Sharaına
Beısenbi, 4 sáýir 2013 2:11
Birlesken aımaqqa jol jabyq
Soltústik Koreıa ońtústikkoreıalyq jumysshylardyń Keson birlesken ekonomıkalyq parkine kirýine tyıym saldy. KHDR basshylyǵy Seýlge óz sheshimi týraly keshe habarlady. Resmı Seýl Phenıannyń sheshimin «óte ókinishti» dep atady. Al bul tyıym salýdyń qashanǵa deıin sozylatyny belgisiz.
Beısenbi, 4 sáýir 2013 2:11
Birlesken aımaqqa jol jabyq
Soltústik Koreıa ońtústikkoreıalyq jumysshylardyń Keson birlesken ekonomıkalyq parkine kirýine tyıym saldy. KHDR basshylyǵy Seýlge óz sheshimi týraly keshe habarlady. Resmı Seýl Phenıannyń sheshimin «óte ókinishti» dep atady. Al bul tyıym salýdyń qashanǵa deıin sozylatyny belgisiz.
Onyń ústine Phenıan ekonomıkalyq aımaq aýmaǵyna kirip úlgergen Ońtústik Koreıa azamattarynyń ony esh kedergisiz tastap shyǵa alatynyn atap kórsetti. Seýldegiler óz kezeginde qazirgi kezdegi basty maqsat Kesonnan óz azamattaryn esh nársege uryndyrmaı alyp shyǵý ekenin aıtyp otyr. Ońtústik Koreıa úkimetiniń deregine súıensek, búginde ekonomıkalyq aımaqta 861 ońtústikkoreıalyq jumysshy bar kórinedi.
Gaza sektoryna soqqy berdi
Izraıldiń áskerı áýe kúshteri Gaza sektory aýmaǵyna avıasoqqy jasady. Shabýyl saldarynan zardap shekkender joq delinip otyr. Al Izraıl áskerı áýe kúshteriniń reıdi osynyń aldynda Gaza sektorynan birneshe zymyran jiberilgennen keıin jaýap retinde jasalǵan.
Palestınalyqtar zymyrandarynan da aıtarlyqtaı zııan kelmegen jáne adam qurbandyqtary da joq degen aqpar tarady. Zymyrandardy jibergeni úshin jaýapkershilikti salafıt toptarynyń biri óz moıyndaryna alǵan. Olardyń mundaı qadamǵa barýyna 2 sáýir kúni Izraıl túrmesinde tamaq ragynan kóz jumǵan palestınalyq Abý Hamdıehanyń ólimi sebep bolǵan. Palestına taraby Hamdıehaǵa qatysty adamgershilik tanytylyp, ony túrmeden bosatýdy suraǵan eken. Biraq bul ótinish oryndalmaǵan.
Mysyr bıligin syn tezine aldy
AQSh basshylyǵynyń pikirinshe, Egıpet bara jatqan baǵyt qaýipti. Bul týraly AQSh prezıdentimen kezdesýi kezinde memlekettik hatshy Djon Kerrı málimdedi. Mundaı ustanym tanytýǵa jaqynda oppozısııashylardyń tutqynǵa alynýy, jýrnalısterge qatysty qatal sharalar men kóshedegi tártipsizdikter sebep bolǵan.
Bes mysyrlyq oppozısııashyny tutqyndaýǵa order 25 naýryzda berilgen bolatyn. Tekserý nusqalary boıynsha bul adamdar jurtshylyqty áleýmettik jelilerde saılaýǵa qazirgi prezıdent Mohammed Mýrsı ilgeriletilgen «Musylman baýyrlar» partııasyna qarsy zorlyq-zombylyq kórsetýge shaqyrypty. Soǵan qaramastan, naýryz aıynyń basynda ótken kelissózder nátıjesinde AQSh Egıpetke 250 mln. dollar kóleminde qarjylaı kómek kórsetýge kelisken bolsa, kelisim buzylmaıtyn bolyp otyr.
Qarý saýdasy sharty qabyldandy
BUU Bas Assambleıasy álemde qarý-jaraq saýdasyn rettep otyratyn halyqaralyq shart qabyldady. Shartty qoldap, BUU-ǵa múshe 154 memleket daýys berse, 3 memleket (Iran, Sırııa jáne KHDR) qarsylyq tanytqan, taǵy 23 el, arasynda Reseı de bar, beıtarap qalǵan. Shart qabyldanýy úshin ony daýys bergen elderdiń kem degende úshten ekisi qoldaýy tıis bolatyn.
Qabyldanǵan qujat qol qoıýǵa ústimizdegi jyldyń 3 shildesinen bastap ashylady. BUU-nyń tıisti qararynda barlyq memleketterden shartty ratıfıkasııalaýdyń múmkindigin qysqa merzimde qarastyrý suralady. Osy jerde atap kórsetetin basty jáıt – Bas Assambleıa qabyldaǵan bul shart álemde qarý saýdasyn reglamentteıtin alǵashqy halyqaralyq qujat bolyp otyr. Buǵan deıin qarýǵa baqylaý tek jekelegen memleketter deńgeıinde ǵana júrgizilip kelgen edi.
Ishimdikten aýlaq bol, jumysshy
Belorýssııada jumys berýshiler jumysshylaryn jumysqa kiriser aldynda ishimdik ishkeni, ne ishpegeni týraly tekserýden ótkizýge mindettelmek. Sóıtip, bul elde «Eńbekti saqtaý týraly» zańǵa ózgerister engizý qarastyrylyp otyr.
Zań jobasyn parlamentte eńbek jáne áleýmettik qorǵaý mınıstri Marıanna Shetkına tanystyrdy. Onyń aıtýynsha, mundaı norma buǵan deıin tek kásibı júrgizýshilerge ǵana qatysty bolyp kelse, endi jumys berýshi kún saıyn aýysym aldynda jumysshylaryna medısınalyq tekserý júrgizýge tıis bolady. Áńgime naqty qandaı kásipterge qatysty ekeni ázirshe túsiniksiz. M.Shetkınanyń sózine qaraǵanda, qaýipti jumystar tizimi qaıta qaralyp, jańartylǵan túrde bekitilýi tıis kórinedi.
Jeńgetaılyq jasaǵan dekan
Tájikstanda Hýdjand memlekettik ýnıversıteti shet tilderi fakýltetiniń dekany, professor M.Zıkrııaevaǵa qorda (prıton) ustady jáne jeńgetaılyqpen aınalysty degen kúdik keltirilip otyr. Bul aqparatty «Avesta» agenttigi taratty.
Agenttiktiń sózine qaraǵanda, M.Zıkrııaevaǵa qatysty respýblıka qylmystyq kodeksiniń tıisti baby boıynsha qylmystyq is qozǵalǵan. «Ilkimdi» hanymǵa eshqaıda ketpeý týraly qolhat berilipti. «Avesta» Sogdııa oblysyndaǵy quqyq qorǵaý organyndaǵy derek kózine silteme jasaı otyryp, dekannyń kinásin moınyna koıatyn aıǵaqtar qazirdiń ózinde tolyq jınalyp, búginde is sotqa berilgenin de jarııa etip úlgerdi.
Qysqa qaıyryp aıtqanda:
Qyrǵyzstannyń Osh qalasynda mılısııa ózbek tilinde shyǵatyn «Ýsh sadosı» («Osh jańǵyryǵy») memlekettik gazetiniń bas redaktory Mahamadsolı Ismaılovty tutqynǵa aldy. Oǵan 2010 jyly eldiń ońtústiginde bolǵan etnosaralyq qaqtyǵystar kezinde adam óltirýge qatysqan degen kúdik taǵylyp otyr.
Túrkııalyq qutqarýshylar Ystambulǵa jaqyn jerde Mármár teńizinde otqa oranǵan serýen paromynan ondaǵan týrısti evakýasııalaǵan. Týrısterdiń arasynda shetel azamattary da bolǵan. Aldyn ala aqparatqa qaraǵanda, kómek tez jetkendikten, birde-bir adam eshqandaı jaraqat almaǵan.
Armenııanyń Kotaık oblysyndaǵy Proshıan selosynda starosta Grach Mýradıannyń óli denesi tabyldy. Ol shekesinen tıgen oqtan kóz jumypty. Qastandyq jasaǵan kim ekeni ázirshe belgisiz. G.Mýradıan kezinde Taýly Qarabaqtaǵy qarýly qaqtyǵysqa qatysqan kórinedi, oppozısııalyq partııanyń múshesi bolypty.
Internet materıaldary negizinde ázirlendi.
