kelgen 100 adam ómir súripti. Al 29 adam 115 jyl, 8 adam 116 jasqa deıin ómir súrgen eken.
Egemendikke shabýyl dep aıyptady
Iraktyń Anbar provınsııasynda Sırııanyń – 48, Iraktyń 9 áskerıi qaza tapty. Irak qorǵanys mınıstrliginiń habarlaýynsha, shekaraǵa jaqyn mańda sırııalyq «terrorshy top» kútpegen jerden shabýyl jasaǵan. Olar sırııalyq áskerler men aıdaýyldarǵa qarsy avtomattan oq jaýdyrǵan.
Mınıstrliktiń málimetterine qaraǵanda, qaza tapqan sırııalyq áskerıler budan biraz ýaqyt buryn medısınalyq kómek alý úshin Irak shekarasyna qashyp ótken sııaqty. «Ál-Arabııa» telearnasynyń habarlaýynsha, sırııalyq áskerılerdiń sany 65 adam eken. Oqıǵa olardy Sırııanyń resmı tulǵalaryna tabys etýi úshin alyp bara jatqanda bolǵan. Al Irak tarapy oryn alǵan bul oqıǵany «eldiń egemendigine jasalǵan shabýyl» dep aıyptaýda.
36 jolaýshy qaza tapty
Kongo Demokratııalyq Respýblıkasynda «SAA» avıakompanııasyna qarasty «Fokker 50» jolaýshylar ushaǵy apatqa ushyrady. «Assosheıted press» agenttiginiń habarlaýynsha, apat saldarynan 36 adam opat boldy.
Ushaq eldiń ortalyq bóligindegi Goma qalasynyń ústinde ortalyq saılaý komıssııasy ornalasqan ǵımaratqa jaqyn jerde qulaǵan. Abyroı bolǵanda, qala turǵyndarynyń eshqaısysy zardap shekpegen. Ushqysh ushaqty ǵımaratqa soqtyǵysýdan alyp ótipti. Al ushaq bortynda 40 jolaýshy jáne ekıpaj músheleri bolǵan eken. Apatqa nóser jaýyn sebep bolǵan degen boljam jasalyp otyr. Bul elde avıaapat jıi oryn alady. О́tken jyldyń jeltoqsanyndaǵy apat saldarynan 32 jolaýshy qaza tapqan edi.
Kúdikti qamaýǵa alyndy
Máskeý qalasynyń polısııasy Úlken teatrdyń kórkemdik jetekshisi Sergeı Fılınge qastandyq jasaǵan kúdiktini ustady. Ishki ister organdarynyń taratqan málimetteri boıynsha kúdiktiden jaýap alynyp jatyr.
Aty-jóni atalmaǵan kúdikti keshe erteńgisin Máskeý qalasynyń janyndaǵy Stýpıno eldi mekeninde qamaýǵa alynǵan. Ekinshisiniń kim ekeni áli anyqtalǵan joq. Keshe sondaı-aq, ustalǵan kúdikti bolǵan birneshe meken-jaıǵa tintý júrgizildi. Úlken teatrdyń baspasóz hatshysy E.Novıkovanyń aıtýynsha, teatrǵa tintý júrgizilmedi. Sergeı Fılınge osy jyldyń 17 qańtarynda keshkisin qastandyq jasalǵan edi. Sonyń kesirinen oǵan birneshe ret operasııa jasalǵan bolatyn.
Qysqa qaıyryp aıtqanda:
*Grýzııa prezıdenti Mıhaıl Saakashvılı Adjarııada ornalasqan rezıdensııasynan bas tartty. Jergilikti BAQ-tardyń jazýynsha, ol rezıdensııany úkimetke qaıtarýǵa daıyn.
* Qyrǵyzstannyń «Manas» halyqaralyq áýejaıynyń mańyndaǵy AQSh-tyń avıabazasynan ótken úsh aı ishinde 40 myń dollar bolatyn azyq-túlik qoldy bolǵan.
*Antonıo Stradıvarıdiń 2010 jyly Londonda urlanǵan skrıpkasy Bolgarııadan tabyldy. Ol 1,8 mıllıon AQSh dollaryna baǵalanady eken.
*Reseı prezıdenti janyndaǵy kazaktar isteri jónindegi keńes jalpyreseılik kazaktar qoǵamy qaýymdastyǵyn qurý týraly sheshim qabyldady. Bul jóninde reseılik BAQ-tar habarlady.
Internet materıaldary negizinde ázirlendi.
