Osyndaıda sabyr kerek. Sabyrdy Allanyń bir aty dep jatady, demek, ol da adamnyń boıyndaǵy asyl qasıettiń biri. Alypqashpa úreı men aıǵaı-súreńdi dúrbeleńge salynbaı, sabyrdy júrekke túıip, qaýipsiz jerlerge jyljyǵan durys. Eshkim de eshkimge qasaqana qastandyq jasaǵan joq, al pále-jala aıtyp kelmeıdi, aıaq astynan bolady. Oǵan kináliler áli anyqtalyp, tıisti jazasyn alatyny kúmánsiz.
Alaıda, mundaıda keıbireýler dúrbeleńge dem berip, halyqtyń basyna túsken qıyndyqtyń ózinen upaı jınap, «atyń shyqpasa jer órteniń» qımylyn jasap qalýǵa tyrysady. Ondaılar túrli ósek-aıań taratyp, basyna onsyz da kún týǵan halyqty abyrjytyp, túrli qaýipti boljaldap, aıǵaı-shý týdyryp, álekke salady. Mundaıdy halyq «jynnyń isi» dep baǵalaıdy. Halyqty adamgershilik joldan adastyryp, aıǵaı men oıbaıǵa shaqyryp, bireýlerge kektenýdi, kimniń isi ekenin anyq bilmese de jalǵandy jappaı jazǵyrýdy týdyrý – osyndaı áreketterdiń saldary. Tipti «mashınasyna mingizbeı ketti, almaı ketti, ne sumdyq, ne degen qaıyrymsyzdyq, ne degen qatygezdik» degen sııaqty baıbalamdardy da jany ashyǵansyp údetetin, oıbaıdy ushtaı túsetinder jetip-artylady. Árkimniń óz jaǵdaıy bar-aý degendi ondaılar áste oılamaıdy. Adam aldymen óz balasyn, óz otbasyn qutqarýǵa asyqqanyn sezse de ondaılar tyrnaq astynan kir izdep, áıteýir bireýdi jazǵyryp, halyqtyń ashý-yzasyn týdyratyn jol izdeıdi. Otqa maı quıatyndar da tabylyp, keıde onsyz da aýyr jaǵdaıdy ýshyqtyryp jiberedi.
Biraq... Inshalla, bizdiń halqymyzdyń kóbiniń boıynda ata-babamyzdan, asyl dinimizden qanymyzǵa sińirgen ardaqty qasıetimiz – sabyr bar. Sabyr saqtasaq, báriniń de arty qaıyr bolady. Eń bastysy, adam shyǵyny bolmasyn. «Sabyr túbi – sary altyn, sarǵaıǵan jeter muratqa, sabyrsyz qalar uıatqa» degen danalyqty halqymyz ǵasyrlar boıy boıyna saqtap keledi...
Mundaı asyl qasıet bizden basqa da keıbir Azııa halyqtarynyń boıynda bar eken. Mysaly, joǵary damyǵan ulttardyń biri – japon halqy da sondaı kórinedi. 2011 jyly Japonııada teńiz boıyndaǵy 200 shaqyrym jerdi sharpyǵan toǵyz baldyq surapyl jer silkinisi bolǵany esimizde. Sonyń kesirinen 20 myńnan astam adam qaza bolyp, 300 myńnan astam adam baspanasyz qaldy. Sýnamıdiń kesirinen AES jarylyp, halyqqa orasan zor zalal keltirildi. Sonyń bárin teledıdardan kórdik. Alaıda birde-bir adamnyń aıǵaı-uıǵaı salǵanyn, jylaý men joqtaýǵa jol bergenin baıqamadyq. Allanyń basqa salǵanyn bári de sabyrmen tosyp aldy. Tipti, AES-ti jóndeý jumystaryna da úı-ishi, otbasymen máńgige qoshtasyp, qutqarý jumystaryna qaptap jazylǵan eriktilerdi de kórsetti... Mine, naǵyz úlgi alatyn jaǵdaı.
Al Arystaǵy oqys oqıǵaǵa oralatyn bolsaq, ortalyq bılik te, jergilikti bılik te qoldan kelgenniń bárin istep jatyr. Prezıdent Q.Toqaev jarylystyń zardaptaryn joıý týraly birden tapsyrma berdi. Keıde bılik mundaıdy kózge ilmeı, halyqty dúrbeleńge saldyrmaıyn degen pıǵylmen nazar aýdartpaýǵa tyrysatyn áreketter de bolatyn. Joq, olaı emes, Prezıdentimiz birden naqty tapsyrma berdi. Bolǵan jaǵdaıdy óz kózimen kórý úshin Túrkistanǵa baratyny da belgili boldy. Qorǵanys mınıstri ushyp baryp, oqıǵa ornynda júr. Túrkistan oblysynyń ákimi birden oqıǵanyń bel ortasyna kirip ketti. Ol halyqtyń jaǵdaıymen tanysyp, ınfraqurylymdyq nysandardy tekserýde. Ázirge, Qorǵanys mınıstrligi Almatydan 500 áskerı qyzmetshini jiberip, órt sóndirýge jáne onyń zardabyn joıýǵa jumyldyrǵan. Osyndaı áreketter kúnnen-kúnge kóbeıe túseri anyq.
Eń bastysy, halyqtyń tynyshtyǵy buzylmasyn, orynsyz dúrbeleń týmasyn dep tileıik. Sonda bári de eptep qalpyna keletin boldy.
