Búginde Áıteke bı kentinde eki qabatty 12 turǵyn úı qurylysy, 250 oryndyq aýdandyq aýrýhana, 600 oryndyq mádenıet úıi men basqa da áleýmettik nysandardy salý josparlanyp otyr. Sondaı-aq bul aýmaqta aldaǵy ýaqytta 24 kásipkerlik nysan boı kóterip, avtomobıl joly qaıta jańartylady. Qazirdiń ózinde kópqabatty 6 turǵyn úıdiń qurylysy júrgizilip jatyr.
Qazaly aýdanynyń ortalyǵy Áıteke bı kentinde jalpy quny 889,7 mln teńge bolatyn mekemeler úıiniń qurylysy bastalyp ketti. Atalǵan jobany iske asyrý bir ǵımaratta ákimdik pen aýdandyq bólimderdi shoǵyrlandyrýǵa múmkindik beredi. Olar qazirgi ýaqytta eldi mekenniń ár aýmaǵynda ornalasqan.
– Qazir aýdandyq ákimdik pen bólimder bólek ǵımarattarda ornalasqan. Bul turǵyndar úshin óte qolaısyz. Onyń ústine, qazirgi aýdan ákimdigi ǵımaratynyń irgetasy 1963 jyly qalanǵan. Elý jyldan astam ýaqyt turǵan nysan ábden eskirgen. Jańa aýdan ortalyǵynyń josparyna sáıkes, oblystyq mekemeler úıiniń, halyqqa qyzmet kórsetý ortalyǵynyń, mektepter men aýrýhanalardyń, sondaı-aq sot pen mádenıet úıleriniń ǵımarattary halyqqa yńǵaıly bolý úshin bir-birine jaqyn ornalastyrylady. Aýdanda sońǵy eki jylda ınfraqurylymdyq jáne basqa da nysandardyń qurylysy qarqyndy júrgizilýde. Sebebi Qazaly aýdany ınfraqurylymmen az qamtylǵan aýdandardyń biri sanalady, – deıdi oblystyq qurylys, sáýlet jáne qala qurylysy basqarmasynyń basshysy Muhamedısa Álserikov.
Aýdanda jol qurylysy men jóndeý jumystaryna basymdyq berilgen. Sebebi bul Qazaly aýdanyndaǵy eń ózekti máselelerdiń biri sanalady.
Aımaqta 2013 jyldan bastap 200-den astam áleýmettik nysan paıdalanýǵa berilgen eken. Olardyń qatarynda densaýlyq saqtaý, bilim berý, sport jáne mádenıet nysandary bar. Apatty jaǵdaıdaǵy 57 densaýlyq saqtaý nysanynyń ornyna jańadan 49 ǵımarat boı kótergen. Qalǵany 2019 jyly salynatyn bolady. Sol sııaqty, 2018 jyly Qyzylorda oblysy úshin rekordtyq kórsetkish ornap 700 myń sharshy metr turǵyn úı paıdalanýǵa berildi.
О́ńirde úsh aýysymda oqytý máselesi men «Balapan» baǵdarlamasy merziminen buryn sheshilip, 3-6 jas aralyǵyndaǵy balalar mektepke deıingi tárbıe jáne bilimmen 100% qamtyldy. 2017 jyly oblysta apatty jaǵdaıdaǵy mektepter máselesi sheshimin tapty. 2013 jyly jaramsyz dep tanylǵan 37 bilim uıasy bolǵan edi. 2013 jyldan beri apatty úıde turyp kelgen 645 otbasy jańa baspanaǵa ıe boldy. Qazirgi tańda oblys aýmaǵynda 1747 páterlik 69 turǵyn úıdiń qurylysy júrgizilip jatyr.
Sóz yńǵaıynda aıtar bolsaq, 2013-2016 jyldary Qyzylorda oblysynda 2008 jyldan beri aıaqtalmaı, qurylysy uzaqqa sozylyp kelgen 34 nysannyń máselesi sheshildi. Aımaq áleýmettik máselelerdi sheshýde respýblıkada aldyńǵy qatarda keledi.
Qyzylorda oblysy
